Адями кырӟатэк сюлэмтэм луоз. Соин, дыр, берло дыре котькуд гуртын сямен кырӟась-эктӥсь ансамбльёс кылдо. Кырӟанлэсь кулэлыксэ валаса улэ Золотарево гуртысь "Пестросаес" - сӥё-дано нимын пусъем фольклоръя калык коллектив. Калыклэсь культуразэ, кылзэ, сямъёссэ уте. Нош кужым, дыр но мылкыд шедьтыны ачиз уж но улон юрттэ.
Пӧжы гуртын мыло-кыдо калык улэ. Солэсь визьзэ, быгатонлыкъёссэ кырӟанъёс пыр возьматыны, калык азе поттыны юрттӥзы клубын ужасьёсын ӵош Надежда Владыкина, ансамбльлэн кивалтӥсез, но Пётр Антропов, арганэн но баянэн шудӥсь.
Ужаны быгатэмзэс адӟизы, 1995-тӥ арын Золотариын кылдӥз Удмурт культурая центр. Кивалтӥсе бырйизы Надежда Владыкинаез. Со дырысен уж планъя но куинь ӧръя радъяськиз. Центрлэн бурд улаз ужаны кутскизы клуб, музей но библиотека. Пӧртэм темаосъя сценарийёс гожтон, дӥськут, тупась арбериос люкан, сям-йылолъёсты возьматон – ваньмыз та ужрадъёс кулэ каризы гуртэ музей кылдытонэз.
Кутскон азяз коллектив пӧртэм нимъёсын ветлӥз. Солэсь аспӧртэмлыксэ возьматыны кулэ вал нимыныз но. Соин 2000-тӥ арын "Пестросаес" ним басьтӥз. Уйпал удмурт кышномуртлэн калык азе потаны, ассэ быгатӥсь, чеберез валась луэмзэ возьматон понна нимысьтыз шортдэремез вал. Та дӥськутлэн саесъёсыз соку ик син азе усё. Куэмын тӧдьы-тӧдьы векчи шортлэсь, калыклэсь улонэз валамзэ возьматӥсь пужыосын. Та огшоры саес ӧвӧл. Со утись но, куинь дуннеез возьматӥсь но - туж мур пуштросъем. Ансамбль кылдон аръёсы кырӟасьёслэн ваньзылэн сямен сыӵе пужыё саесъёсын шортдэремъёссы вал на. Дыр ортчемъя, выль дэрем кылдытон мугъёс луизы. Выльёсыз но сыӵеесь ик чебер вуремынэсь, пестросаес выллемесь.
Крезьёс, мадьёс, кылтэм кырӟанъёс, выль гуръёс – ваньмыз быгатыса пыртэмын обрядъёсы. "Армие келян", "Шӧдэлэ-шӧдэлэ", "Тротки-готки", "Сюан", "Куно пумитан", "Гыдыр-гыдыр", "Крень юон" нимъёсын вашкала сямъёс но кырӟанъёс калык азе выльысь поттӥзы.
Ӟеч лэсьтэм ужъёссэс адӟы- тэк ӧз кыле. 2013-тӥ арын фольклор ансамбльлы калык ним сётӥзы. Та аръёсы коллективен кивалтӥзы культура удысысь сӥё-дано ужасьёс Надежда Владыкина но Лидия Михайлова.
"Пестросаес" аспӧртэм- лыксэ возе. Репертуараз выль кырӟанъёсты пыртэ, гуртъёсын возиськем кырӟанъёсты берен калык азе поттэ. Коллективлэн туж трос басьтэм вормонъёсыз. Пӧртэм фестивальёсын азинлыко ужамзэс адӟыто басьтэм дипломъёссы, ӟечкыланъёссы. Кытчы гинэ ӧвӧл вуттылэмын соосты ӧтись мылкыдзы! Элькунысь ужрадъёсты вератэк, Киров, Ульяновск, Нижний Новгород улосъёсы но Москвае вуылэмын. Вормонъёс басьтэм сяна, коллектив вала но адӟе кырӟанлэсь, пумиськонъёслэсь, калыке потанъёслэсь кулэлыксэс. Соин гуртъёсы концертъёсын потан валтӥсь уж луэ. Таӵе ужрадъёсысь ӝутскем мылкыдын берто. Азязы выль сюресъёс усьтӥсько, выль малпанъёс кылдо. Репертуар бордын ужан амалъёс но берло дыре пӧртэмесь луизы. Луонлыкъёс вань кырӟанъёсты мукет сямен люканы но гожтыны, быгатонлыкъёсты калык азе онлайн амалэн поттыны. Солэн трос ӟеч палъёсыз. Мынон-ветлон луонлыкъёс котьку уг луо, нош ужез возьматытэк мӧзмыт луоз. Ужам-лэсьтэмез калык но мед тодоз, мед адӟоз.
"Пестросаес" - гуртлэн синучконэз. Соя Золотаримес но тодо. Клублэн но гуртмылэн улонэз та коллективе ветлӥсьёс котыртӥ берга. Котькытчы вуо, котькытын ӟечлы лэсьтэм ужъёссы адӟисько. Та коллективтэк Пӧжы гуртэз син шоры ик пуктыны шуг. Азьло басьтэм данзэ но вормонъёссэ возён вылысь берло дыре выль кырӟанъёсын, выль кырӟасьёсын узырмиз. Нош кивалтон биньгозыос выжизы Ижысь культурая колледжез йылпумъям егит ӧнерчилы Дарина Антроповалы. Визьмо, быгатӥсь, калыкен ужаны валась кивалтӥсь фольклор бордын тырше. Коллективлэсь ужан ӧрзэ валаса азинтэ. Вань ни ёрос, элькун, огъяросси ужрадъёсын басьтэм вормонъёсыз.
Егит специалистлы мылысь-кыдысь юртто Удмурт культурая центрын ужасьёс, ансамбльын кырӟасьёс но аккомпаниаторзы Пётр Антропов. Озьы, "Пестросаеслэн" ужез азинэсо мынэ, сюлэм малпанъёссэ кырӟаса-вераса усьтэ.Кырӟан дунтэк басьтымтэ бере, малы меда уд кырӟа?