Сюлэмъёсазы кылиз
Таяз аре Валамазлы 225 ар тырме. Ӟеч сямъя, бадӟым дырпусэз пусйыны дасясько августлэн нырысетӥ субботаяз. Посёлоклэн узыр историез, юбилей аре со сярысь одно ик верало, ортчемзэ данъяло. Вунэтод шат сое? Валамаз быдэс элькунын вал тодмо: азинлыко ужазы леспромхоз (400 адями отын тыршиз), стеклозавод (ог 300 мурт ужаз), куас лэсьтонъя цех, химлесхоз, пыдкук лэсьтонъя цех. 90-тӥ аръёсы кутскем перестройка но выль рынок кусыпъёс огез бӧрсьы мукетсэ куашкатӥзы-быдтӥзы.
Макем Валамазын улон пӧзиз, валатскыны луэ на ужам объектъёслэн кылем бервылъёссыя но. Туннэ татын номыре ужасез ӧвӧл ни, гурт удыс ноку ӧй вал – ӧз но вуы. Улӥсез ог 600 мурт кылемын, нош школаын, кытын куке но 800 пинал визьнод люказ, 47 дышетскисез. Ярам, 3 магазин но пекарня вань на.
- Посёлокмы черкогурт лыдъяське ни, но со бумагаосын гинэ, улӥсьёсмылэн сюлмазы азьвыл нимыныз ик кылемын, куспазы но посёлок шуо, - вера гурт администрацилэн тӧроез Алексей Исупов.
18-тӥ яке 21-тӥ даур?
Валамаз поселениен Алексей Сергеевич кивалтэ ини 13 ар. Ми азьын со зэмос кузёен, ас гуртэз понна сюлмыныз висись адямиен адӟиськиз. Зэм но, та аръёс ӵоже трос воштӥськонъёс пыризы Валамазлэн улоназ.
Посёлокын ваньмыз коркаос пулэсь, пуэн ик эстӥсько, соингес, вылды, ми 18-тӥ даурын улӥськомы, шуэ тӧро. Котьма ке но, туала улонлэн куд-ог тодметъёсыз палэнтӥ ортчымтэ. Одӥгез тани – вылӥ скоростен Интернет. Паймыса быримы, куке кылӥмы, ву сётон гумыоссы быдэсак выльдэмын шуыса. Газетын ужаса, вить уйпал ёросъёсты ог кызё ар ни котыръяськомы, но таӵезэ одӥг учырез сяна ум тодӥське.
- Водопровод сетьёсмы юн вужмемынэсь ни вал. Тол но, гужем но тупатъяны, кышъяны вырыса улӥмы, вутэк но пукылӥмы. Ваньмаз сходъёсын калык та ужпумез ӝутылӥз. Бордамы ёрос администрациез кыскимы, Госсоветысь депутатлы Ольга Черкасовалы вазиськылӥмы, озьы, огъя кужымен ужез интыысьтыз вырӟытӥмы. "Чистая вода" федерал программае шедьыса, водопроводэз выльдыны быгатӥмы. Но ог 300 сюрс ӧзгес тырмы, шур сьӧрысь коркаосы нуись гумыосты воштоно на вал, соиз понна элькун висъяз ни, - валэктэ тӧро.
Мар шуод на: выжыкыл но тӥни. Вузы валамазъёслэн тросэзлэн коркаосазы пыртэмын. Гуртазы 40 колонка сылэм ке, 13 кельтэмын на. Ваньмыз ульчаос, нош соос кытчыозь но уг кыстӥсько, табере одӥге герӟамын. Сюлмаськизы гидрантъёс понна но, гуртазы соос 32. Нюлэс котырак бере, тылпулэсь утиськон – валтӥсьёсыз ужпумъёс радын. Алексей Сергеевич интыысь аскивалтон ёзъёсы лыктэм гинэ, тылпулэсь утиськонъя пункт кылдытон борды кутскем, ачиз ик со калык дружинаен но кивалтэ. Гуртысь тыметэз но утялтыса-утьыса возё.
Огкылысь ке улоно
Ӟечез сярысь веранэз тӧролэн ву гумыосын ӧз быры. Эшшо одӥг бадӟым выльдӥськон вылэм Валамазын. Таиз учыре ужаллям электротыл сётон сетьёстын.
- Кужымез но ӟечлыкез карынлэсь но умоесь. Эшшо на котькудӥзлы дунтэк счётчик пуктӥзы. Но таоссэ сетьёсты выльдон ми бордысь ӧз поты, сое азьвыл чаклам планъя быдэстӥзы на, луоз, – шуэ Алексей Сергеевич.
Вань на кузёлэн эшшо одӥг бадӟым малпанэз – чагыр эстӥськон.
- Гуртлэсь улонзэ кулэезъя радъянын тросэз потэ улӥсьёс бордысь. Огкылысь, огкужымен кутсконо ке – уно ужъёсты берыктыны луэ. Оскисько, газэн но пӧрмытомы шуыса.
Огкылысь луэмзэс валамазъёс возьматӥзы, инициативной бюджетированиея элькун конкурсэ пыриськыкузы но. Асьсэ улӥсьёс гинэ ӧз люкалэ, гуртысьтызы кошкемъёс но уксёен юрттыны мылкыд каризы, пе, соку. Озьы шайвылэз кенерен котыртӥзы, пыроннияз дурем капка пуктӥзы. Туэ эшшо отын ужаны дасясько: уксё люкаса, пушсэ благоустроить каремзы потэ. Озьы ик бигер шайвылын но лэсьтыны малпало.
Мар луоз?
Сюлмаськытӥсь ужпумъёс ичи ӧвӧл, лэсьтэмъя но уг быро. Одӥгез - клуб. Посёлокын со вылэм, но ӝуаны шедем. Али гуртысь библиотекалэн азьвыл юртаз интыяськемын, но али школа липет улэ пыртон сярысь чакласько. Школалэн юртаз выжемын ни нылпи сад но, библиотека но, табере черодэз - клублэн.
Мукетыз ужпум – эмъяськонни. Выльзэ пуктозы шуыса тодмо ни, пе, но валантэм на, мар со луоз – ФАП яке амбулатория. Уга трос калык улӥз бере, Валамазын ужаз амбулатория, куке но асьсэлэн роддомзы но вылэм, хирургической операциос но лэсьтылӥллям. Пулэсь лэсьтэм юрт али туж вуж ни, одӥг терапевтсы ужа, но со пенсие дасяськем ни. "Нош кин сое воштоз, ёрос больницаын но врачъёссы уг тырмо ке?" - огымысь верало гуртоос. Соин малпало, ФАП гинэ пуктозы ни шуыса. Нош ёрос эмъяськонниозь – ог 40 иськем…
Малпанъёс но луонлыкъёс
"Валамаз" муниципал кылдытэт висъяське соин но: мукет поселениос кӧня ке гуртъёсты огазеяло, нош со огназ. Малы ке шуоно котыраз матэтӥ нокыӵе гуртъёс ӧвӧл. Но палэнын сылэмез но огназ луэмез понна ужпумъёсыз ичигес уг луо. Котькытын сямен ик саклык висъямез куро сюресъёс. Соос пумысен кыл поттылэмысь, нош ӟеч ивор кылӥмы.
- Кыксэ урамъёсты туэ тупатъяломы – Труд но Мелиораторов. Элькун ласянь одӥг но ӝыны миллион манет висъязы – таӵеез кемалась ӧй вал ни, - шумпотэмзэ уг ваты кузё.
- Кыӵе ке но выль азинскон инты усьтыны луоно на-а дорады яке туннэ кулэгес ваньзэ утьыны? – юаськомы на кошконмы азьын.
- Куас лэсьтон цехмы выльысь мед ужасал – та малпан сюлэмам ӟеч-ӟеч каръяськиз ни. Кӧня аръёс со быгатыса ужаз, кӧня тӥрлыкез, маиз но отын ӧвӧл! Ваньмыз озьы ик сылэ. Куасъёс отын уд ни потты – соиз валамон, но пуэн ужанлы интыез туж кельшымон. Гуртысьтымы Максим но Денис Бабкин вынъёс ужбергатон удысын сюрес лёго, туж оскымонэсь, кышкасьтэмесь, мылкыдоесь пиос. Пуэн ужанлы котьмазы вань ини: техниказы, станокъёссы, пилорамазы. Туж потэ, мед соос цехез ужатозы вал шуыса. Гурт калыклы но уж шедьысал. Нош тужгес дуноез - ужгур кылӥськысал, Валамазэс улӟытысал, - мылкыдъёссэ усьтэ Алексей Сергеевич.