Огъя музъемъёссы 1600 гектар лыдъясько. 1200 гектар вылэ кизёзы ю тысь, 320 гектар вылэ - одӥг аръем турынъёсты, 55 гектар вылын будоз рапс.
- Нуналаз 100 гектар кизьыны чакламын, но сомында уг пӧрмы, 80-85 гектар котыр луэ, - шуэ Юрий Мышкин. - Техника ӵем тӥяське. Туннэ но одӥгез трактормы ремонтын. Араз одӥг ке но выль трактор басьтысал ке, югдур тупатскысал.
Воргорон вань ужан сюрессэ, 42 ар, гурт удыслы сӥзиз. Удысэз вить чиньызэ кадь тодэ. Али пенсиын ни, агрономлэсь ужъёссэ быдэстыны егит ӧнерчилы Егор Пономарёвлы оскизы. Удысаз нырысь вамышъёс лэсьтыны солы юрттэ Юрий Васильевич.
Туэ возёсын урожайлы осконзы бадӟым. Удобрение, пе, трос басьтэмын, 205 тонна, сомында ноку но ӧй вал на.
- Гектарысьтыз 20 центнер мед луоз вал. Кылем арын шорлыдын 13 центнер гинэ басьтӥмы. Тужгес но ляб удалтӥз йыды. Со культуралэн юн трос куронъёсыз. Музъем ке урод, сиёнэз ке ляб, номыре но уд басьты. Тужгес но "непривередливой" луэ сезьы.
- Рапслэн пайдаез вань-а?
- Солы туж трос гербицидъёс мыно, соос дуно. Одӥг обработкаен гинэ уг окмы. Куддыръя будэтэммылэн пайдаез ичи луэ. Кидыссэ басьтэ Ижысь компания, милем - жмыхез. Пудоосмес луд вылын ум возьмаське, пудолы тросгес сиён дасяно луэ.
- Механизаторъёсмы ваньмыз ужало, - шуэ бригадир Татьяна Бринзей. - Ужасьёсмы Дизьминоысь, Мосеевоысь, машинаен вайиськом Ворцаысь, Уканысь, Ярысь. Скал кыскисьёс вить час котыр татын луо ни, али кизисьёс но соосын лыкто. Кысык вакыт ортчиз ке, трактористъёс сизьым час бере лыктылозы. Кизисьёсты сюдыны луонлыкъёсмы вань, но тросэз механизаторъёс отказтӥзы.
Мосейгуртъёс гуртазы ветло, мукетъёсыз сьӧразы вортто. Сиськыны мылкыд карисьёслы сиён Ярысь "Тазалык"-ысь вайиськомы.
Техникаен тунсыкъяськон пинал дырысеныз
Никита Трефилов коть- кыӵе техникаен но ужа, кулэ ке, ачиз ик тупатъя но. Нош тӥяськон учыръёс ӵем луыло.
- Туннэ ӝытозь ремонтэ окмоз ни, - шуэ егит воргорон.
Никита Глазов ёросын Шудзя гуртын будэм. Папез Леонид Леонидович колхозын тракторен ужам, со бордын техникалы пиез но дышем. Никиталэн верамезъя, техника вираз пыӵамын. Школа бере Никита Глазовысь технической колледжын механиклы дышетскем. Армиын службазэ Таджикистанын нуэм. Собере улон сюресэз пӧртэм интыосы вуттылэм. Ужам Шудзяын, Качкашурын, Чураын, Глазовын, вуылэм Москвае но. Кышно шедьтэм Яр ёросысь. Улыны кузпалъёс интыяськиллям Дизьминое. Татын куинь нылпиоссылы вань нылпи сад но, школа но. Нош "АгроЯр" оскымон, мыло-кыдо, ужась воргоронэн узырмиз. Никита Леонидовичлы уж гинэ мед луоз, шутэтскон нуналъёстэк но, отпускъёстэк но тыршыны дась.
Нош туэ со Яр ёрослэсь данзэ Тракторъя биатлонын утиз, басьтӥз 15-тӥ инты.
- Мар, ми ӧм но дасяське но. Юазы, мынод-а, пе. А малы уд. Ӧтизы ке, обязательно эшшо мыно на. Пока нулло, ветлоно, калыкез адӟоно, - шуэ воргорон. - Гербер праздникъёсы но пыриськисько.