- Ӝеганъёс кылдӥзы медосмотрен сэрен. Уга сое лагерьёсын ужасьёсмы асьме эмъяськонниын уг ортчо, туэ Кировысь эмчиос дорын эскериськоно луизы. Ярам, асьсэос Глазове ветлӥзы. Кызьы ке но та радлыкез воштоно вылэм, мед асьме эмъяськонниын гинэ ваньзэ ортчоно луысал. Озьы тӥни, Парзиын, Ключиын, Октябрьскийын но Дзякиноын пришкольной лагерьёсты дыраз усьтыны ӧз пӧрмы, - валэктэ ёрос администрацилэн дышетонъя ёзэтэзлэн кивалтӥсез Татьяна Русских.

Лагерьёсты дасян, приёмка но соин герӟаськем ужпумъёс сярысь Татьяна Петровна вераськиз ёросысь Калык кенешлэн кенешоназ. Нылпиослэн гужем шутэтсконзылы но тазалыксэс юнматонлы Калык кенеш арлы быдэ нимысьтыз саклык висъя, быгатэмезъя юрттыны тырше. Школа вӧзын ужась лагерьёсын приёмка радъяськем дыръя комиссиен ӵош кенешлэн ёзчиосыз но пыриськизы, ваньзэ ас синмынызы адӟизы-дунъязы.

- Комиссия, нырысь ик, пыр-поч эскере тылпулэсь, терроризмлэсь утиськонъя куронъёсты быдэстэмез, та юанъёс – тужгес кулэосыз. Со сяна, пандемиен сэрен воштӥськизы СанПинлэн но куронъёсыз, соос эшшо чурытэсь луизы. Люмын, Кочишевоын, Пониноын шугъяськонъёс кылдӥзы юон вулэн ӟечлыкез пумысен. Огъя тыршемен, та ужпумез палэнтыны луиз. Нылпи лагерьёсты усьтон понна школа директоръёс собыдӟа ужез радъяно-бергатоно, Роспотребнадзоре документъёсын маке быдӟа пакет дасяно луо, - азьланьтэ веранзэ Татьяна Петровна.

- Штанигуртысь школа-нылпи сад вӧзын усьтӥськись лагерьын приёмка вал, солэн ужаз мон но пыриськи. Учкимы ваньзэ: шутэтскон но шудон интыосты, сиськонниез, нокыӵе юанъёс яке валантэмъёс ӧй вал. Лагере ньыльдон пиналъёс ветло, дас кыкез – дун тырытэк. Школалы матын улӥсько бере, нылпи куараосты нуналлы быдэ ӵукнаысен кылӥсько. Шумпотӥсько: нылпиосмы утемын, соос понна котыр ласянь ӟечесь луонлыкъёс кылдытэмын, - итӥське вераськонэ Мария Абашева, Калык кенешлэн дышетонъя но тазалыкъя комиссиезлэн кивалтӥсез.

Нылпиослэсь гужем каникул дырзэс пайдаё радъян понна Глазов ёрослы 1 миллион 403 сюрс манет висъямын. Кызьы пусйиз Татьяна Русских, бадӟымез люкетэз солэн школа лагерьёсы кутӥське. Соос сяна, Кожильын профильной лагерь ужзэ мытӥз ни, мукетыз усьтӥськоз на Пониноын. Гужем ӵоже лагерьёсын оглом 600 котыр нылпиос шутэтскозы, 200-эз пӧлысьтызы – шуг югдуре шедем семьяосысь пиналъёс, соослы путёвка дунтэк сётэмын, Калыклы юрттэт сётонъя министерство ласянь.

Город сьӧрын интыяськем лагерьёсын ёросысь куамын пиналъёс мылкыд каризы шутэтскыны. Путёвкаос дунтэмесь ӧвӧл, но дунызлэсь ӝынызэ туэ берыктыны луэ. Кема витёнэз но ӧвӧл – арня ӵоже гинэ.