Туннэ 70 арес тырмонзэ пусъе асьме бӧлякмы – актер, валтӥсь режиссёр, Удмурт Элькунысь искусство удысысь сӥё-дано ужась Василий Серафимович Ушаков.
Вордскиз со 1955-тӥ арын Глазов ёросысь Вуж Эбга (Нижняя Слудка) гуртын.
1968-1973-тӥ аръёсы Москваысь Щукин нимо вылӥ театральной училищеын дышетскиз. 1979-тӥ арын А. В. Луначарский нимо вылӥ режиссёр курсъёсты йылпумъяз (ГИТИС).
1973-тӥ арысен ужан удыссэ Элькунысьтымы йӧскалык театрен герӟаз. Театрлэн сцена вылаз 30-лэсь трос пьесаос пуктӥз. Соос пӧлын: "Инвожо светит и в полночь" (Р. Валишинлэн романэзлэн мотивъёсызъя, 1979), "Лысву сямен уг тӧлӟы синкыли" (А. Григорьев, 1985), "Эбга" (П. Захаров, 1992), "Эш-Тэрек" (Е. Загребин, 1997) но мукетъёсыз.
1993-1995-тӥ аръёсы "Удмуртия" нимо кун телерадиоканалын режиссёр луыса тыршиз. "Ижевск вечерний" передача бордын ужаз. Р. Валишинлэн "Укное учко тылсиос" веросэзъя телеспектакль но М. Петровлэн "Италмас" поэмаезъя кык люкетъем телевизионной фильм бордын пыр-поч ужаз.
Россиысь пӧртэм театръёслэн сцена вылазы трос пьесаос но телеспектакльёс пуктӥз. Финно-угор калыкъёслэн театральной фестивалязы (Финляндия) "Эбга" спектаклезлы критикъёс вылӥ дунъет сётӥзы.
2011-тӥ арысен Удмурт кун университетысь "Ватка" нимо театральной студиен кивалтэ.
Режиссёрын ужам сяна, Василий Ушаков гожъяськон бордын но тырше. Кемалась ик ӧвӧл солэн "Яратон, яратон" бичетэз потӥз. Отчы удмурт кылын ньыль пьесаосыз пыризы.
Вань уйпал удмуртъёслэн нимынызы ӟечкыласьком Василий Серафимовичез та дано юбилееныз. Сюлмысьтымы сӥзиськомы выль ужъёс но вормонъёс, улонтӥ азьланяз но капчи мылкыдын но сэзь вамышъёсын мыныны мед кылдоз!