17-тӥ сентябре - куара сётон нырысетӥ нунал. Удмурт Ключи гуртысь 14/07 номеро быръён участок 8 часысен ини ӧсъёссэ усьтӥз. Быръёнъёслы татын ваньмыз дась. Пандемиез чакласа, куара сётон залэ пыронын ик котькудӥзлы маска, перчатки но ручка сёто, температуразэс эскеро, киоссэс спиртэн пазяло.
- Куара сётыны лыктэм муртлы 4 бюллетень сётӥськомы: кыкезъя – Кун Думае партиез но нимаз адямиез быръёно луо, кыкезъя – ёросысь Депутат Кенеше. Калык ӵукнаысен ик лыктэ ини. Ключиос сяна, ми доры лыкто Педоново, Горлица но Тукбулатово гуртъёсын улӥсьёс. Озьы ик та пичи гуртъёсын ватсаса куара сётон радъяськомы, комиссиысь кыкез ужасьёсмы но одӥг наблюдатель туннэ Тукбулатовое потэмын, отын ужало. Туннэ понна кызьлэсь ятыр куриськонъёс вань ни ас доразы куара сётыны мылкыд карисьёслэсь.
Быръёнъёс – туж кулэ но бадӟым ужрад. Оскиськомы, улӥсьёсмы мыло-кыдо пыриськозы, куаразэс кин понна сётыны соослэн дырзы малпаны вал, агитаторъёс но чырмыт ужазы, - валэктэ быръёнъёсъя комиссилэн кивалтӥсез Татьяна Худякова.
Тукбулатовоысь Александр Мальчаков 8 часлы быръёнъёсъя участокын вал ни. Со нырысетӥез бырйисен луиз. Егит пияш ужа "Коммунар" СПК-ын, но та нуналъёсты куара сётон участокын ортчытэ, малы ке шуоно ёросысь Депутат Кенеше кандидат Дмитрий Целоусов солы оскем наблюдатель чотын ужаны.
- Быръёнъёсы мон, кызьы 18 арес тырмиз, пыр ветлӥсько. Туннэ но, нырысь ик, куараме сётӥ. Но быръён лэсьтыны капчи ӧвӧл, бюллетеньёсты кутыса, кабинкае пыри но эшшо ӟеч-ӟеч малпаськи на. Собере тани наблюдательёслы висъям интыын эскерыса пукиськомы. Ваньмыз каньыл, кулэезъя мынэ. Нокыӵе валантэмъёс, ченгешонъёс ӧвӧл, - шуэ Александр.
Соин артэ эшшо кык нылкышноос пуко, куара сётон радлыкез сак эскерыса возё, нош ньылетӥез та дыре артысь пичи гуртэ потэмын, кытын ватсаса куара сётон радъямын. Пусъёмы на: быръёнъёс законэз тӥятэк мед ортчозы шуыса, куинь нунал ӵоже ик элькунысь участокъёсын 3 сюрслэсь ятыр наблюдательёс пукизы.
18-тӥ куарусёнэ. Бадӟым Лудошурын улӥсьёс котькуд быръёнъёсы, автобусэ пуксьыса, быдэс гуртэн Качкашуре ветлылӥзы. Куара сётон участок уга отын усьтылӥзы. Мыло-кыдо гуртоос быръёнъёсы празднике сямен ветлыны дышемын. Но туэ нырысьсэ пичи гуртъёсысь калыкез участокъёсы ӧз вайылэ, комиссиослэн ёзчиоссы асьсэос гуртъёсы потазы, отын ватсаса куара сётон радъязы.
Бадӟымлудошуръёс ӵукнаысен ини магазинзы пала вамыштӥзы. Куара сётыны лыктӥсьёсты шуныт пумита Фаина Князева. Быръёнъёсын солэн бадӟым ужан опытэз, улӥсьёсты ӟеч тодэ: уно аръёс комиссиын тыршемын, агитаторлэн ужез но палэнтӥ ортчымтэ. Нош туэ со набюдатель чотын пыриське.
- Бадӟым Лудошурын куара сётон списоке 54 адями пыртэмын. Куать мурт ас дораз мылкыд кариз, соос доры но пыратэк ум кельтэ, - вера Фаина Николаевна.
Римма Алексеевна Данилова – гуртысь одӥгез арлыдоез луэ. Бодыен но вамышъяса, ачиз вуиз магазинэ. Пересь бабуш одӥг быръёнъёсты но кельтылымтэ, бадӟым ужрадлэсь палэнэ кылемез ӧз поты али но. Нырысь куара сётӥз, собере мар кулэ басьяськиз, гуртоосыныз адӟиськиз но дор палаз вамыштӥз.
Тани Золотарёв кузпалъёс вуизы. Соос но быръёнъёсты кулэен но бадӟым ужен лыдъяло, пыриськытэк уг кельто. Быдэс дуннеын али сюлмаськытӥсь югдур, куараез мур малпаськыса сётоно, улонмы огсыр азьлань мед мыноз, шуо.
19-тӥ куарусёнэ – куара сётон берпуметӥез нунал. Быръёнъёсъя участокъёс ворсаськытозь кылемын на 3 час. Качкашурысь 14/09 номеро участокын кыштыр ужало.
- Калык ӵукнаысен обедозь лыктӥз, собере чалмыт луиз. Али нош тани бӧрсьысь бӧрсе вуо ни. 3 часэ лэсьтэм йылпумъянъёсъя ог 50 процентэз бырйисьёс куара сётыны ветлэмын ни, но со ӧжытгес. Пытсаськытозь, оскиськомы, вуозы на, лыдпус йылоз эшшо, - вера избирательной комиссилэн кивалтӥсез Гульсина Ворончихина.
Качкашурысь куара сётон участокын кык видеокамераос ужало, отысь ваньмыз материал, мукет участокъёсысь сямен ик, Удмуртиысь общественной наблюдательной штабе кошке. Со Ижын усьтэмын, кытын кызьы быръёнъёс радъясько, котькудӥз мылкыд карись мурт соосты адӟыны быгатӥз, та штабе вазиськыса.
Куара сётон йылпумъяськем бере участковой но территориальной комиссиослы бадӟым ужез быдэстоно-берыктоно на вал – куараосты лыдъяно. 21-тӥ куарусёнэ ЦИК йылпумъянъёсты ивортӥз ни.
Туспуктэмъёсыз авторлэн.