Шаерамы ю-нянь октэмын-калтэмын, комбайнъёс гараже пуктэмын ни. Кӧня тысь люкаськиз но мукет ужпумъёс сярысь милемлы мачкиз Балезино ёросысь "Кестымский" огазеяськонлэн агрономез Фарт Биянов.
- Тулыс бусы ужъёс юн ӟеч мынӥзы, кизёнэз дырыз дыръя быдтӥмы. Кин соку малпалоз вал, гужем сыӵе пӧсь луоз шуыса. 122 гектар вылэ толйись юос киземын вал, 987 гектар висъямы валэс юослы, 1395 гектар – одӥг но трос аръем турынъёслы. 400 гектар вылын урожай быриз. Кидыслы но фуражлы бен окмоз. Кизьыны 307 тонна тысь кельтӥмы. Туэ ӟег умойгес удалтӥз бере (гектарысьтыз 15 центнер котыр басьтӥмы) туэ сое 213 гектар вылэ кизимы ни.
Пудо сиён дасянэн шуг-секытъёс кылдӥзы, малы ке шуоно турын кӧс, мускытэз уг окмы. Кылем арын сярысь силос кык поллы ичигес люкаськиз. Кулэ 7-8 сюрс тонна котыр, гуэ понӥмы 5400 тонна. Но пудо сиёнэн ум ёрме, толэз потомы, кылем арынэз кылиз на. Арысь аре кукуруза будэтӥськомы, туэ гектарысьтыз 200 центнер котыр люкамы. Кӧс турын 242 тонна дасямы, кылем арын 694 тонна вал. Куро азьло ужасьёслы люкылӥськомы вал, нош туэ ваньзэ хозяйствое кельтӥмы. Каль пудоосты нордосэн сюдӥськомы на.
- Ужасьёсты окмо-а?
- Юн ум курадӟиське, но шуг-секытъёс вань. Шуом, тракторъёсмы 16, нош механизаторъёсмы – 12. Адямиос ӧвӧлэн техника сылэ. Асьмелэнъёс, кестымъёс ужало, Котомкаысь 5 мурт ветлэ, ӝыт-ӵук машина нуллэ. Гужем пиналъёсты кутӥськомы. Соос юн юртто.
Хозяйствомы азьветлӥсьёс пӧлын ӧвӧл, бере но ум кылиське. Эстӥськон, удобрениос дасяськомы, техникамес выльдӥськомы. Туэ, шуом, БТЗ-243К трактор, 10 метръем культиватор басьтӥмы. Азьланезлы но малпанъёс вань.
Фарт Бадертдинович хозяйствоын профсоюзэн но кивалтэ. Коллективысь 64% ужасьёс профсоюзэ пыремын. Огазеяськонлэн валтӥсь ужпумез — ужасьёслэсь правооссэс утён, калык пӧлы ивор вӧлмытон, ваньмон дырез пайдаё ортчытон но мукет. Ваньзэ сое быдэстыны тыршо.
- Сюлэм висе, - шуэ Фарт Бадертдинович, - АПК-лэн профсоюзэз пенсие потон арлыдэз кельтыны ӧз быгаты шуыса. Кӧня гожъямы, куримы, пикетэ но потамы, ӝутӥзы ик ведь. Гурт удысын тыршисьёслы нокызьы но пенсионной возрастэз ӝутыны уг яра вал.
Нош ваньмон дыръяз Фарт Биянов туала технологиосын тунсыкъяське. Компьютер сьӧраз пуксе но видеосюжетъёс дася. Тужгес но кельше солы праздникъёслы, юбилейёслы поздравлениос лэсьтыны. Со понна нимысьтыз программа инъяз. Шуэ, мар егитъёсты куаретод, пыр компьютер сьӧрын пуко шуыса, ачим но сыӵеос пӧлысь луисько.
Конешно, нырысетӥ интыын - колхоз но гурт ужъёс.