Соос адӟем карымон луо ас гуртооссы но мукет гуртъёсын улӥсьёс понна, будӥсь кивоштӥсьёс понна, соосты дунъяло ёрос но элькун радын. Ӵапак сыӵеос бордысь пото гуртын ӟечесь воштӥськонъёс, выль мылкыдъёс но тунсыко малпанъёс.

Конкурсэ пыриськыны мылкыд карисьёс арысь аре тросгес луо. Тужгес узыр вал 2020-тӥ ар: сизьым ТОСъёс вожвылъяськизы.

Туэ ӧжытгес, но ужзы бадӟым но пусйымон лэсьтэмын-берыктэмын. Паймытэмысь уг дугды Пышкец. Конкурсэ гурт калык ньылетӥзэ пыриське, арлы быдэ трос выльзэ но тунсыкозэ улоназы пыӵатэ.

Гуртазы кылдытэм музей корказылэсь выл но пуш туссэ воштыны лӧпкытӥз суредасьсы Валерий Агафонов. Ачиз но мыло-кыдо ужаз, юрттӥсьёсыз но. Озьы ик дэмен Гордей шур ошмес котырез утялтӥзы-чебермазы. Кенеразы, выж лэсьтӥзы на. Ошмес котырез шулдыртыса будо палэзьпуос, тыпыос, чияпуос но мукет писпуос. Соосты мерттэм Леонид Агафонов.

"Пӧжы" ТОС-эн быгатыса кивалтэ Надежда Третьякова. Гуртсэс но котырысьтыз интыосты чылкыт возьыны быдэс гуртэн сюлмасько. Огкылысь тыршизы беседка бордын но, ошмессэс утялтонын но. Кытын сюресъёсты ке тупатоно-волятоно, нош мар ке но малпало. Школа доразы туэ ӟусъёс пуктӥзы, шутэтскыны, пумиськыку, сюлмысь вераськыны медло шуыса. Пӧжыослэн мылкыдзылы котькин вожъяськоз! Кутскизы но ӵектосъёс борды басьтӥськизы: та ужлэсь но палэнэ ум, пе, кыле.

Инициативной бюджетированиея элькун конкурслы луыса, табере сизьым урамъёсын 50-лэсь ятыр светильникъёс гуртсэс ӝытъёсы югдыто. Самообложениея программаез но уже кутӥзы, уксё кыскыны быгатӥзы но нош ошмессэс благоустроить каризы.

Мыло-кыдо луэменызы, ас гуртсэс чебергес но улымонгес карыны сюлмаськеменызы озьы ик висъясько Самки но Кабаково гуртъёсын улӥсьёс. Кыӵе малпанъёсын уло, кызьы соосты пыӵато-быдэсто, нимаз гожтомы на.

"Лучший орган территориального общественного самоуправления" смотр-конкурслы йылпумъянъёс шараямын луозы 4-тӥ ноябрьлы сӥзем ёрос праздникын. Ӟеч сямъя устооссэ нош пусъёзы уксё премиосын.