Кузьымгуртысь Анна Лебедева ёросысьтымы одӥгез азьветлӥсь скал кыскись. Нылкышно пудо вордон удысын 6 аръёс сяна уг ужа на. Но котькуд нунал тыршыса ужамез ӟеч азинсконъёс вае ни.
Одӥгез бадӟымез вормонэз - 2019-тӥ ар понна трос йӧл поттэм егит скал кыскисьёс пӧлын элькунмыя 1-тӥ инты басьтэмез.
Нош алигес нимыз нош ик элькунмы тыр чузъяськиз. Туэ Гуртлэн арезлы сӥзьыса, Грахын ортчем элькун Гурт шудонъёсын нырысьсэ скал кыскисьёс, механизаторъёс но турнасьёс куспын вожвылъяськон радъямын вал. Та ӵошатсконъёсын шаерысьтымы 20 дояркаос пӧлын ёросмылэсь данзэ утизы Кузьымгуртысь Анна Лебедева но Асан техникумысь Виктория Кутянова.
- Пудо вордон удысын ужатозям скал кыскисьёс пӧлын ёросамы ортчылӥсь вожвылъяськонэ мон 4 пол пыриськи ни. Котькуд ар призёръёс пӧлы шедьылӥ. Туэ та ужрад аспӧртэмлыко ортчиз. Скал кыскон аппаратэз ӝог сэрттыны-бичаны быгаттэммес возьматэм сяна, бызьылӥмы но мугормес ӝутъямы. Озьы ёрос вожвылъяськонын 2-тӥ инты басьтӥ. Соку вормись луиз Виктория. Но гурт хозяйствоя управлениысь специалистъёс кыкнамылы но элькун ӵошатсконъёсы пыриськыны ӵектӥзы, - вера Анна Лебедева.
Шумпотымон, Кузьымгурт фермаысь егит скал кыскись гужем Гурт шудонъёсысь куинетӥ интыен бертӥз.
Нош элькун ӵошатсконъёс сярысь нимысьтыз верано ке, аппаратэз кесян-бичан вожвылъяськонын нылкышно 4-тӥ инты басьтӥз, мугорзэ ӝуткаса, 2-тӥ интые потӥз, бызьылыса 11-тӥ вуиз.
Спортэн Анна школаын дышетскыкуз ик эшъяськиз, пыдын но, куасэн но бызьылӥз. Ассэ гиря ӝутъянын но (таиныз 1-тӥ разрядэз вань), армспортын но эскериз.
- Пинал дыръям элькун Гурт шудонъёсы пыриськи ни вал ке но али юн тулкымъяськи, соин ик вормисьёс радэ шедё шуыса, осконэ ӧй вал. Ог ар мон спортсменъёс пӧлын гиря ӝутканъя Можга ёрослэсь данзэ утьыны ветлӥ, соку вормонъёс ӧй басьты вал, - тодаз вае нылкышно.
Нош скал кыскисьёслэн элькун вожылъяськоназы вормисьёс пӧлы шедемезлы табере туж шумпотэ.
Анна Лебедева Можга ёросысь Ныша черкогуртын вордскемын. Та гуртысь ик школаез йылпумъяса, дышетсконзэ Можгалась 12 номеро училищеын азьланьтӥз, вуриськисьлэсь дипломзэ басьтӥз. Отӥяз вузкарисе дышетскиз на. Кӧня ке аръёс ӵоже пӧртэм магазинъёсын ужаз. Со вакытэ ик Кузьымгуртысь Петр Лебедевен тодматскиз, кузпалъяськизы. Огвакытэ егитъёс Ижын улӥзы, собере Лебедевъёслэн семьязы Кузьымгуртэ бертӥз. Нылкышно нырысь вузкарисьын ужаз, нош 6 ар талэсь азьло скал кыскисе кутскиз.
- Ферма уж мыным тодмотэм ӧй вал. Пичи дырысеным анаелы юрттӥськыны ветлылӥ. Соин ик кышкатэк басьтӥськи выль удыс борды. Уже кельше, эшъёсынымы огкылысь ужаськомы. Та вакытэ 8 кузя скал кыскисьёс лыдъяськиськомы. Эшшо кык нылкышноос вошъясьын тыршо, - вера нылкышно.
Скал кыскисьлэсь ужзэ капчи уд шу. Нырысь ик ӵукна вазь султонэз троссэ кышкатэ, угось дояркалы уж дуре котькинлэсь вазь дыртоно. Анна Лебедевалэн фермаын ужан нуналыз 5 час но 30 минут котырын кутске. Нош шонерзэ ке верано, со ӵукна 4 час бере султэ ни. Уже кошкемезлэсь азьло дорысьтыз но скалъёссэ кыскыса вуттоно уг ай. Но трос нылпиё анайлы со секыт ӧвӧл. Вазь султаны нылкышно дышемын.
Лебедев кузпалъёс 4 нылпи будэто. Соос но анай-атайзылы юрттӥськыны вуэмын ни. Гужем толэзьёсы ӵемысь бакчаязы ужало: урисько, ву кисьтало. Школаын но ӟеч дышетско. Нош 6-тӥ классэ выжем Рома анаез сямен спортэн эшъяське. Вормонъёсыныз анай-атайзэ шумпоттэ. Анналэн кузпалыз Петр но "Решительный" эштосысь одӥгез адӟем карымон механизатор. Со сяна, котьмалы киыз мынэ, техникаез но вала, кышноезлы юрттӥське, пудоосты сюдэ. Нош юрт котырзэс утялтыса, пиналъёсты чакласа возе анайзы, Антонида Сергеевна.
Лебедевъёс - тыршись адямиос, соос нокыӵе ужлэсь уг кышкало, трос пудо вордо, бакча емыш будэто. Котькытӥзы лач-лач но синмаськымон лэсьтэмын. Соос уж доразы но, юрт котыразы но дэмен чырс-пырс, мылысь-кыдысь тыршо.