Солэн укно ултӥз ортчисьёс нылкышнолэн чебересь, яркытэсь будосъёсыз шоры котьку синмаськыса учко. Соос калыкез вазь тулысысен бер сӥзьылозь шумпотто. Котькуд сяська ас интыяз но валаса мерттэмын. Кылсярысь, нырысь чурын, кенер вӧзын лапег будӥсьёсыз киземын, собере - шоро-куспоосыз, отӥяз - ӝужытъёсыз. Сяськаяськемзыя но соос висъясько. Котькудӥз ас дыраз аслэсьтыз чеберзэ усьтэ. Та вакытэ лилияос, бархатцыос сяськаясько, собере соосты астраос, георгинъёс воштозы, нош сальвиос гужем ӵоже яркытэнызы шумпотто. Бер сӥзьылозь вож буёлзэс кохияос кузьмало. Пӧлазы коркась поттыса мерттэмъёсыз но будо. Соос но мылкыдэз лӧпкыто.
Вань та чебересь сяськаос аспӧртэмлыко лэсьтэм укно улын будо. Азьло аръёсы соос ӝужыт профнастилэн котыртэм сьӧрын (корка азь но, юрт котыр но быдэсак профнастилэн котыртэмын угось) мерттэмын вал. Соин ик со сьӧрысь чеберез гуртоос ӧз адӟылэ. Алевтина Владимировна, тодмоосызлэн куремзыя, та чеберлыкез туэ капка азяз но, кенер кузяз но мерттоно кариськиз. Нош со будосъёсты курегъёс медаз изъянтэ шуыса, ваньзэ сое лапег корт сеткаен котыртӥз. Озьы аспӧртэмлыко бакча пӧрмиз. Табере турлы сяськаос, ненег куакъёс урамтӥ ортчисьёсыз котьку шумпотто. Выль укно улын чылкыт но шулдыр.
Нылкышнолэн сад бакчаяз но емышъёсыныз ӵош котыр сяськаос будо. Ас чеберенызы бордазы кыско, мылкыдэз ӝуто. Бакча кенер кузяз нылкышно палэзьпуос, бадьпуос мерттылӥз на.
Алевтина Владимировна будосъёссэ туэ трослы йылэтӥз, выль сорт сяськаос, куакъёс, лапег будӥсь писпуос мерттӥз. Но со вакытэ ик ужез но будӥз. Уката ик быдэс гужемзэ куазь кӧс улэмен, табере будосъёс вылэ одно ик ву кисьтано луэ.
Сотэк вань со чеберлык ӵужектоз, куасьмоз. Соин ик нылкышно уг аналскы, котькуд нунал мерттосъёсыз вылэ пуж-пуж ву кисьта.
- Одӥг нунал ке уд кисьтаськы, сюлэм шуг луыны кутске, собере сяськаосылэн куараоссы но пель сьӧрам кылӥськыны кутско кадь: "Ву, ву возьмаськом, милемлы секыт". Кызьы сыӵе дыръя соосты вутэк кельтод. Бызьыса потӥсько. Нош ӵукна султыку, кыӵе соос мылкыдэз ӝуто. Кудӥз ке но уй куспын быдэсак усьтӥськем, мукетъёсыз тани-тани усьтӥськыны дасясько. Зэмзэ вераса, сяськаос сюлэмез небӟыто, тазалык кузьмало, матысь эш луо, - вера Алевтина Владимировна.
Нылкышно бадӟым юртсэ огназ возе. Кузпалыз улонысь вазь кошкиз, нылпиосыз палэнын уло. Но пиез ваньмыкуз анаезлы ӵемысь юрттӥськыны вуылэ. Воргорон киостэк угось юртэз возьыны секыт.
Алевтина Ерофеева трос аръёссэ дышетон удыслы сӥзиз. Нош та вакытэ со Ӟатча санаторийын ужа. Сяськаосыз яратон мылкыд солэн пичи дырысеныз ик пыӵамын. Анаез котьку соосты укно дураз но, бакчаяз но мерттылӥз. Бадӟым будыса, Алевтина уката но сяськаослы синмаськиз. Табере соосты будэтон амалъёсыз вить чиньыез кадь тодэ. Соин ик арысь аре тунсыко сортъёс шедьтон сярысь сюлмаське. Сяська кидысъёссэ, узьымъёссэ ӵем дыръя тодмоосызлы но кузьма яке ог-огенызы вошъяськыны дэмла.
- Котькудӥз адями ӧжыт ке но котырмес чебер карыны сюлмаськиз ке, улонмы уката но шулдыр луоз, - мылкыдзэ усьтэ нылкышно.
Сяськаез яратӥсьёс, пе, ненегесь, лякытэсь луо. Алевтина Владимировна но ӵапак сыӵе сямыныз висъяське. Со котькуд адямиен небыт вераськоз, мусо гинэ пальпотоз. Нош сяськаос, будосъёс сярысь кылпум потӥз ке, со часэн-часэн но соос сярысь мадьыны быгатоз.
Нылкышно сяськаосын гинэ уг буйгатскы, со муш вордэ на, со сяна, шашы модослэсь пичи кудыос, вӧшъёс лэсьтылэ, сад горшокъёсты, пияла арбериосты чеберъя. Котькуд ужез кие кутымон, синмаськымон пӧрмемын.
А.В. Ерофеева арлыдызъя пинал ӧвӧл ни ке но, тэк пукон сярысь малпанэз чик ӧвӧл.
- Котькуд нунал ужамея ужаме потэ. Нош будэтэм емышед, лэсьтэм ужед шумпотон вае ке, соку эшшо но пиналмоно, бурдъяськоно, кужмо луоно, - шуэ Алевтина Владимировна.