Марафон улсын огазеяськонлэн куншетэз Элькунмылэн пӧртэм ёросъёсаз, каръёсаз, Башкир, Бигер, Пермь улосвылъёсы, Москвае вуылоз. Туннэ нуналлы со котыртӥз ини вань уйпал ёросъёсты но шоркармылэсь пӧртэм сэрегъёссэ.

Таяз арня вискын куншет вуылӥз Алнаш ёросэ но. 8‑тӥ шуркынмонэ удмурт движенилэн азьветлӥсьёсыз сое грахъёслэсь басьтӥзы. Бускельёсмы пумиськонлы рос-прос дасяськиллям. Алнашъёсты Вуж но Выль Эгра гуртъёслэн тунсыко интыосынызы тодматӥзы, дано но тодмо аспал эшъёссы сярысь веразы, чебер кырӟаменызы но задор эктэменызы шумпоттӥзы.

Кыкетӥ нуналаз алнашъёс бускель Агрыз ёросысь куноосты пумитазы. Cӥё-дано ужрад нырысь ортчиз Трофим Борисовлэн синпелетэз азьын. Татын вуэм куноосты пумитазы "Алнаш мылкыд" ансамбль но кенешчиос. Быдэстэмын вал "Удмурт Кенеш" огазеяськонлэн гимнэз.

Марафон азьланьтӥсь­киз Улын Асангуртын. Татын соосты шуныт пумитазы дышетӥсьёс, клубын ужасьёс но "Молодая гвардия" эштослэн кивалтӥсез Михаил Крылов. Куноос но кенешчиос синмаськизы эштослэн выль ӝутэм юртъёсызлы.

Куно каременызы паймытӥзы Байтэрек гуртын улӥсьёс но. Татысь дышетӥсьёс но пиналъёс шумпоттӥзы яркытэсь номеръёсынызы, "Точка роста" сярысь веразы, кудӥз школаын кык ар талэсь азьло усьтӥськиз, азинсконъёсынызы тодматӥзы. Озьы ик куноос вуылӥзы Байтэрек клубе. Татысь ӧнерчиос уго быдэс элькунын тодмо ӟеч ужаменызы но ӵектосъёсы пыриськеменызы. Нош "Ингерд" но "Инвожо" ансамбльёс кырӟаменызы лыктэмъёслэсь сюлэмъёссэс вырӟытӥзы.

Пумиськон йылпумъяськиз "Удмурт Кенеш"-лэсь куншетсэ Агрыз ёросысь лыктэм куноослы сётыса. Но та вакытэ со выльысь берыктӥськиз ини асьме элькунэ но ветлэ ёросысь ёросэ. Вань удмуртъёслэн "Удмурт Кенеш" огазеяськонзылэн тӧроезлэн Татьяна Ишматовалэн верамезъя, та марафон удмуртъёсыз огазеян, матэгес карон понна ортчытӥське. Озьы ик удмуртъёс тодазы мед возёзы соослэн "Удмурт Кенеш" огазеяськонзы вань шуыса, кудӥз туж кулэ луись трос юанъёсыз, ужпумъёсыз сэрттэ-­пертче, культурамес, кылмес, сям-йылолъёсмес утён но азинтон сярысь сюлмаське.

— Номыр шоры учкытэк, котькудӥз калык ассэ дунъяны но гажаны, ас кылыныз вераськыны мед быгатысал, — пусйиз Татьяна Витальевна.- Котькудмы данъяськыса мед вераломы Удмурт Элькунын улӥськом, удмурт музъем вылтӥ ветлӥськом, асьмемыз "Удмурт Кенеш" огазея шуыса.