(Илышыште вашлиялтше сўрет)

Чодырасе ир янлыкын кунамже айдеме деч ушанрак улмыж нерген, такшым, ончычат колалтын ыле. А илышыште лийше тиде случай ялт ӧрыктарен. Тудым мыланем ик палымем ойлен

- Ме кугу олаште иленна. Кажне кеҥежлан авана шӱжарем дене когыньнам шке шочмо ялышкыже намиен коден. Ола гыч поезд наҥгаен, вара икмыняр меҥгым электричкыште каенна, а кӱлеш станцийыште волен кодмеке, икмыняр километрым йолын ошкылынна. Станцийыште мемнам кажне гана коча вашлийын. Корно лишыл огыл, жапат утымеш, сандене тӱрлыжымат кутыркаленна. Воштылын, юарлен кайыме дене нойымымат шижын огынал. Южгунам транспорт лектын, тунам ялыш писынрак миен шуынна. Ме кеҥежым пӱртӱс лоҥгаште жапым пайдалын эртаренна, а кастене коча-кован илыш нерген каласкалымыштым шулен колыштынна. Шарнем, тудо кастене кочамын черетше ыле. Тудын ойлымыжым ме, йӱк лукде, умшам карен колыштынна.