- Пыр Иже ветлӥсько вал, туэ ӧй мыны, Глазове гинэ вуылӥ. Но татын ӧз яра, куинь кузя Свобода площадьын сылӥм но кошким. А Ижын праздникез ӟеч радъяло, построение ортче, концерт но возьмато.
Армие Николаез басьтӥзы Ижысен. Яр ёросысь Бозино гуртын будэм пияш школа бере Мотозаводэ ужаны интыяськиз вал. 1980-тӥ арын 28-тӥ апреле вуиз Ижысь призывной пунктэ. Соку ик тодмо луиз, службазэ подводной лодкаын нуоз шуыса.
- Удмуртиысь ми 180 адями мынӥмы. Владивостоке самолётэн лобимы. Сюресмы кузь луиз, Братске, Уссурийске пуксьылӥмы.
Частьын пиос барокамераын эскеронъёс пыр ортчизы на. Тазалыкезъя Николай службалы тупаз.
Гуртын будэм пияшлэн подводной лодка сярысь кылэмез но ӧй вал. Куать толэзь ӵоже учебной отрядын тодон-валанъёс, быгатонлыкъёс люкам бере, Приморск улосысь Ольгинский районысь Ракушка посёлоке шедиз, отын атомной подводной лодкаослэн базазы интыяськемын вал.
Служба вань служба, котькыӵе шуг-секытъёс пыр потоно луэ. Но кусыпъёс ласянь ке верано, керетонъёс ӧз потылэ, косэмъяськисьёс ӧй вал.
- Азьло мӧзмыт но, секыт но вал, но собере дышиськиз. Шуо ук, экипаж – одӥг семья, подводной лодкаын озьы ик вань. Дедовщина сярысь веранэз ик ӧвӧл, котькудӥз ас ужзэ тодэ, лэсьтэ. Ньыль пол нуналаз сиськылӥмы. Котьмар но вал - колбаса, чечы, чорыг, пӧртэм компотъёс, горд вина но сётъяллязы. Отын ик нянь пыжылӥзы, небыт, ческыт вал. Пызьзы бырылӥз ке, упаковкаосы тырем нянез сиылӥм ни. Ӵукна ӝук ӧз пӧзьтылэ, курегпуз, йӧлын чай юиськод но обедозь кӧт тыремын.
Николай Васильевич ӟеч кылъёсын гинэ тодаз вае командиръёссэ.
- Офицеръёсын каль но Интернет пыр гожъяськиськомы, праздникъёсын ог-огмес ӟечкыласькомы.
Куинь ар ортчыса, Николай Ушаков Иже бертӥз, геодезистэ кариськиз.
- Бозино гуртмы соку быремын ни вал, муми-айи Лозае кошкизы.
- Службадэс азинтыны мылкыдды ӧй-а вал?
- Кыльыны куро вал но, маке вордскем палъёсы но лыктэм кадь потӥз.
Ӝоген Николай Ушаков семья кылдытӥз, выжызэс Отогуртэ лэзизы. Трос аръёс ӵоже тыршиз гурт хозяйствоын механизатор, сварщик луыса, берло мукет удысъёсын но ужано луиз. Али Николай Васильевич пенсиын ни, но гуртаз уг пукы, ужа "Парзинский" возёсын, сварщиклэсь ужзэ быдэсъя.
Ушаковъёслэн пизы но армие ветлэмын.
- Кызьы армитэк, - шуэ воргорон. – Улонэз но адӟиське, визь но кӧня ке пыре.
Службазэс нуэмъёс, доразы бертэмъёс одно ик буре ваё бырем ожгарчиосты.
1980-тӥ арын 21-тӥ августэ К-122 подводной лодкаын тылпу потӥз, быризы 14 морякъёс. Ватӥзы соосты Павловский бухтае. Со интыосы, служить карыкуз, вуылӥз Николай Ушаков но. Берло тодӥз ни, быремъёс пӧлын Пусошурысь пияш Виктор Пономарёв вылэм шуыса.