4-тӥ южтолэзе элькунын пудо вордон удыслэн ортчем арын ужамезлы йылпумъянъёс лэсьтӥзы. Арлы йылпумъянъёс лэсьтӥз Удмуртиысь Кивалтэтлэн Тӧроезлэн воштӥсез - гурт возёсъя но сиён-юонъя министр Ольга Абрамова.
2020-тӥ арын Удмуртиын 870 сюрс 800 тонна йӧл кыскизы, азьвыл арен ӵошатыса, со 5,3 процентлы тросгес. Нош куинез возёсъёс Россиысь 100 устоосыз йӧл поттӥсьёс пӧлы шедизы.
- Удмуртиын пудо вордон удысын 11 сюрслэсь трос адями ужа. Пудо вордон удыс ялан будэ – азьвыл сямен ик ми Приволжск федерал округын но Россиын азьмынӥсьёс пӧлын, ваньзэ сямен валтӥсь сиён-юонъёсты поттӥськом, - шуиз Ольга Абрамова. - Кылем арын элькунын 46 сюрс 60 тонна парсь сӥль (2019-тӥ арлы 124 процент), 1 миллиард 89 миллион 800 сюрс (+0,6) курегпуз поттӥзы.
Берло дыре Гурт возёсъя министерство бадӟым саклык висъя муш, кеч но чорыг будэтон удысъёслы. Йӧло кечъёслэн уллёзы кылем арын кык поллы будӥз. Таяз арын кык бадӟым ферма усьтыны малпало.
2020-тӥ арын улосвылын 45 выль гидъёс пуктӥзы, соос пӧлын - вылӥ технологиосъя ужасьёссэ. Со элькунлэн историяз нырысьсэ уен-нуналэн йӧл поттонэ выжыны луонлык сётӥз.
2021-тӥ арын пудо вордӥсь- ёс азьын эшшо бадӟымгес ужпумъёс сыло, соос пӧлын - ар ӵоже 910 сюрс тонна йӧл кыскон. Туэ элькунын 50-лэсь трос выль но выльдэм пудо гидъёс усьтыны чаклало, кыксэ со пӧлысь уже кутӥзы ни.
Араз 10 сюрс килограммлэсь трос йӧл сётӥсь скалъёслэн лыдзы, 2019-тӥ арен ӵошатыса, 244 процентлы йылӥз.
Ужзы дунъямын
Пудо вордон удысысь 40 пала ужасьёслы Удмуртилэн Тӧроезлэсь таукаронъёссэ сётӥзы. Соос пӧлын скал кыскисьёс, зоотехникъёс, селекционеръёс, пудоез утялтӥсьёс, осеменаторъёс, чорыг, тылобурдо, вал, пӧйшур вордӥсьёс, фермаосын кивалтӥсьёс но гурт возёсъёслэн коллективъёссы.
Таукаронъёсын пусъемын Яр ёросысь "АгроАр" огазеяськонысь валтӥсь зоотехник Елена Фраилевна Семенова, Юкаменск ёросысь "Куркан" огазеяськонысь зоотехник-селекционер Снежана Васильевна Сысоева, Глазов ёросысь "Чура" эштосысь скал кыскись Светлана Ивановна Подсезерцева, "Пригородный" возёсысь искусственной осеменениея оператор Светлана Игоревна Шмелева.
Яр ёросын выль гид пуктозы
Яр ёросын туэ 3200 пудолы гид пуктыны чаклало. Со сярысь огкыл кутӥзы Элькунлэн Тӧроез Александр Бречалов но "Фалёнская межрайонная станция по травам" акционер огазеяськонлэн генеральной директорез Сергей Лобанов. Та предприятие ик инвесторез луоз.
Ӵектос Яр ёрослэсь экономиказэ ӝутыны кулэ. Комплекс 4 скал гидъёсты огазеялоз, котькудӥз 600 скаллы чакламын. Ӵектослы луыса, 100 ужан инты кылдоз. Уже кутозы 16 сюрс гектар муосты, соос пӧлысь 7 сюрсэз али аналтэмын ни.
Ӵектосэз улонэ пыӵатон вылысь элькун ласянь но юрттэт луоз – субсидиос висъяськозы.
Туспуктэм вылын: Пудо вордон удысысь 40 пала ужасьёслы Удмуртилэн Тӧроезлэсь таукаронъёссэ сётӥзы. Соос пӧлын "Чура" эштосысь скал кыскись Светлана Ивановна Подсезерцева но "Пригородный" возёсысь искусственной осеменениея оператор Светлана Игоревна Шмелева.