Йыг-йыг кирпич корка урамез шулдыртэ, гуртазы таӵе синмаськымон юртъеръёс ӧжыт ӧвӧл. Кузё кышно Валентина Витальевна ужатозяз колхозын тыршиз. Зоотехниклэн ужез -бадӟым кыл кутон, кӧня кужымзэ но мылкыдзэ сётӥз кышномурт оскем удыслы. Пенсие потыса но, тямыс ар ужам на. Дыр шедьтэ со нуныкаосызлы но, гуртысь ансамбльын но кырӟаны, спортъя но мукет ужрадъёсы пыриськыны.

Чупрес, мыло-кыдо кышномуртлэн корказ но ваньмыз синмаськымон радъямын. Урам пала учкись куиняз ик укноосын турлы буёло сяськаос сыло. Тросэз – орхидеяос.

- Нырысьсэ та сяськаез мыным юбилеям, 55 аресам, кузьмазы вал. Яраз: пыр сяськая но сяськая. Пумен-пумен вӧзаз мукетъёссэ ачим басьяны кутски, - вера Валентина Витальевна.

- Кызьы утялтыны кулэ та экзотика мае ке?

- Номыр сыӵезэ-таӵезэ уг кариськы, ачиз будэ-сяськая, - валэктэ со.

Озьы ке озьы, вылды, но тодмо ук: вань чеберзэ сяська возьматэ-усьтэ отын, кытын солы кельше. Кузёезлэсь мылкыдзэ шӧдэ.

Гажано лыдӟисьёсмы! Нош тӥ кыӵе сяськаосты яратӥськоды, кудъёссэ будэтӥськоды? Маин соос паймыто тӥледыз? Яратоно сяськаосыныды туспуктэмъёстэс келялэ милемлы но.