Машинаеныз шир-р-р гинэ парке пыриз, калыкез соку ик бордаз кыскиз. "Жигуль" вылаз олокыӵе арбериос но тыремын, гожъямын, тӧл шорын Россилэн флагез лопыръяське. Пумен машина дораз пуктӥз пулемёт, кудаз "Максим" гожтэмын, футболэн тупъёс, шлемъёс, вашкала телефон, самовар… Дӥськутэз но воргорон вылын арбериосыз пӧлысь ик. Лыктэм калык со доры одно ик дугдылӥз, туспуктэмъёс лэсьтылӥз.
Александр Дворецкий – коллекционер. Ассэ "Мальчиш-Кибальчиш" шуэ. Люка ваньзэ, мар Совето Союзлэн историеныз герӟаськемын. Али коллекцияз 40 сюрс котыр экспонатъёс ни. Маиз гинэ отын ӧвӧл! Спичка коробкаосысен, бирдыосысен кутскыса техникаозь: 30 котыр велосипедэз, дасо мотоциклъёсыз, машинаосыз - "запорожецъёс", москвичъёс, "Победа", ЗиЛ-157, вань 1956-тӥ арын поттэм ГАЗ-51 грузовикез но. Тросаз ужрадъёсы но ӵем соин ветлэ. Музеяз вань архивной документъёс, гожтэтъёс, туспуктэмъёс но.
- Мае ке калык вае, мае ке жуг-жаг пӧлысь шедьтӥсько, - шуэ воргорон. – Техникаез коньдонэн басьтӥсько, выльдӥсько. Монэ котькытын но тодо, быдэс Россиысь музейме учкыны лыкто, - лек куараен, киосыныз ик шонаськыса мачке со. – Нош тон кыӵе газетысь? "Жёлтой прессаысь" ке, уг но вераськы.
- Мон удмурт газетысь.
- Иське, бадӟым тау вера администрацидылы, таӵе ужрадэ монэ лэзизы шуыса, толон "Трактор биатлонэ" но вуылӥ. Мынам нимысьтыз музей усьтэме потэ, нош мыным инты уг висъяло. Кӧня пол Ижысь кузёослы вазиськылӥ ни, Путинлы но гожтӥ. Мон ведь ӟеч уж лэсьтӥсько, пиналъёс, егитъёс историзэс тодыны кулэ, патриотизм мылкыд пыӵатонын мон юрттысал. Но кудӥз монэ шузи шуыса лыдъяло. А мон номыр но уродзэ уг лэсьтӥськы, ваньмызлэсь мылкыдзэс ӝутӥсько.
Куинетӥ арзэ Александр Дворецкий улэ ни Патраки гуртын, отчы 50 сотка музъем басьтэм, отчы ик ваньмыз арбериосыз выжиллям.
Воргоронлы 65 арес, коллекциезлы кутскон понэмын вал 1980-тӥ аръёсы. Соку солы кин ке 1918-тӥ арын поттэм 1000-лыко кредит билет сётэм. Со дырысен пӧртэм арбериос люкаськыны кутскизы.
Вордскемын воргорон Красноярск улосын. Атаез, войнаез ортчем ожгарчи, улонысь вазь кошкем, будэм анаеныз. Тямыс класс бере пияш токаре дышетскем. Армиын Врангельлэн шормуӵаз служить карем. Собере Ижын электромеханической заводын токарь луыса ужам, "туж ӟеч токарь" шуэ, Данъян пул вылын но вал.
Тамак уг кыскы, вина уг юы, пыр спортэн эшъяськылэм, соин трос спортэн герӟаськем арбериосыз.
- Тани та гитараям вань ӵыжы-выжыосы гожъямын, - возьматэ воргорон. – Кышное, солэн анай-атаез, пиналъёсы, внукъёсы. Та историе кылёз ни.