Нимыз улэ
Пичипурга пи, дышетӥсь но самодеятельной композитор Геннадий Матвеев, Глазов палъёсы вуыса, лулысь-сюлмысь басьтӥськиз хоръёс кылдытон борды. Собыдӟа ужез ӝутыса, кӧня кужымзэ но мылкыдзэ сётӥз! Качкашурысь хор тани 60 арзэ ини улэ-кырӟа, ӟеч мылкыд кузьма, кылдытӥсезлэсь кырӟанъёссэ нош но нош сцена вылэ поттэ.
Г. Н. Матвеев кивалтон вакыт хор, элькунын гинэ ӧвӧл, огъяросси радын ассэ устоен возьматӥз, вылӥ вормонъёс басьтӥз. Москваын но выступать кариз. Нош удмурт телевидение со сярысь "Поёт народ" фильм дасяз, кудзэ качкашуръёс али но туж яратыса учко.
Эшшо но усто
12 ар кивалтэмез бере Геннадий Николаевич коллективзэ оскымон киосы кельтӥз. 1979-тӥ аре хорен кивалтонэз вылаз басьтэ карысь тодмо крезьчи Михаил Чикуров. Кызь ар ӵоже, жадёнэз тодытэк, со ветлэ Глазовысь Качкашуре – яратоно хореныз ужаны.
- Капчи ӧй вал Матвеев бере кутскыны, соин сётэм планкаез возьыны но азьланьтыны. Нырысь-валысь шуггес йӧтӥз удмурт кылэз тодымтэеным но. Дышетӥсьёс, хорын кырӟасьёс, удмурт кырӟанъёслэсь пуштроссэс усьтыны юрттылӥзы. Но берло мае ке-мае ке ачим но валаны кутски ни, - тодаз вае со, хорлэн юбилей концертаз вуылыкуз.
Котькуд кырӟан, котькуд номер бордын Михаил Филиппович пыр-поч ужалляз. Сыӵе сямо адями со: мар ке лэсьтоно ке – усто мед луоз, нош вуоноез ужез – эшшо на ӟечгес. Сыӵе мылкыдыз кырӟасьёслы но пыӵаз. Одӥг тулкымын луэмзы-тыршемзы ик Всесоюзной смотръёсын куинь пол вормонэн шумпоттӥз. Нош кӧня соос элькун но зонаосъя вожвылъяськонъёсын басьтэмын!
- Качкашурысь хорен ужам дыръёсты ӵем тодам вайылӥсько. Туж потэ вал хорлэсь вань быгатонлыксэ, вань чеберлыксэ усьтэме – арысь аре со эшшо устогес мед чузъяськоз. Кӧня шумпотон, данъяськон со пыртӥз творческой улонам. Ваньзылы туж бадӟым тау карисько, - шуэ со, трос аръёс ортчыса но.
Лӧптыса мынылӥ кырӟаны
Хорлэн улоназ-азинсконаз кивалтӥсез, валамон, бадӟым инты басьтэ, но тросэз потэ коллектив, отын кырӟасьёс бордысь но. Кылем даурысь 60-70-тӥ аръёсы ог 60 адями кырӟаз, куинь-ньыль радэн султылӥзы соос, сцена вылэ потакузы. Сомында калыкез люканы, кырӟаны ӝутканы быгатылӥз Качкашурысь клублэн кивалтӥсез Людмила Салтыкова. Коркась корка ветлылӥз, котькудӥзлы нимаз саклык висъялляз шуыса, ӵем верало та сюлмо кышномурт сярысь. "Сотэк нокыӵе вормонъёсмы ӧй луысалзы", - пусъе М. Ф. Чикуров но.
Нырысьёсыз кырӟасьёс пӧлысь туннэ хорын нокин ӧвӧл ни, арлыдзыя но соос кемалась шутэтскыны вуэмын. Тани Галина Ворончихина, сое "Поёт народ" фильмысь но тодмало. Сузэрез Юлия Ашихмина хорен ӧжыт берлогес эшъяськиз, со туннэ но отын. Кырӟам гинэ ӧвӧл, сцена вылын поръя, шуыны луэ. Хорез номырин ӧз воштэ Светлана Балтачева, Марьям Горбушина но.
1972-тӥ арысен (50 ар пала!) люконтэм луизы кык нимъёс: хор но Валентин Наговицын. Ас вакытаз со Надежда кузпалыныз ӵош ветлӥз. Сыӵе паръёс ӧжыт ӧй вал: Галина но Борис Князевъёс, Зинаида но Анатолий Ворончихинъёс, Фаина но Борис Князевъёс, Светлана но Николай Балтачевъёс, Валентина но Валентин Кубасовъёс.
1985-тӥ аре Качкашур школае лыктӥз удмурт кылъя но литературая егит дышетӥсь Ольга Елькина. Вордскем палъёсызлэсь палэнын гуртысь хор сюлэмзэ бурдъясен, улонзэ югдытӥсен луиз.
- Качкашуре лыктэм берам, чылкак паймемын вал: вань дышетӥсьёс хоре ветло, тодӥ на – колхоз специалистъёс но, пе, озьы ик. Мон но мынӥ. Но нырысь секыт вал, уга отын куараосъя кырӟало, ваньзы ас интыязы пуктэмын. Нош мон туж яратӥ ке но кырӟаны – ас быгатэмея, пӧрмытэмея кырӟалляй. Но ар-кык ортчыса, кивалтӥсьмы Чикуров мыным соло но кырӟаны оскылӥз ни, - тодаз вае со. – Хоре арняяз кык пол люкаськылӥмы. Лӧптыса мынылӥ мон отчы. Нуназе – школаын, ӝытазе – хорын, уйъёсы – киужен. Сыӵе вакытэ вал – котьмалы но тырмиз мылкыды. Али малпасько: кырӟаме озьы монэ бурдъялляз.
Хорын будэм кизили
Качкашурлэн одӥгез данъяськымон пиез – Удмуртиысь но Россиысь сӥё-дано артист Михаил Ворончихин. Кин уг тоды сое удмурт шаерын! Ог 30 ар пала, пенсие потытозяз ик, со кырӟаз фольклор кырӟанъя но эктонъя "Айкай" театрын. Нош бадӟым искусствое сюрес усьтӥз солы Матвеевлэн хорез. Отын со ӝужаз, быгатонлык люказ, куаразэ юнматӥз. Хорын кырӟаны кутскыкуз, вуоно артист школаын дышетске на вал. "Поёт народ" фильмын со пыр син азьын, азьпал радъёсын.
Г. Н. Матвеевлэн сӥземезъя, огшоры гуртысь крестьян семьяысь пи калыке потӥз, бадӟым сценаозь вуиз. Артистэн пумиськонъёс дыръя, Михаил Тимофеевич котьку но шуныт кылъёсын тодаз вае хорез, солэсь кивалтӥсьсэ, вордскем палъёссэ. Сыӵе дыръя вератэк уг кельты колхоз председательзэс Иван Егорович Ившинэз но. Колхоз азинлыко ужаз, трос егитъёс тыршизы. Нош куке вуж клубын ёркыт ни луиз, хорлы сцена вылын инты ӧз ни окмы, ӵапак та адями выль клуб пуктон борды кутскиз.
Вакытъёсты но калыкез огазеясь
Дано дырпуссэ пусъёнэн валче хор учкисьёссэ люказ: Качкашурысь лулчеберетъя юртын шулдыр концерт ортчиз. Уно шуныт ӟечкыланъёс но сӥзёнъёс ӝытбыт чузъяськизы.
- Вакытъёсты, калыкез огазеяса, хор улонтӥ вамыштэ. Макем юн кужым, бадӟым мылкыд но чебер сюрес сӥзем крезьгурчи Геннадий Николаевич Матвеев коллективезлы! - пусъе ёросысь лулчеберет удысэн кивалтӥсь Евгений Баженов.
Дасо аръёслэсь ятыр ни хорен кивалтэ Александр Клячин. Егит ӧнерчиен со вуиз Качкашурысь лулчеберетъя юртэ, кузётэк кылем хорез солы оскизы. Ӧжыт дӥсьтытэк но кутскиз вал та бадӟым уж борды. Кема но ӧз ортчы, кивалтон биньгозыосты со пумен-пумен юнгес кырмиз, калыкен огкыл шедьтӥз. Хорлэсь аръёсын люкам быгатонлыксэ но ӟеч сямъёссэ со утьыны но азинтыны, коллективзэ туала дырен огвамыш нуыны тырше.
Конкурсъёсын но фестивальёсын басьтэм данъетъёсын шыкысэз хорлэн арысь аре узырме. Вылӥ нимзэ кема аръёс на мед нуоз – Качкашурез, ёросэз, удмурт шаермес данъяса!