Удмуртиысь Гурт удысъя министерство Сосновскийлэн борщевикеныз нюръяськыны 5 миллион манет уксё висъялоз. Жаг турынэз быдтон понна элькун бюджетысь коньдон нырысьсэ сётозы.
Юрттэтэз басьтон понна ёросъёслэн борщевикез быдтонъя муниципал программазы, жаг турынэн басьтэм интыос сярысь ивортонэз Удмуртилэн цифровой картаяз пыртэмын, асьсэлэн ватсаны коньдонзы луыны кулэ. Ужъёсты муниципалитетлэн музъемъёсыз вылын гинэ быдэстыны яра.
Али борщевик элькунысь 7 сюрс гектарлэсь трос музъемъёс вылын вӧл-вӧл будэ. Нырысь ик, уже кутыны ярантэм интыосын – сюресъёс но сикъёс дурын, нюкъёсын, ярдуръёсын. Но вакчи дыр ӵоже со бадӟым музъемъёс вылэ вӧлмыны быгатэ.
Сосновскийлэн борщевикеныз нюръяськонъя программа Удмуртиын 2019-тӥ арысен улонэ пыӵатӥське. Но бюджетысь уксё висъямтэен, 10-лэсь ӧжытэз гинэ ёросъёс ужзэс радъяны быгатӥзы.
Кык арскын борщевиклэсь 1 сюрс 630 гектарез мозмытӥзы.
Со дыре ик элькунын та ужез нуыны быгатӥсь компаниос вань. Муниципал контрактъёсъя соос Пермь шаерын, Москва, Ленинград но мукет улосвылъёсын ужазы. Соос борщевикен нюръяськонын пӧртэм ласянь юрттыны быгато – гербицидъёсты быръён бордысен тазатон ужез нуытозь.