- Буш интыын со ӧз кылды, сюрес лёгемын ни вал, шуыны луэ. Нош тыршиз со бордын гуртомы, ужбергатӥсь Сергей Афанасьевич Кытманов. Ог дасо аръёс талэсь азьло, куке внукез тямысэтӥ гимназиын дышетске вал, пиналъёслы куасэн бызьылыны сюрес усьтӥз. Снегоходэз вань бере, сое лёгыса возиз ни. Тӥни озьы, куас сюреслы синмаськизы гуртоос но, карын улӥсьёс но. Та сюреслы ик матын Солдат гурезьмы вань, отын калык шутэтскыны яратэ: картошка пыжо, шашлык лэсьто, шудо-бызьыло, - вера Светлана Захарова, Тазалыко сюрес усьтон бордын тыршись кичӧлтӥсь группалэн азьветлӥсез.
Светлана Николаевна – Глазов ёросын тодмо адями: культураысь ветеран, тазалыко улонэн эшъяськись, ёросысь ветеранъёслэн кенешсылэн кивалтӥсьсы. 2019-тӥ арын, "ДондыДор: малая культурная мозаика" ӵектосъёслы конкурс сярысь тодыса, гурт сьӧрысь куас сюресэз паськытаны но благоустроить карыны мылкыдын бурдъяськем:
- Соку ик жингыртӥ Кытмановлы, со малпанме ӟечен лыдъяз, юрттыны дась луэмзэ вераз. Озьы, "Тропа здоровья: от лыжни до скандинавской ходьбы" ӵектосмы кылдӥз, конкурс пыр потыса, уксё кыскыны быгатӥмы.
Калык ӝутскиз
Инициативной группа, кытчы пыриськизы Светлана Захарова, Сергей Кытманов, Фаина Шуклина, Александр Булдаков, Наталья Ассылова, Виталий Поторочин, ньыль пӧртэм маршрутъёс пусъе: пиналэзлы но, арлыдоезлы но ортчымон, мылкыдызъя бырйымон. Тазалыко сюрес улсы пыриз Солдат гурезь но. Сое ваньзэ, нырысь ик, чылкытатыны кулэ вал.
- Висъям уксёез шуркынмон толэзьлэн пумозяз уже кутоно вал, дыр ӧжыт кылемын. Мер вотэсъёс пыр, пельысь – пеле, ялонъёс ошылыса – калыклы субботникъёсы ӧтьыса вазиськимы. Кылӥзы, ӝутскизы ведь! Кӧня субботникъёс ми ортчытӥмы! Со вал тужгес кулэез – калыклэн валамез, огъя тыршемез, - шуэ Светлана Николаевна.
Нош кӧня жуг-жаг поттэмын – кылъёсын уд но вера, адӟыса гинэ оскод. Соин, Тазалыко сюреслэн кутсконаз юнматэм баннерын, маршрутъёсын карта суредам сяна, лыктэмъёслы вазиськон но гожтӥзы: кызьы астэ возёно, кыӵе куронъёсты эскероно.
Собыдӟа ужез берыктэмзы бере, 30-тӥ шуркынмонэ Тазалыко сюресэз усьтон радъязы. Нырысетӥ стартэ потӥзы скандинав амалэн ветлыны яратӥсьёс.
Семьяосын лыкто
Ар но ӧз ортчы, валамон луиз: инты ӧжыт, ёркытгес. Солдат гурезьын шутэтскон инты но ваньмызлы ӧз ни тырмылы, татын ик ӵемысь ёрос ужрадъёс но радъяськылӥзы. Соку юрттыны мылкыд кариз гурт администрация. Кылем аре, "Лучшие муниципалььные проекты УР" конкурсэ пыриськыса, 250 сюрс манет грант утӥз. Солы луыса, Тазалыко сюрес эшшо тунсыко но синмаськымон пӧрмиз. Табере старт но финиш нимысьтыз гожтэмен пусъемын, озьы ик сюрес кузяна мукет кулэ знакъёс инъямын. Скандинав амалэн ар ӵоже ветло бере, сюресэз грейдировать каризы.
Грант уксёлы шутэтскон интыос усьтӥзы на. Семьяослэн яратоно интызы – куинетӥ маршрутысь паськыт нюк, отын тюбингъёсын нискыланы усто, кышкыт но ӧвӧл. Сюлмысь нискылам бере ялкарыны но нимысьтыз интыез вань ни.
Тазалыко сюрессэс тросэз кутско тылобурдо столовой бордысен. Одӥг липет улын кӧня ке кормушкаос лэсьтэмын, бурдоос сое асьсэлэн каризы ни. Татчы дырто Захаровъёс но, пичи внучказэс сьӧразы куто. Пиналлэн лӧптэм мылкыдыз кузпалъёслэсь но сюлэмъёссэс шумпоттэ.
Майбыр!
Тазалыко сюрес вылэ одӥг нунал но потатэк уг кельто Фаина Бабинцева, Алевтина Невоструева, Галина Чупина, Галина Огорельцева. Пенсие потэм нылкышноослы кельше скандинав амалэн ветлыса юмшаны. Нош Возмищев, Булдаков, Кытманов, Главатских кузпалъёс толбыт татӥ куасэн ветло.
- Та сюресмы мылкыдэз лӧпкытэ. Ми Фая эшеным нуналаз ог кык час котыр татын ортчытӥськом. Калык котьку трос луэ - со сюлэмме юн шумпоттэ, - усьтэ мылкыдзэ Светлана Захарова.
Эшез Фаина Веретенникова шагомерен ветлэ, лумбыт сое уг куштылы: куке - 9 сюрс, куке -15 сюрс вамыш возьматэ. Ӧнерчиос верамъя, адями, пе, нуналаз ог 10 сюрс вамыш лэсьтыны кулэ, соку тазалыкедлы но ӟеч лэсьтод. 7-тӥ оштолэзе, ку Тазалыклэсь нуналзэ пусйиськомы, кӧня ке арзэ ини Россиын "10000 шагов к жизни" акция ортчылэ. Штанигурт нылкышноосты но со радэ пыртыны луэ. Озьы ик троссэ мукетъёссэ но, кин пыдын ветлонэз гажа, тазалыко улонэн эшъяське.
- Туэ та сюресмес лемтэйёслэсь но обработать карозы, грант уксёез висъязы. Озьы, тулыс-гужем но кышканэз уз луы. Та сюрес кытчы но уг вутты! Тани ӝоген пестонька дуре потомы. Сэре губи но вуоз. Гужем – узы-борылы дыртӥськомы. Ӟеч мылкыд кузьмам сяна, сюдэ но та милемыз, - веранэз уг быры Светлана Николаевналэн.