1976-тӥ арын Николай Поздеев "Новый труд" колхозэ интыяськиз. Быдэстылӥз пӧртэм ужъёсты. Армиысь бертэм бераз гурт удысъя управление егит пиез Сарапулысь совхоз-техникуме агрономе дышетскыны ыстӥз.

Хозяйствоын соку агрономзы вал, соин ӧнерчи азьло парсь гидын тыршиз, собере Кушманэ бригадире пуктӥзы. Кык арлэсь кема со Озёркаысь Кушманэ ветлӥз, ӵемгес гусеничной тракторен.

Собере гинэ дышетскемезъя ужаны кутскиз. Воргорон тодаз вае, тужгес но трос урожай 1986-тӥ арын басьтӥзы шуыса. Тысен тырмытэмын вал складъёс, инты ӧвӧлэн киськазы гараже, Чабыровоысь гуэ. Тужгес но урод ю тысь удалтӥз 2016-тӥ арын.

Кызьы вера агроном, Озёрка котырын музъем начар, трос кӧльыез, изъёс, агротехникая куронъёсты быдэстыса но куазь сётэмен гинэ гектарысьтыз 20 центнер котыр басьтыны луоз. Но озьы уг пӧрмы: я удобрение басьтыны, я химпрополка ортчытыны луонлыкъёс уг луо, я бусыос ву пӧлы выё, я киземъёсты пӧсь шунды куасьтэ.

Ӟеч урожай басьтон понна агроном арлэн котькуд вакытаз шутэтсконэз тодытэк тырше: вылӥ ӟечлыко кидыс дасян, будосъёсты нымы-кибылэсь но жуг-жаглэсь утён сярысь сюлмаське, механизаторъёсын дышетонъёс ортчытъя.

Нош лудъёс вылтӥ саженен кӧня вамышъяно, кизем - ужам бусыосты лыдъяса-чотаса.

Шуг-секытъёс шоры учкытэк, "Озёрки плюс" огазеяськон ю тысь дася. Агрономлэн Николай Анатольевичлэн тыршемез син азьын. Со ужзэ котьку но рос-прос быдэстэ, гуртоосыз, ӵош ужась эшъёсыз воргоронэз гажало.

Мыло-кыдо тыршемез 2019-тӥ арын Росси Федерациысь Гурт удысъя министерстволэн Таукаронэныз пусъемын.