Чураос гижысь-пиньысь ужало, гырем-кизем бусыос синэз шумпотто. Музъемъёссы хозяйствоын ӧжыт ӧвӧл – огъя валысь 4 сюрс гектарлэсь ятыр: Юкаменск ёросысь Балы гурт дорысен кутскыса, Штанигуртозь ик кыстӥсько. Куиньмос люкетэзлэсь ятыргес висъямын зерно-бобовой культураос улэ, со сяна кукуруза но рапс будэто на.
- Милям одӥг метрез но уже кутымтэез музъеммы ӧвӧл. Семеноводческой хозяйство чотын ужаськом ке но, кидысмес сокем ик трос ум вузаське, асьме поннагес тыршиськом. Азьвыл аръёсы кукуруза 200 гектар вылэ кизьылӥмы, туэ 300-озь вуттыны малпаськом. Одӥг культура но сомында вож масса уг сёты, кӧня кукуруза. Зоотехникъёс тросгес куро, йӧл ӟеч потэ, шуо, - вера валтӥсь агроном Роман Ушаков.
Диспетчерскойын вераськон куспамы Роман Валерьевич карысь "Савояры" кафее жингыртыса вуттӥз ни: бусыын ужасьёслы ӝытлы пӧсь сиён заказать кариз. Отысь ик, пе, обед но басьтӥськомы, дунтэк сюдӥськомы.
Бусые чураос 26-тӥ оштолэзе потӥллям. Гырон но трос аръем турынъёсты сылало ватсэтъёсын "сюдонысен" кутскиллям. Бусыосын кузёяське Версатайл трактор. Со ӵыж-выль, кужымезъя та техника куинь корт валэз воштэ. Руль сьӧраз пуке Сергей Леонтьев. Сое кабинаысьтыз адӟыны, йырез сьӧрлань карытэк уг луы – инбаме меӵак учкем кадь ик. Кызьы валэктӥз, Версатайл 22 метръем пинё усыез нуллэ. Таӵе кужмо тракторзы эштосын эшшо одӥг вань на, соиз но Леонтьевлы оскемын. Сергей но Андрей Леонтьев вынъёс - котыр ласянь адӟем карымон ужасьёс.
Оштолэзьлэн берпуметӥ нуналъёсысеныз тракторъёс зябь вылын тыршо. Нош 5-тӥ мае ини "Чура" кизён ужъёсты мытӥз.
- Бусы ужъёс ужрадлык пуктэмъя огсыр мыно. Техника гинэ медаз тӥяськы. Эшшо на туж кулэез – куазь: сётӥз ке, кизёнэз сизьым-дас нунал куспын быдэстомы, - шуэ валтӥсь агроном.
Ӟеч урожай басьтон вылысь ужано ке, саклык висъятэк уг луы сылало ватсэтъёслы.
- Шорлыдын вераса, гектарлы быдэ 45 кило удобрение поттомы. Удысысь ӧнерчиос но тодосчиос верало: котькуд гектар музъеме ӧжытсэ 50 кило удобрение поттоно. Та лыдпусозь ми но кыстӥськыны выриськомы, арысь аре та схемая ужаськом, - валэктэ Роман Валерьевич. – Кылем аре урожаймы ӟеч вал – гектарысь 26 центнер, туэ планъя – 27, но 30-озь вуттыны сюлмаськоно. Нош малпамъя мед луоз шуыса, али дыраз кизёнэз йылпумъяно.
- Посевноез дыраз но кулэезъя быдэстон понна милям ваньмыз вань, - вакчияк вераз эштослэн кивалтӥсез Елена Егорова.
Кизисьёсын ми пумиськимы Яша сьӧрысь бусыын, озьы, пе, сое калыкын нимало. Ачиз валтӥсь агроном тросгес дырзэ гыроно лудъёсын ортчытэ ке, кизёно бусыосын кузёяське Владимир Ефремов.
Туэ нырысьсэ "Чура"-ын уже куто Джондир американской сеялкаосты.
- Азьвылъёсыз, советскойёсыз, кадесьгес ик соос, но раскладноесь. Вужъёсызлэсь но чылкак ум куштӥськиське – запасын сыло. Кулэ луиз ке, соосты но поттомы, - валэктэ агроном.
Тани огдырлы гинэ тракторзэ дугдытэм Алексей Сырчин, бушам сеялказэ сезьыен тырмыто. Ӧжыт палэнын бусыосты трактореныз котыръя Владимир Дитятьев. Кыксы ик воргоронъёс бадӟым опытэн, оскымонэсь ужасьёс. Туж вакчи дыр куспын но Алексей Сырчин одно ик вуоз серемез поттыны, сыӵе ини сямыз.
Кизисьёс радысь тужгес кема ужасез луэ Николай Федотов. Со пенсиын ни, но ужам потэ на, шуэ.
- Ужъёс мыно, куазь ӟеч тупаз. Ужа но ужа гинэ, - мылкыдзэ усьтэ со.
Николай Васильевич КамАЗ-эн ю тысь ворттэ. Тани тыро сеялкаосын трактор куинь пол котырскоз но берен тыриськыны вуоз. Музъемъёс татын умоесь, тракторъёс капчиен ветло, шуэ.
Арлыдо ужасьёсын артэ тыршо егитъёс но. Умой, соослы вань кинлэсь адӟем карыны. "Чура"-ын та вакыт Глазовысь технической колледжысь кык студентъёс ужало. Илья Яковлев сеялка сьӧрын ветлэ, нош Костя Желудков машинаен тысь ворттэ. Пудем пияшлы пинал дырысеныз техникаен турскон сюлэмызъя, пе. Вуоно механик али практикаез ортче, колледжез туэ йылпумъя ни. Ужаны та эштосэ лыкто, шуэ.