Куке-соку гуртэз неперспективной шуизы. Нош гурт быронлы ӧз сётскы. Егитъёс чебересь коркаос пуктӥзы, сюрес лэсьтӥзы, али туж чебер интые выль ФАП ӝутӥллям ини. Гуртын 18 нылпиос – со гинэ но юн шумпотымон!

Люк прудэз потэм бере ик, кузь сюрес нуэ вырйылэ. Кыдёке адскон интыын пуксемын Борисгуртмы. Гурт пала вуыку, сюлэм йыггетыны кутске, йыре лыкто чебересь малпанъёс, син азе пуксё гольык пыдын бызьылэм ульчаос. Кинлэн татын вордскем коркаез, уло мумы-бубыосыз, кинлэн та гуртын ортчиз егит дырыз, коркаез ӧвӧл ни, нош местаяз будо сяськаясь сиреньёс, ӵашето мерттэм льӧмпуос, палэзьпуос.

Гурт пуме вуим но, малпаськонъёсысь "потоно" луиз. Сурзэс веръятэк, куарняньзэс но перепечсэс шӧмъятэк, гурт ульчае пырыны уг лэзё – сыӵе ини удмурт калыкмылэн сямыз-йылолэз! Собере – пумтэм-йылтэм ӟыгыръяськон. Тодмо калыкез адӟыса, синву потэ, шумпотон сюлэмэз бугыртэ. Арган шудэмъя, калык кырӟа, эктэ!

Борисгуртъёс шукырес дасяськиллям: ульчазы быдэсак чебермамын, сцена юн учкымон, туж трос ӝӧкъёс но скамьяос – вань коркаосысь поттылӥллям, кожалод. Пиналъёслы пуктэмын ӟечыранъёс, батутъёс, ӝӧквыл тыр сиён-юон.

Улӥсьёс утьыса возё Коршуновской школалэсь историзэ, солы быдэсак альбом сӥземын. Тодэ вайытӥзы дышетӥсьёсты, ӧз вунэтэ оже бырем калыкез но. Сопал дуннее кошкем улӥсьёсты буре вайыса, одӥг минут чал-чал сылӥмы. Корка радъя лэсьтӥзы "перекличка": Олексанъёс, Макаръёс, Кодельёс, Апполосъёс… Ӵыжы-выжыоссы куараоссэс сётӥзы.

Ческыт ӝукен сюдӥзы, сое пӧраллям егит пиос: Гриша Морщанский, Игорь Русских но Володя Наговицын. Сцена вылын ялан чузъяськизы праздникез радъясь артистъёслэн чебересь кырӟанъёссы, шулдыресь куараоссы. Кошкон азьпал ваньмыз лыктэм гуртоос васькизы туж чебер утялтэм ошмес доры, ческыт вузэ тросэз бӧрсязы басьтӥзы. Ошмессы чебер мед луоз шуыса, пиналъёс карьерысь шальы вортӥллям, кышноос сяська мерттӥллям.

Музъемозь йыбырттӥсько Борисгуртысь лякыт сямо калыклы. Семьяосазы, коркаосазы вань ӟечез но шулдырез гинэ мед пыроз!