Уйпал ёросъёсысь командаослэн сокем ик ушъяськемзы уг луы, но чемпионъёс но призёръёс вань.

Балезино ёрос. 3 иськеме бызьылонын Наталья Корепанова ваньзэсты азьпалтӥз но командалэн шыкысаз зарни медаль ваиз, со ик 1,5 иськемын – туй медаль. Озьы ик туй медальлы йылтӥзы пиослэн волейбол командазы. Теннисэн шудӥсьёссы – гурт шудонъёслэн трос полэс чемпионъёссы но призёръёссы, но туэ вормисьёс радэ потыны ӧз удалты - 4-тӥ инты гинэ.

Глазов ёрос

Кужмоез бызьылӥсез Анастасия Урсегова, жаляса верано, призёръёс радэ ӧжыт гинэ ӧз шедьы. Котьма ке но, трос баллъёс ваиз командалы 3 но 1,5 иськемъёсы бызьылонын.

Семьяен ӵошатскизы Семакинъёс: эстафетаын котькинлэсь ӟеч пӧрмытӥзы, но огъя зачётъя вормисьёс радэ ӧз потэ, 6-тӥ инты басьтӥзы. Оскиськом, вылӥ вормонъёссы соослэн азьпалан: пизы будэ – быгатонлыкъёссэ юнматэ.

"Октябрьский" эштосысь механизатор Денис Журавлёв но "Коротай" СПК-ысь агроном Людмила Погорелкина гурт шудонъёсын нырысьсэ вожвылъяськизы. Соос асьсэды возьматӥзы механизаторъёслэн ӵошатсконъёсазы.

Скал кыскисьёслэн но турнасьёслэн троеборьезы сямен ик, таӵе вожвылъяськонъёс шудонъёслэн программаязы туэ нырысьсэ пыртэмын вал. Денис но Людмила тракторен ужаны быгатэмзэс возьматӥзы, суй кужымзэс мертазы но бызьылӥзы. Огъя люкам очкооссыя азвесь медальёс басьтӥзы.

Красногорск

Ёрослы зарни ваиз Анна Вершинина, со дуатлонын (великен но пыдын бызьылыса ӵошатсконъёсын) вормиз. Армспортын азвесь медален шумпоттӥз Ольга Чернышова. Кивалтӥсьёс пӧлын шальыен шудонын красногорскъёс нырысетӥосыз луизы, но командалэн огъя зачётэзъя вормисе потыны ӧз удалты.

Юкаменск

Ёросысь полиатлонистъёс вылӥ данзэс арысь аре уг уськыто, соосты нокин вормыны уг быгаты. Озьы ик котькинлэсь усто шудэмзэ юнматӥз воргоронъёслэн волейбол командазы. Дуатлонын но юкаменскъёс ӟечесь йылпумъянъёс возьматӥзы – 2-тӥ инты басьтӥзы. Озьыен, ёрослэн спортъя шыкысаз зарниез но, азвесез но вань. Туй медальёсын узырмытыны быгатысалзы на скал кыскисьёс, но ӧжыт гинэ ӧз пӧрмы.

Яр

Ёрос туэ кужымзэ возьматӥз – канат кысканын кузёосын 2-тӥ но 3-тӥ интыосты люкизы. Можгаосын огмында очко люкаса, азвесь призёр луизы гира ӝутъясьёс. Спортлэн та амалызъя ушъямон ужазы Ольга Кутявина (2-тӥ инты), Сергей Веретенников (2-тӥ инты), Никита Булдаков (1-тӥ инты).

Командаослэн огъя зачётсыя куинь группаосын вормизы Дэри, Юкаменск но Кез ёросъёс, гурт шудонъёслэн азвесь призёръёссы – Пичи Пурга, Грак но Кизнер ёросъёс, туй призёръёс – Ува, Сьӧлта но Алнаш ёросъёс.

Пусъёмы на: канат кысканын тужгес кужмоосыз – пичипургаос, дуатлонын но теннисын – кезъёс, шальыен шудонын – дэриос но кизнеръёс. Механизаторъёслэн троеборьеазы вормисьёс – воткаос, скал кыскисьёс пӧлын – нош ик воткаос, турнасьёс пӧлын – киясаос. Капчи атлетикаын тужгес усто пӧрмытӥзы уваос, дзюдоын – камбаркаос, лаптаын – каракулиноос. Кужмоосыз спортивной семьяос уло Сарапул но Эгра ёросъёсын. Нош кивалтӥсьёс куспын ӵошатсконъёсын (ыбылӥськон, дартс но шальыен шудон) вормизы юкаменскъёс.

Вуоноосыз гужем гурт шудонъёс Балезино ёросын луозы. Матысь дыре ини – 17-22-тӥ пӧсьтолэзе - кужмоосыз спортсменъёс Удмуртилэсь данзэ утёзы Огъяросси гурт шудонъёсын, кудъёсыз ортчозы Пензаын (6+).