"Наше село" ёрос программая туэ укмыс гуртъёсын ӵектосъёс пыӵало. Та программа нимысьтыз дасямын гуртъёсысь сюресъёсты но урамъёсты югдытонэн герӟаськем ужпумъёсты сэрттон-пертчон вылысь.
Улонэ со куинетӥ арзэ ини пыӵа, таӵе луонлыкез ас доразы уже кутэмзы потыса, гуртъёс черодын кадь сыло, шуыны луэ.
Инициативной бюджетированиея элькун конкурсын сямен ик, программалэн куронъёсызъя огъя уже, нырысь ик, улӥсьёс асьсэос уксё люканы кулэ, соослы юрттӥсько на ужбергатӥсьёс. Собере ини уксё висъяське ёрос казнаысь – со луэ уксёлэн бадӟым люкетэз. Озьы, ӵектоссэс уже кутон понна улӥсьёс ог 20-50 сюрс манет тыр ке окто, ёрос - 200 сюрс котыр. Быдӟалаез ӵектослэн дуныз бордысь потэ ини. Кылсярысь, Дзякиноын урамъёсты югдытӥсь вуж лампаосты светодиодной светильникъёслы воштӥзы: калык 46 сюрс манет котыр люказ, со борды ёрос ватсаз на, ӵектослэн огъя дуныз 241 сюрс манет усиз. Урамъёсты югдытонэн герӟаськемын вал Сёваын улӥсьёслэн но ӵектоссы, ужъёс отын быдэстэмын ини. Витё на – адамъёс но кочишевоос.
Витяз гуртъёсын мылкыд каризы сюресъёссэс тупатъяны: Поздеевоын, Качкашурын, Коротаевоын, Штанигуртын но Парзиын. Выльдэм сюрессы пумысен коротайёс мер вотэсъёсын но шумпотэмзэс веразы, туспуктэмъёс поттӥллям ни. Артысь туспуктэмъёс пуктӥллям: кыӵе вал но кыӵе луиз. Качкашурын но Молодежной урамлэн тусыз воштӥськиз.
- Та урамын улӥсьёс асьсэос бырйизы инициативной группа, интыысь депутатъёслэн кенешсылы вазиськизы, программае пыриськыны мылкыд каро но асьсэ уксёзэс сётыны дасесь шуыса. Спонсор чотын юрттӥськиз та урамын ас магазинзэ возись ужбергатӥсь. Озьы, ӵектослэн огъя быдӟалаез 250 сюрс котыр луиз.
- Сюресэз тупатъян бордын тыршиз Качкашур поселениысь ик ужбергатӥсь, со вал подрядчикез. Молодёжной урамысь тужгес урод интыосыз табере шобыртэмын асфальт пырыен, но со выль ӧй вал ни, - валэктэ поселенилэн тӧроез Екатерина Волкова.
Со верамъя, вуоно арын нош мукетыз урамын улӥсьёс программае пыриськыны малпало. Но адямиос котькыӵеез вань: кудӥз таӵе луонлык борды ӝабырскем кадь кутскыны турске, кудӥзлы номыре кадь но уг поты, уксёзэ но ӟепысьтыз уз потты, нош кудӥз лэсьтэмзэс вите. Котьма ке но, гуртын улонэз ӧжыт ӟечгес карыны тон но быгатӥськод ке – пыриськоно, лэсьтоно. Ачид но со сюрес вылтӥ ветлӥськод ук. Нош та ужпум шоры паськытгес ке учконо, мынам мур малпамея, кулэ вылэм сыӵе программа, кудӥз гуртъёсысь сюресъёсты выльдыны, ветлымон карыны юрттоз. Мед со ужасал быдэс кунын…