Ярмарка Чечы спас кутсконэн тупа. Вашкалаосмы та нуналысен чечы кыскыны кутско вылэм, нош шаерысьтымы мушкасьёс та дырлы чечызэс кыскизы ни. Верамзыя, мушъёс туэ гужем умой ужазы – куазьлэн зорез но, шунытэз но окмиз. Озьы, тазалыклы пайдалыко луись ваньбур трос люкамын.
- Ӟечлыкез но вылӥ, - пусъё Юкаменскысь Яшкин кузпалъёс. Пасеказы соослэн Тылысын. – Арысь аре Роспотребнадзорын эскеронъёс лэсьтӥськомы. Тани ваньмыз куронъёслы тупа.
Мушкасьёслэн быгатонлыкъёссы адско ӝӧкъёссы вылын. Беризьлэсь, сьӧд чабейлэсь, возьвыл турынъёслэсь пӧртэм посудаосы тырем чечы палэнтӥ ортчыны нокинлы но ӧз сёты. Котькудӥз лыктэм мурт быгатӥз чечы но солэсь поттэм ваньбурез шӧмъяны но басьтыны. Котькӧня черекъя: "Чечы, чечы!" - ымад ческыт уз луы, шуо ук калыкын.
Удмуртъёс мушъёсты Инмарен сётэм кузьымен лыдъяллязы.
- Мушъёс милемлы мылкыд но, тазалык но сёто, - шуэ Шаркан ёросысь Ягино гуртысь Любовь Воронцова. – Соос бордын милям вань улонмы. Мужике в четвертом поколении пчеловод. Быдэс ёросын сое тодо, визь-кенеш понна вазисько. Котькинлы но юрттэ. Ужез но мушъёсын герӟаськемын вал, колхоз пасекаын тыршиз.
Любовь Григорьевна Юкаменск ёросысь Балы гуртын вордскем, Шаркан ёросэ бызем. Успенской ярмаркае Михаил кузпалэныз нырысьсэ лыктӥллям.
- Мынам татын трос эшъёсы, ӵыжы-выжыосы уло. Весь юало, малы уд лыктӥське ярмаркае шуыса. Туэ тани вуимы. Ньыль часэ сюрес вылэ потӥмы ни.
Анай-атаезлэсь ужзэ азинтӥз Юкаменск ёросысь Жувам гуртысь Сергей Попов но. Али семьяеныз Юкаменскын улэ. Татын но муш чуркаос пуктӥзы ни, Жувамын но возё, оглом сюлэсь трос ни.
- Чечыез нуналлы быдэ сиыны кулэ. Со кужым сётэ, висёнъёслы аляны уг сёты, - шуэ кузё кышно Людмила. – Тани басьтом пергаез. Ӵукна одӥг пичи пуньы гинэ сиёно, нош со нунал ӵоже каньылля ас ужзэ лэсьтэ, организмлы туж кулэ микроэлементъёс, витаминъёс вуттэ. Иммунитет но ӝутске, вир но выльдӥське, вань органъёслэн ужамзы радъяське.
- Тросэз муш вордӥсьёс кӧтӝожзэс верало, поттэм чечызэс вузаны уг быгато шуыса.
- Ми интыямы ум пукиське. Мукет ёросъёсы потаськом, ярмаркаосы, ужрадъёсы пыриськиськом, Ижкарын но вузкариськом. Ваньзэ вузаны ум турскиське, толлы но кельтӥськом, соку но басьтыны мылкыд карисьёс луо на.
Нош Малый Венижысь Василь Абашев шуэ, чечылэн пичи дуныз шуыса.
- Милем, басьтӥсьёслы, юн дуно потэ. Туэ одӥг литрез понна 600 манет ӟепысь поттоно ни.
- Турскемез но дуно усе, - шуэ Василь. – Ми братэным 2010-тӥ арын кутскимы та уж борды, нокыӵе тодон-валанъёсмы но ӧй вал, книгаосысь, интернетысь утчаськимы. Ужез радъяны миллион манет котыр кулэ луиз. Севере вахтае ветлыса гинэ коньдон люканы быгатӥмы. Басьтӥмы муш, уморто, музъем арендае кутӥмы.
Ваньмыз муш вордӥсьёс огымысь кадь шуо, та уж борды кутскыку, нырысь ик мушъёсты яратоно но трос тодоно-валан люкано шуыса.
Ярмарка зэмос праздниклы пӧрмиз. Татын сувениръёс, будосъёс басьтыны, мастер-классъёсы пыриськыны, концерт учкыны луэ вал.