- Пудо сиён ласянь шуг-секытъёс уз луэ шуыса малпасько, - шуэ егит кивалтӥсь Александр Баженов. - Силос кулэезлэсь 90 процентэзлэсь уно дасямын ини, нош сенаж – 80 процентлэсь трос. Будосъёслэн мускытсы ичи бере, сенаж кӧсгес пӧрмиз. Октыны-калтыны кылиз на кукуруза, киземын 100 гектар вылэ. Чакласькомы, гектарысьтыз 350 центнер котыр потоз. Мукет культураосын ӵошатыса, кукурузалэн выжыосыз, ву утчаса, муре кошко. Туэ со чебер будӥз. Кӧс турын 80% дасямын, но кылем арлэн вань на. Куро дасяськомы, соин пудо сюдомы, подстилкалы кутомы, оло, вузаны но быгатомы.

- Кыӵе ке выль культура туэ будэтӥды-а?

- Нырысьсэ рапс кизимы. Ассэ умой возьматӥз, но нымы-кибы аляз, куинь обработка ортчытоно луиз. Туж умой луиз выль, 21 метръем опрыскиватель басьтэммы. Рапс мыноз переработкае, вӧй пызьыртэм бере, жмыхсэ милемлы келялозы, пудо сюдомы. Туэ 27 гектар вылэ кизимы, азьланяз 200 гектарозь йылтыны малпаськом. Ми асьмеос комбикорм лэсьтыны кутскимы, кутӥськомы фураж, ватсэтъёс но жмых.

- Ю тысь кыӵе-мар удалтэмын?

- Октэмын-калтэмын ни 66% котыр юос. Кылемын на йыды но сезьы. Урожай, конечно, ляб. Озимой ӟеглы музъемлэн мускытэз окмиз на – гектарысьтыз 27,4 центнер люкаськиз, нош мукет культураос – гектарысьтыз 11-13 центнер котыр гинэ. Фуражлы но кидыслы окмоз. Та дыре ик ӟег кизиськомы на.

- Нош ужась киос ласянь шуг-секытъёс вань-а?

- Кылем арын капчигес вал. Пандемия сэрен тросэз гуртазы пуконо луизы, гужем возёсын ужазы, туж умой юрттӥзы. Нош туэ секытгес, механизаторъёс уг окмо. Адямиос тырмымтэен, куинь кормоуборочной комбайнъёс пӧлысь кыкез гинэ ужазы. Ю калтонэ но кык комбайн гинэ поттэмын, отӥез тӥяськемын. Соин ик выль комбайнъёс сярысь малпаськонэн улӥськомы. Малы ке шуоно 560 гектар котыр пусошур лудъёсты ужаны медскомы на.

- Эшшо кыӵе бадӟым малпанъёсты вань?

- Трубашурысь тысь куасьтон комплексэз выльдоно, сое газ вылэ выжтыны малпаськом.