Ас киосын кылдытыны

- Малпанъёс бергало ни вал, коллективмылы кыӵе ке но аспӧртэм, мукетьёсызлэсь висъясь уж кулэ шуыса. 2017-тӥ арын нылпи садамы ужаны лыктӥз выль повар - егит, чупрес, мыло-кыдо удмурт нылкышно Марина Наговицына. Тӥни со бордысь ик ваньмыз потӥз, - вера воспитатель Валентина Третьякова.

- Мыным Глазовысь но ёросысь "Удмурт нылкышно кенеш" огазеяськонэн кивалтыны оскемын. Ӵапак та вакыт ми матысь ужаны кутскимы карысь дизайнерен но вуриськисен Валентина Пряженниковаен. Сое нылпи садамы но кыскыны малпамы. Валентина Леонидовна дунъя но гажа удмурт калык сям-йылолъёсты. Со ачиз ик ӵектӥз, кызьы но мар бордын ужаны, - ватса Марина Наговицына.

Озьы, огъя мылкыдын нырысь араз кылдӥз "Устокай" проектсы. Пиналъёс но, ваньмемзыя бадӟымъёс но - мылысь-кыдысь тыршизы пӧртэм киужъёсын. Котькуд праздникъёслы кадь мар ке но выльзэ дасяллязы. Ас лэсьтэм мунёосынызы карын ортчем конкурсэ но пыриськизы.

- Мынам мур осконэ: киуж, творчество – нылпиосты будэтонын-визьноданын одӥгез валтӥсез но инъетэн луисез. Пинал потребитель медаз луы, творец луыса мед будоз. Быгатонлыкъёссэ одно ик ас калыкезлэн, ас выжыосызлэн лулчеберетэнызы мед герӟалоз, - мылкыдъёссэ усьтэ Валентина Пряженникова.

Тузӥ дэремъёсынызы гочато

Пусйыны кулэ: нылпи садэн кивалтӥсь Анастасия Осокина но, воспитательёс но – егитэсь, огъя проект ваньзэс эшшо на огазеяз. Бадӟым мылкыдзы одӥг ужен ӧз буйгатскы, соку кылдӥз на "Дыдыкай" - йӧскалык шӧмо дэрем вуронъя проектсы.

- Марина Витальевнамы Глазов ёросысь "Чупчи гуръёс" фольклор ансамбльын кырӟа, егит семьяослы "Шудбур" клубен кивалтэ. Чебересь, йӧскалык шӧмын вурем дэремъёсыныз нылпи садэ но вуылӥз. Ми но, нылпиос но синмаськыса учкылӥмы. Соку тӥни лӧптӥмы нылпи садысь костюмерноймес йӧскалык дэремъёсын узырмытыны, нылпиослы занятиосын соосты кутылыны. Ми ведь трос ужаськомы шаертодон темая, - вера Валентина Третьякова.

Воспитательёс, повар, медсестра – ваньзы дэрем вуронэн "висизы". Котькудӥз аслыз сюлэмызъя бырйиз-вуриз. Малпанъёссэс улонэ пыӵатыны юрттӥз Валентина Пряженникова.

Воспитатель Галина Кардопольцева – "Золотой ключик"-ын тужгес кема ужасез, 2010-тӥ арын ӟеч-ӟеч тупатъям нылпи садын со усьтэмез дырысен тырше. Удмурт шӧмо дэрем вурыны бадӟым мылкыдын басьтӥськем, бордаз мамазэ кыскем. Ӵошен сюлмысь тыршизы но лымшор пал удмуртъёслэсь дэремзэс дасязы. Озьы, шаермылэн уйпал караз лымшор удмурт нылкышно дэрем кылдӥз. Антонида Георгиевна Ивановалэн выжыосыз Алнаш палъёсысь, пе, соин асьсэлэсьсэ вуремез потэм.

- Ачим платьятэк кыли, созэ мамае аслыз кутӥз. Табере аслым вуреме потэ на. Эшъёсы тӥни макем гочатыса дӥсяло тузӥ дэремъёссэс, - шуэ Галина Николаевна.

Нош Вера Николаевна Ворончихиналэн удмурт дэремен матысь тодматсконэз кема аръёс талэсь азьло кутскем. Воткинскысь музыкально-педагогической колледжын дышетскыкуз, курсовой ужзэ уйпал удмурт нылкышнолэн дэремезлы сӥзьыны мылкыдыз ӝутскем. Соин валче люкам тодон-валанъёсыз али но ужаз туж ярало. Берло Глазовысь ГГПИ-ын дышетскиз на, отын но диплом ужзэ уйпал нылкышно дэремъя дасям. Нылпиосты йӧскалык дэремен тодматон понна Дыдык мунё вурем на.

Ужъя эшъёсыз проект улсын дэремъёс вурыны кутскиллям но, Вера Николаевна ӟеч-ӟеч удмурт дэрем вурон борды басьтӥськем. Айшетэз дась ни, кылем на дэремзэ чеберъяны-быдэстыны.

Бурдъяськиз но бурдъяз

"Дыдыкай" проектсы, тылобурдо сямен, кыре потыса лобӟиз, шуыны луэ. "Асьмеос но ӧм малпалэ, вурем дэремъёсмы бадӟым ужрадъёсы вуозы, фестивальёслэн сценаоссы вылэ потозы шуыса", - огымысь верало нылкышноос.

Дэремъёссэс огазеяса, коллекцилы пӧрмытӥллям, сое "Эмезе" нималлям. Нырысь ик соин вуылӥллям Эграе, собере Балезиное, Пичи Пурга, Лудорвае, Дзякиное. Бордазы нылкышноос асьсэ нылпиоссэс но кутӥллям ни.

"Золотой ключикын" тыршисьёслэн таӵе мылкыдзылы, дэмен пайдаё тыршемзылы шумпотыса, Валентина Пряженникова одӥгаз пумиськонын, кудаз ми но вуылӥмы, соосты таукаронъёсын но сертификатъёсын пусйиз.

- Туж усто, асьмеды одӥг уж огазеяз, мылкыдъёсмес валчеяз шуыса. Оскисько, кусыпъёсмес ум ыштэ, трос выльзэ но тунсыкозэ кылдытомы на, - шуэ Валентина Леонидовна.

Зэм, кутскем ужзэс татын одно ик азьланьтыны чаклало. Малпанъёссы трос, соос пумысен вераськиллям-кенешиллям ни. Ужпум пукто: та удысын ужзэс грантовой программае пыриськонозь вуттыны. Мед пӧрмоз, мед удалтоз!