Ӟеч бабаен, умой кенэн
Дораз вуылыкумы, Галина Михайловнаез гуртысьтыз ӧм шедьтэ, но кенэз вераз, со легезьпу мульы октыны мынӥз шуыса. Пумен утчаны но кошкиз.
Дорофеевъёслэн корказы ульча пумын, кӧня ке вамыш лэсьтод – нюлэс куше вуод. Кема но ӧм вите, ӵошен вуизы ни. Галина Михайловна, кытысь луэммес тодыса, пальпотыса ӟечбуръяськиз.
- 76 арес тырми ни, бодытэк азбаре но уг потаськы. Но сюлэм нюлэскы кыске. Кыдёке уг ветлӥськы, губияны но кык пол потай. Тани шиповник но, пӧй, люкало. Мӧзмыт юн, мужике ньыль ар ӧвӧл ни. Со котьмар карылӥз, пыр вӧтасько, - кутскиз веранзэ выль тодмомы.
Кузпалыныз Николай Фёдоровичен шуд усем тупаса, ог-огзылы юрттыса улыны-вылыны – семьяязы но, уж дуразы но.
- Ачим мон Кычиноын будэмын, татысен вить иськемын гуртмы сылӥз, но юн Зянкиноын улэме потыса улӥ. Озьы ик луиз. Кузпалы бригадир вал, мон – ветеринар. Собере дояркаын но, завфермой но ужай, парторглэсь но ужзэ быдэсъяй. "В городе – последний, в деревне – первый", - со верам мон сярысь, - пальпотэ кышномурт.
Шаплы луэмзэ адӟыса ик, вылды, Инмар солы бӧрсьысь бӧрсьы вить пинал сётэм. Пиналъёсын бабаез пукем.
- Валес улаз кызьпу ньӧр возьылӥз. Куке учыр кемдӥз но ваньзы азьын вераз: "Еттӥ-а, ӧй-а мон та дыдыосыдлы?" Соку пиналъёс бадӟымесь ни вал, зэм, одӥг пол но ньӧрез адӟылымтэ. Ӟеч вал бабае, туж яратыса соосты будэтӥз. Табере пие но кенэ бордын улӥсько - всё ӵош. Кызьы мон кенэтэк-пиетэк улом? – веранзэ азьланьтэ Галина Михайловна.
Данъет – президент киысь
Ньыль нылъёсыз - ваньзы ас сюрессэс утчазы-шедьтӥзы, пӧртэм удысъёсын ужало-тыршо. Тани Валяез ёросысьтызы ик Муллино гуртын фельдшер, кыкез нылъёсыз Ижын, одӥгез Ува палъёсын. Нош пиез, со куинетӥез пиналыз, кылиз атай юртаз, вордскем гуртаз.
- Шурике пинал дырысеныз техника борды лякиськемын, юн мастёр. Нырысь профессиез солэн тракторист, - шуэ Галина Михайловна.
Пиеныз, Александр Николаевич Дорофеевен, кемалась ни тодматскыны кылдӥз вал. Соку со кивалтӥз гуртысьтызы колхозэн, ужъёссы урод ӧз мынэ, газетамы но гожъямы. Но со дырысен тросэз воштӥськиз ни Зянкиноын. Жаляса верано, ӧвӧл ни гурт эштос, ужась калык но ӧжыт но ӧжыт кыле. Шуг-секытъёс шоры учкытэк, Александр Николаевич выль уж борды басьтӥськиз – Юкаменскын етӥн поттон заводэз выльысь улӟытӥз.
"Материнская слава" медалез Г. М. Дорофеева элькунамы нырысьёсыз пӧлын басьтӥз. Данъетэз дуре Иже ӧтьылӥзы, ачиз президент А. А. Волков сётӥз, пе.
Вить нылпиё анай, табере Галина Михайловна 12 внукъёслы но сомында ик правнукъёслы шумпотэ ни.
- Ярато, гажало монэ. Трос ни ке но, коркаямы ваньмы ик тэриськом, - валэктэ со.
Вераськон куспын тодмо луиз: одӥгез нунокез сярысь газетамы но гожъяськеммы ни. Верх-Униысь Кирилл Вахрушев ас киосыныз лэсьтэм трактореныз газет бамамы потылӥз. Бен, сыӵе мылкыдо, ужась, лякыт нуноклы котькуд песянай шумпотоз.
- Праправнукъёсты мед адӟыны кылдоз на! – мылкыдзэ усьтэ Галина Михайловна.