Удысын – 30 ар

Школаез йылпумъям бере, Галина Сарапулысь техникумын экономистэ дышетскиз. Тодон-валан люкаса, егит ӧнерчи Красногорскысь гурт удысъя управление ужаны кариськиз. Азьло ревизор вал, собере бухгалтер. Кыкетӥ арзэ тырше "Архангельской"-ын.

- Куамын ар ӵоже удысын юн трос воштӥськиз, - шуэ. – 1991-тӥ арын ваньзэ киын гожъяллямы, бухгалтер бумагаос пӧлы выемын вал, инструментмы – калькулятор. Нош али ваньмыз компьютере пыртэмын, но уж ичигес но, капчигес но ӧз луы. Куронъёс трос.

Бухгалтерлы предприятиын ӵемысь мукет ужъёсты но быдэсъяно луэ. Тани Галина Васильевна кадръёс понна но кыл кутэ.

- Хозяйствоын 25 адями пала ужа. Тросэз ӝоген пенсие потозы яке пенсиын ни. Егитъёс ичи. Ужасьёсмы татысь но мукет гуртъёсысь ветло. Ачим но Красногорскысь лыктылӥсько. Уждун дырыз дыръя кык пол толэзяз тыриськомы.

- Удыссэ ӟеч тодэ-вала, оскымон ужа, - шуэ бухгалтер сярысь кивалтӥсьсы Навруз Кулиев. – Нуналыз вазь кутске, сизьым часэ татын луэ ни.

Трос нылпи – шумпотон

Галина Васильевналэн тужгес но бадӟым узырлыкез – пиналъёсыз. Соос Павловъёслэн – тямыс: ньыль ныл но ньыль пи. Кыкез пиоссы кыктоос. Бадӟымезлы нылзылы 29 арес, пичиезлы – 12.

- Кыкез ужало, кыкез школаын на, ньылез пиналъёсмы – студентъёс. Ваньзы Уваын сварщике но каменщике дышетско, - шуэ Галина Васильевна. - Мон кык пол бабуш ни.

- Малпалляды-а сомында пинал сярысь?

- Ӧй, конечно. Кык гинэ луоз кожасько вал. Тужгес но секыт дыръя бабушъёсмы юрттӥзы, собере бадӟымъёсыз пичиосыныз турскизы ни. Лекос шуг-секытъёсмы но ӧй вал, висьылӥзы ичи. Нош али асьсэос котьмар но карыны быгато ни. Мон ужысь лыктӥсько ке, гур но эстэмын, сиён но пӧрамын луэ ни. Асьсэос нянь но кото, пыжос но пыжо.