Пичи дырысен
Школае мынытозяз ик пиналэз нырысь дышетоно ас кылыныз вераськыны. Отӥяз соос асьсэос дышо ӟуч кыллы. Нош гуртамы, одӥгеныз, кыкетӥеныз песянаен пумиськыса, малы мусокаеныд удмурт сямен уд вераськиськы шуыса юанлы, верало, "соос табере милям ӟучесь ни". Бен кин со пичиосты озьы кариз? Ачиз нош, шенгыль-пенгыль ке но, ӟуч сямен азьланьтоз вераськонзэ.
Ӝам-ӝам удмурт гуртын пиналъёс нырысь нылпи садэ (отын удмуртъёсыз но ӟуч луыса пото, удмурт кыллы кык занятие гинэ чакламын), собере нырысетӥ классэ ӟучомыса вуо. Ярам коть, быдэ вуэмъёс удмурт сямен ик верасько, нош пиналъёслэсь уд ни кылы. Гурт ураме потыса, валаны ик уг луы, оло ӟуч гуртын та, оло удмурт.
Не удмуртсэ, не ӟучсэ…
Ӟуч сямен верасько но, анай-атайёс шумпото, пиналзы визьмо будэ шуыса. Куке-соку школаямы Удмурт шаерлэн шор палысьтыз вуэм дышетӥсьмы шуиз, пиналэз ӟуч кыллы вордскем дырысеныз ик, пе, дышетоно, озьы соос умой малпаськыны но чебер вераськыны дышо. Нош удмурт сямен малпаськыны но вераськыны уг луы шат? Малы табере, ӟуч сямен гинэ вераськыса, пиналъёс чебер уг верасько? Не удмуртсэ ум тодӥське, не ӟучез вылэ пыкиськыны ум быгатӥське.
Палэнскыны тыршо
Анай-атайёсын туэ ортчем кенешонын удмурт кылэз дышетон пумысен кылпум потӥз. Капчиятэм программае,пе, потоно. Бен школаын сыӵе программае потӥмы ке, доразы пиналъёс удмурт кылын вераськозы-а на? Уз.
Та кенешонын ик одӥгез анай шуэ, ӟуч сямен, пе, "мысли выражать намного легче". Воксё тумошо. Кыӵе но муг уг шедьто, программаысь удмурт кылэз палэнтон вылысь. Калык кытын но удмурт кылэз уг дышето: Москваын, Петербургын, Венгриын, Германиын, Япониын – милям весь палэнскыны тыршо…
Калыке потӥзы
Малы иностранной кылъёсты умой тодытэк школаысь пото пиналъёс? Малы ке шуоно урокын гинэ соин верасько, анай-атай но, эшъёсыз но со кылын уг верасько (мон ваньмыз пиналъёс сярысь уг вераськы, куд-огез тунсыкъясько, репетиторъёсын ужало, азьланяз солы кулэ луоз шуыса). Озьы ик удмурт кылын но луоз. Удмурт кылэз али но ёросысьтымы куд-ог гурт школаос факультатив чотын яке арняяз одӥг урок гинэ кельтӥзы на. Нош азьланяз нылпилы со кулэ луиз ке, соку мар? Али куд-ог визьмо адямиос жаляло, удмурт кылэз ӧз дышетэ, удмурт сямен öз вераське шуыса.
Йырам кылиз гуртамы бызем ӟуч кышномуртлэн верамез: "Я вышла замуж за удмурта. Почему мои дети не должны изучать удмуртский язык? Пусть изучают". Куиньназы нылпиоссы удмурт кылэз дышетӥзы, куиньназы вылӥ образование басьтӥзы. Быдэ вуыса но монэным соос удмурт сямен верасько. Нунокъёссы но дышетӥзы, озьы ик калыке потӥзы.
Ми узыресь!
Удмурт кылмы асьмелэн жильыртӥсь ошмес кадь. Мукет калыкъёслы со малы ке чебер, мусо, сюлэме пырымон потэ.
Кемалась ӧвӧл поездэн Крыме мынӥськомы вал. Куспамы нылыным, нунокъёсыным удмурт сямен вераськиськомы. Красноярскысь егит кышномуртъёс шорамы учко, кылзыны-валаны туртско, кожалод. Одӥгез ӧз чида, лэся, но юа: "Кыӵе кылын вераськиськоды?" Мон верай. Солэн кылылэмез но ӧвӧл удмурт кыл сярысь, но пумитам вераз, кыӵе небыт, муспотон, пе, кылӥське. "Тӥ ӟучсэ но, удмуртсэ но-а умой валаськоды? Тӥ узыресь, кык кылэз, кык лулчеберетэз тодыса будӥськоды!"
Нош ми, удмуртъёс, сое валаны ум тыршиське. Собере мон Удмурт шаермы сярысь кӧня ке верай, Брангуртысь песянайёс сярысь. Туж шумпотӥзы, со песянайёс сярысь верай но, самой тӥ отысь-а, пе.
Шумпотӥсько но данъяськисько!
Школаын пиналъёсын пöртэм конкурсъёсы, олимпиадаосы,фестивальёсы, онлайн форматъем ужрадъёсы пыриськиськом, трос вормонъёс басьтӥськом. Сыӵе нылпиосын но соослэн анай-атайёсынызы туж данъяськисько. Туэ тани кыкез нылъёсмы Князева Роксана но Захарова Маша пыризы УдГУ-ысь Удмурт филологияя, финноугроведениея но журналистикая институтлэн факультетаз, удмурт-финн люкетаз. Нош Горбушина Аня, табере ини Анна Андреевна, та факультетлэсь бакалавриатсэ йылпумъяса, школаямы пиналъёсты удмурт но ӟуч кыллы дышетэ, дышетсконзэ азьланьтэ магистратураын.
Вераме потэ на Катя Сунцова сярысь но. Со 12 ар ужа ини Венгриысь Сегедысь университетын, дышетэ венгръёсты удмурт кыллы. Студентъёс сое гажало тунсыко урокъёсыз понна. Солэн дышетскисьёсыз пöлын тодосчиос но вань ни.
Милям школаямы ик дышетскиз Елена Плотникова. Али со Удмурт шаермылы тодмо журналист, ужа радиоын, удмурт передачаосты нуэ.
Вератэк кельтэм уг поты артистмес, Максим Князевез. Нырысь со йылпумъяз Ижысь лулчеберетъя колледжез, собере Москваысь артистъёсты дасясь Щепкин нимо институтэз. Али со ужа Удмурт драматической театрын, ассэ эскериз ни удмурт киноын но.
Нош Саша Корепановмы, удмурт кылосбуръя факультетэз йылпумъяса, нырысь ужаз университетын, собере "Вордскем кыл" журналлэн редакторез луыса, али ужа Йӧскалык политикая министерствоын.
Удмурт кыл уг люкеты, со азьлань нуэ
Малы мон тае али ваньзэ верай?
Удмурт кылэз дышетыса но сое тодыса, калыке потыны, вылӥ дышетсконниосы пырыны, пöртэм интыосын ужаны, малпаськыны, визьмо луыны, астэ котькыӵе удысын эскерыны луэ. Удмурт кылмы азьлань но азьлань нуэ, ӟученыз артэ ик. Одӥгез кыл мукетызлы уг люкеты.