Дышетӥсь

- Вордскемын мон Яр ёросысь пичи Шобоково гуртын война кутскон аре. Муми дас кык пинал ваем, но улӥзы куатез. Мон берпуметӥез вал, кызьы кенакмы шуылӥз – пурты куръет. Папае быдэс ёросын тодмо адями вал – шуба вурись. Муми вералляз, вуриськон машинаез сьӧрысь ӧз но поталля шуыса. Войнае но сое басьтымтэ, бронь сётӥллям вылэм, но ачиз куриськыса кошкем. "Пие воевать кароз, мон татын-а пуком?" - шуиз, пе. Ньыль пиосыз вал ни бере, туж ныл витем, оже кошкыкуз, мыным арес но ӝыны котыр вал. Братме но, папаме но уг тодӥськы – кыксы ик ивортэк ышыса быремын. Муми улытозяз колхозын, фермаын ужамын.

Ас гуртамы школамы ӧй вал: покчи классъёсын Юберкие ветлӥмы, собере – Бачумовое, отчы куать иськеме мынонмы вал. Школа бере Можга педучилищее мынӥ. Со вал 1960-тӥ ар, одӥг интые – 11 мурт, собыдӟа конкурс луылӥз. Ужаны направлениея ёросамы ик, Баяранэ ыстӥзы. Деревнязэ адӟылэме но ӧй вал, Пудем сьӧрын уга со, нош отӥ вуылэм ӧй вал. Малпано ке, сыӵе дӥсьтӥсьтэмесь, востэмесь ми вал, нош асьмелы ини пиналъёсты дышетоно.

Баяранэ нырысьсэ мынэмме ноку уг вунэтӥськы ни. Пудеме электричкаысь васьки, кышноос но воргоронъёс сыло, соослэсь юасько ни, кызьы Баяранэ мыноно шуыса. "Нош малы тыныд отчы?", - юало аслэсьтым. "Школае", - шуисько. Нош юало: "Малы?" "Дышетыны" - валэктӥсько. "Тон-а дышетӥсь?" - озьы паймыса кылизы. Мон уга пичи, чиед, пинал.

Школаын юн яраз мыным. Гармошкаен шудӥсько вал бере, бадӟым переменаосы пиналъёс бызьыса дорам вуылӥзы ни: "Зинаида Дмитриевна, шудэ-ай!".

Газет поттӥсь

- Кызьы сэре газет поттон удысэ вуиды?

- Улон вуттӥз-а, мар-а шуод ни. Баяранын ужакум, роное ӧтизы но Кушман школае заведующие мынод шуыса веразы. Мыноно ке – мыноно, пӧй, аслым 21 арес. Азьпалан тол, пу дасяно. Бригадир доры куинь пол ветлӥ, пу ваёно шуыса куронэн. Ӵапак со вакыт "Сельская правда" ёрос газетысьтымы ялон адӟи: удмурт кылэз ӟеч тодӥсь корректор кулэ. Нокинлы ӧй вера, отчы вазиськи, монэ кутӥзы. Со луиз газет лэсьтонэ сюрес лёгеме. "Сельской правда" ведь соку ӟуч но удмурт кылъёсын потаз. Но отын кема ӧй ужа, бызи но картэмын Глазове вуимы.

Уж пумысен "Красное знамя" газетлэн редакцияз вазиськыны малпай. Ӵапак удмурт корректор кулэ вылэм. "Красное знамя" ӟуч кылын потӥз ке, ми Адамова Екатеринаен – кык переводчикъёс, сое удмурт кылэ берыктылӥмы, озьы "Горд знамя" потылӥз на. Редакторлэн удмурт газетъя воштӥсез Михаил Степанович Никитин вал, сое воштӥз егит журналист Надежда Золотарёва. Ужмес адӟизы, дунъязы, тыршеме уно грамотаосын пусъемын. Тужгес дуноез – Россиысь печатья министерстволэн данъян грамотаез.

1990-тӥ ар бадӟым воштӥськон пыртӥз улонамы. Элькунамы удмурт движенилэн ӝутскон вакытэз кутскиз, уйпал удмуртъёс понна нимаз газет поттон сярысь вераськон ӝужаз.

Озьы ми, "Горд знамялэн" коллективез, выль газет борды басьтӥськимы. Эскерон вылысь поттэм номеръёсынымы гуртысь гуртэ ветлӥмы, коркась корка пырамы, фермаосы но мастерскойёсы вуылӥмы, калыкез тани таӵе удмурт газет потоз шуыса тодматӥмы. Газетмес ӝутскем мылкыдын пумитазы, гожтӥськисьёс арысь аре йылӥзы. Озьы кыштыр ужамы. Надежда Константиновна валтӥсь редактор вал, ужез ӟеч радъяз-пӧрмытӥз. Мон ответственной секретарьлэсь ужзэ быдэсъяй. Мыло-кыдо пыриськимы "Удмурт кенеш" огазеяськонлэн ужаз, Глазовысь но ёросысь ёзэтэныз редактормы кивалтӥз уга. Удмуртъёслэн съездъёсазы пыриськылӥ, мукет бадӟым ужрадъёслэсь но палэнэ ӧй кыльы.

Кырӟась

- Нош ку кырӟаны кутскиды, Зинаида Дмитриевна? Кӧня тодӥськомы, Тӥ пыр хоре ветлӥськоды, таиныз ужен али но люкиськымтэ?

- Кырӟаны котьку яратылӥ. Гармошкаен пинал дырысеным ас быгатэмея шудыны кутски, педучилищеын домраез кутӥмы на. Но газетын ужакум, шудыны-кырӟаны дыр ӧз ик шедьылы. Одӥг пол тодмоме пумитай, со Кожиль школаын дышетылӥз, пенсие потыса, РДК-ысь "Поющие сердца" хоре ветлэ вылэм. Куинетӥез кырӟасьмы, пе, ӧвӧл, лыкты дорамы. Кема малпаса ӧй улы – мынӥ. Кык репетиция бере сцена вылэ ыстӥзы ни. Соку ик старостае но бырйизы.

Тӥни озьы, 2002-тӥ арысен ветеранъёслэн "Поющие сердца" хор борды сюлмын бурмиськиз. Али со карысь лулчеберетъя "Россия" центрлэн лыдъяське ни. Хормы "народный" нимез нуллэ, трос пӧртэм конкурсъёсы но смотръёсы пыриськиськомы, уно грамотаосмы но дипломъёсмы.

Кивалтӥсьмы Григорий Николаевич Бушмелев ӟеч милемын ужа, азямы вылӥ куронъёс пуктэ, репетициосмы нуналлы быдэ ортчо. Тани 9-тӥ октябре "народный" нимез юнматоно, ижъёс дунъяны татчы, Глазове вуозы. Но мар луоз меда, коронавирусэн югдурен сэрен, оло, уз но лыктэ. Милям но тани репетициосмы кутскизы гинэ, одӥгез кырӟасьмы висемен, кык арня карантинын доръёсамы пукимы.

Нуныкаос витись

- Азьланезлы кыӵе малпанъёсты-мылкыдъёсты?

- Хорын кырӟан пумысен малпасько, кошконо ни, дыр, шуыса. Ми, бадӟым арлыдоемъёс, кык кузя гинэ кылемын на. Нош ӧй ке кырӟа, мар каром меда? Кыӵе ужен воштом, созэ ӧй на малпа. Арлыд сыӵе ни уга, азьласянь пусйыны уг ни луы. Туж книга лыдӟыны яратӥсько вал, нылыным ӵошатскыса лыдӟиськылӥмы. Но синмам операция лэсьтоно луиз, табере эскериськоно.

Кужым но шумпотон нуныкаосы сёто. Одӥгез внучкае Москваын улэ, атомной промышленность удысын ужа, Индие ужезъя кӧня ке пол ысъязы ни. Пичиез внучкае Питерын, туэ тани магистратурез быдтӥз, внуке – Рязаньын. Правнукъёсты витисько ни табере, соосты мед адӟыны кылдоз. Собере эшшо одӥг бадӟым малпанэ сюлэмам улэ: бубыме но братме шедьтоно вал, оло, маке но ивор утчаса-утчаса потоз ик.