Бечеос

Нош ми соин бечеос ог 17 аръёс ни. 2004-тӥ аре Нурызово гуртын мынам нылы пичи магазин усьтыны быгатӥз. Отын мон кутски ужаны вузкарись луыса. Гуртоос лякыт пумитазы милемыз, кин маин быгатӥз юрттӥзы.

Нош Александра Александровна пыр обед сиён вайылоз вал мыным.

- Айда, Николаевна, пытса магазиндэ, обед кар ни, - шуоз лякытэн.

Ваньмы ми - пичи дырысь

Вордскем Александра Александровна 1937-тӥ аре Вӧёгуртын, куинь сузэръёс пӧлын будэм.

Муза апаез, зӧкез сузэрез, солэсь куинь арлы бадӟым, али улэ Вӧёгуртын. Инмар, пе, мед возьмалоз на сое, вань корка котырысь кышно ужез ужа на. Пичиез Вера сузэрзы вордскемын 1939-тӥ аре, со улэ Балезино каргуртын. Ньылетӥез сузэрзы висеменыз кулэм, 50 аресозь улыса. Со сярысь веракуз, Александровналэн котьку синвуосыз пото.

- Мумымы Миронова Христина Дмитриевна улытозяз фермаосын ужаз, завфермой но вал. Макем секыт улон вал соку: турын скалъёслы ӧз окмылы, тыро-пыдо техника но, валъёс но ӧй вал, вань ужъёсты кышно киос но пиналъёс быдэстылӥзы. Тятьмес 1941-тӥ аре Быдӟым оже басьтӥзы, со аре ик "пропал без вести" шуыса гожтэт лыктӥз. Тӥни озьы, баба вӧзын будӥмы.

1960-тӥ арын январе бызи Нурызово гуртэ. Картэ Князев Евгений Яковлевич вань колхоз ужез ужаз, комбайнёр но, газовик но вал, но улонысь вазь кошкиз.

Кырӟанэн артэ

- Пенсие потыса, мӧзмыны ӧдъяй, - азинтэ веранзэ бечее. - Эшъёсыным кырӟаны клубе люкаськыны кутскимы. Ог дасо кузя люкаським, ансамбльмес "Калинка" нимамы. 1995-тӥ аре кезъёсты телевизор пыр адӟытӥзы. Мон соку Анна Николаевна Прокопьевалы гожтэт ыстӥ, ми но, пӧй, Пыбьялан усто кырӟаськомы. "Удмурт Кенешлэн" куремезъя милемыз телевизор пыр возьматӥзы. Учкисьёслы ми "Ныл куран" йылолэз адӟытӥмы. Собере Балезино телевидение пыр трос пол возьматылӥзы кырӟаммес. Нош али 10 пӧлысь кык кузя ини кылимы - мон но Фая бечее, - вера Александра Александровна.

Уг вунэто

Та сюлмо кышномурт куинь пинал вордӥз: кык ныл но одӥг пи. Огез нылыз улэ кыдёкын, Ханты-Манси улосын, вань отӥын Нягань нимо кар. Кыкетӥез - Екатеринбургын. Кыкназы ик ас семьяосынызы уло, мамазэс уг вунэто, ӵем жингыртыло. куинь нунокъёслы прабабушка ини табере та дуно бечее.

- Пие, Юрае, юн жаль потэ, вазь кулӥз, 52 арес гинэ вал. Комбайнэн пыр ужаз, ӟеч ужамез понна арысь аре награда сётылӥзы. Сьӧсь рак басьтӥз, - верамез бере синвуэз потӥз Александровналэн.

Тодам ваи мон но, кыӵе юрттӥз та Юрик, магазинмес пуктыку. Доскаос-а, корт­ӵогъёс-а кулэ - маин быгатӥз, ялан юрттӥз. Гуртоосыз солы лякытэн "Выжы" шуыса вазё вал.

Кема улон сӥзисько

Вордскем нуналызлы Александра Александровналы малпай радио пыр кырӟан келяны. Мар кырӟан, пӧй, куром, юасько аслэсьтыз. Бен Юрий Князев, пе, мед кырӟалоз вал "Чупчи пал" кырӟанэз: шумпотӥсько, пие дорам вуылӥз кадь потэ, пе.

Кӧльы кадь тазалык Тӥлед­лы, Александра Александровна, улон сюресты кема мед кыстӥськоз на та югыт дуннеын! Ваньзэ-ваньзэ умойзэ гинэ сӥзисько та паймымон, лякыт, мусо, визьмо удмурт кышномуртлы.