Алтайыска jажыл бӱрлӱ кеен jай келди. Jер-Эне jажыл торко кебисле бӱркелди. Кеткин jараш кожоҥду jайгы кушкаштар ӱн алыжып кожоҥдожотон. Ӱзе ле неме тын, ийде-кӱч алынат. Мал-аш ончозы jайлузына чыгып, амыр тойынат.
Улустар мала-ажынын ижин божодып, тыш алынып токунадылар. Кезик улус айылы-jуртын арутап ремонт эткилейт, кезиктери тӧрӧӧндӧрине айылдап барат, кем де санаторийлерге, балдар лагерьге баргылайт. А кем де су-кадыгына аjару эдип, бош ӧйдӧ эмденип, эмчиликтер сайын jорыктайт.
Мен бу jайдыҥ jакшынак кӱнинде су-кадык корыырыныҥ байрамыла бистиҥ Кан-Оозыныҥ эмчилигинде иштеп турган эмчилерди акту кӱӱнимнеҥ уткыйдым! Албаты-jонго тузалу, оору-jоболдоҥ канча улусты аргадаган эмчилерге баш болзын! Анчада ла тиш, кӧс, кулак эмдеер эмчилерди аҥылар керек. Ары jанынаҥ кудай берген, быйанду колду эмчилер амыралтазы jогынаҥ иштегилейт. Ченемели jаан тиш эмдеер эмчиниҥ Бакрасова Алтынай Михайловнаныҥ иштегени удай берди. Эмчиликте бу келин jаҥыскан иштеп кӧп улуска быйанын jетирген. Эмди олор экӱ де болзо, улус Алтынай Михайловнага эмденерге албадангылайт. Эмчиниҥ быйанду ус колдоры ооруны эмдеп салат. Алтынай Михайловнаны ла оныҥ болушчыларын байрамла уткуп турум! Олорго бек су-кадык, сын-аркагар jеҥил, ырыс jаныгарда, айыл-jурттар амыр болзын! Тоомjыгар улалзын, оҥдоп jӱргенерге алкыш-быйан!
Узак ӧйгӧ иштеген ле эмди амыралтада да болзо иштеп jаткан кӧстиҥ эмчизи Канарина Валентина Алексеевна база аҥыланат. Ого jылу сӧстӧр айдар кӱӱним бар. Бу jымжак, jалакай, буурзак келин кӧп улуска быйанын jетирет. Валентина Алексеевнаныҥ ачынганын, тынзынганын бир де кӧрбӧзиҥ! Ого келзеҥ токуналу бойы кӧзинди шиҥдеп, эмдер бичип, jартамал берер. Ар-буткенниҥ кижиге берген эҥ ле jаан сыйы – кӧс! Кӱнниҥ чыкканын, ашканын, jажыл ӧлӧҥди, кӧк теҥерини, jылдыстарды, улусты – ӱзеле немени кӧрӧргӧ кӧс керек. Оны кадык болзын деп, кӧстиҥ эмчилери jаан иш эдет. Валентина Алексеевнаны база байрамла уткуп, су-кадык, Алтайынаҥ алкышту, улуска мындый ла тузалу, ол ло бойы jалакай, ачык-jарык болзын деп кӱӱнзейдим!
Эмчилердиҥ байрамыла канча jылдарга Кан-Оозы аймактыҥ эмчилигинде иштеген врач-терапевт Куранова Клара Федоровнаны уткуп турум! Бӱдӱн аймакта jаткан улусты jаҥыс терапевт-врач Клара Федоровна эмдеген, кӧп улуска быйаны jеткен. Бойыныҥ ижине каруулу, jаан ченемелдӱ эмчи бастыра jӱрӱмин ижине берген. Кӧп операциялар бу кижиниҥ болужыла jакшы ӧдӧтӧн. Ол бойыныҥ билгирин ӧскӧ эмчилерге jетиретен, jартайтан. Эмди ол амыралтада, бала-барказына болужат. Клара Федоровна, слерге бек су-кадык, ырыс, амыр-энчӱ, балдарарга баш болуп, узак jаш jажагар деп кӱӱнзейдим!
Кажы ла кӱн каруулу иште турган эмчилерге, кажы ла кӱн улустыҥ тынын кооруп, тӱни-тӱжи иштеп турган кӧӧркийлерди, jалакай ус колдорды ла буурзак jӱрегерди улус качан да ундыбас!
Слерге ончогорго бек су-кадык, амыр-энчӱ, ырыс!