Энези Чугулчина Шалтырак Яковлевна бастыра jӱрӱмине колхозто уй саачы болуп иштеген. Озочыл ла jедимдӱ ижи учун кӧп грамоталарла кайралдаткан. Jаҥыскан эки уулын чыдадып, ӱредип, айыл-jуртту эделе, баркаларын кӧрӱжип, Миша уулында jадып, кӧп jаш jажайла, ол алтайга jӱре берген.

Михаил Мюльдашевич Моты-Оозыныҥ школын божодоло, колхозто уй кабырган, оноҥ 1975-1977 jылга jетире черӱчил молjузын бӱдӱрген. Куран айда 1978 jылда Абаканныҥ кӱӱлик училищезине кирип, 1980 jылда оны jедимдӱ божодып, ижин Моты-Оозыныҥ культура байзыҥында художественный башкараачынаҥ баштаган. Ол ӧйдӧ Арбаева Галина Чумовна клубтыҥ jааны болгон. Ол школдыҥ ӱредӱчилериле ансамбль тӧзӧп иштеген. 1981 jылдыҥ ӱлӱрген айынаҥ ала Кырлык jурттыҥ культура байзыҥына художественный башкараачыныҥ ижине кӧчӱринген, jааны ол тушта культураныҥ нерелӱ ишчизи Валентина Шурулаевна Мюсова болгон. Керектӱ кӱӱниҥ инструменттерин алып, "Эзен" деп ансамбль тӧзӧгӧн, ондо Токов Андрей, Шагаев Руслан, Токов Эзен, Трыхманов Эжер иштегилеген. Концерттиҥ јилбилӱ программазын тургузып, аймакла, областьтыҥ jурттарыла jоруктаган. Агитбригада тӧзӧп, концертти, киноны кӧргӱскенче, стенгазетаны илип, турлуларда, тайгада политинформация ӧткӱргилейтен. Оноҥ аймактыҥ культура бӧлӱгиниҥ баштаҥкайыла, 1993 jылда сыгын айда аймактыҥ сургалдыҥ школына концермейстердиҥ ижине кӧчӱрилген. 1977 jылдаҥ ала школдыҥ ижин jедимдӱ ле билгир Анжелика Борисовна Молчоева башкарат. Олордыҥ баштаҥкайыла, сургалдыҥ ӱредӱчилериниҥ ансамбли "Чарас" тӧзӧлгӧн. Олор аймактыҥ мероприятиелеринде туружып, республиканыҥ кӱӱлик конкурстарында ла фестивальдарда туружып, "Лауреаты I, II степени" деп атла кӧп катап адаткан. Бу ла jылдарда культураныҥ ат-нерелӱ ишчизи В.Е. Кончевтиҥ республикан оркестри тӧзӧлип турарда, анда jоруктап туруп база иштеген. Ол бойы Г. Елемованыҥ "Уулдыҥ кожоҥы", А. Арбаеваныҥ "Орой кӱс" деп ӱлгерлерине кӱӱ чӱмдеген. Кан-Оозыныҥ культура байзыҥында "Jаҥар" деп фольклорлык ӧмӧлик тӧзӧп, аккомпаниатордыҥ ижин база апарат.

Узак jылдарга кожо иштеген культураныҥ ат-нерелӱ ишчизи В.А. Енчинов айдат: "Бистиҥ Михаил ак-jарыкка тегин ле келбеген, амаду-кӱӱни ару ла кеен jайылган jайалта. Кӧксинде куулгазын кӱӱ конгон алтай эр, колына баян алганда, кеендик телекейдиҥ агару jажыдын, оҥбос jӱрӱм ончо jаражын муза конгон jӱректеҥ кӧӧрӧм кӱӱле jыҥырада ойноп ийер jайалталу, jарашка ла jакшыга jайалган кӱӱчи-музыкант. Ого "Алтай Республиканыҥ культуразыныҥ ат-нерелӱ ишчизи" деп атты берери ижиниҥ турултазыла jедип калды".

Михаил Мюльдашевич эжиле Надежда Калбовнала кожо эки уулды чыдадып, айылду-jуртту эдип салды. Аржан уулы Абаканныҥ культура кӱӱлик училищезин, Барнаулдагы культураныҥ ла искусствоныҥ академиязын божодып, адазыныҥ jолын улалтып, городтыҥ баштапкы кӱӱлик школында домбра, гитара, топшуур аайынча ӱредӱчи болуп иштейт.

М.М.Чугулчин текши иштеген стажы – 47 jыл, культурада – 41 jыл. Узак иштеген ижиниҥ турулталарыла аймактыҥ, культураныҥ республикан министерствозыныҥ, Эл Курултайдыҥ, Алтай Республиканыҥ почетный грамоталарыла кайралдаткан.

Культураныҥ ишчилерин байрамыла уткып, бектеҥ бек су-кадык, jайандыкту ижинде бийик jедимдер, айыл-jуртыгарга амыр-энчӱ ле ырыс кӱӱнзейдис!