Улаган аймактыҥ администрациязында јаан јашту ӧрӧкӧндӧр ортодо алтай чӱм-јаҥ керегинде јуун ӧтти. Бу јуунды башкарып, албатыны јууп ӧткӱрген кижи – ака јайзаҥ, алматтардыҥ јайзаҥы Степан Иванович Ельдепов.
Јуунга чогулган улустыҥ тоозы 25 кижи болды.
Сӧс айткан улустар: Айдар Иванович Тазрашев – Государстволык јуун - Эл Курултайдыҥ депутады, тӧӧлӧстӧрдиҥ јайзаҥы; Альберт Калистратович Чулунов – тӧӧлӧс сӧӧктӱ; Олег Кимович Асканаков – иркит сӧӧктӱ, алта чӱм-јаҥ јаҥдаачы; Владимир Петрович Попошев – кыпчактардыҥ јайзаҥы; Виталий Исакович Адыкаев – кӧбӧк сӧӧктӱ; Леонид Ильич Тойдонов – оргончы сӧӧктӱ, алтай чӱм-јаҥ јаҥдаачы; Сергей Николаевич Сартаков – оргончы сӧӧктӱ, эл-јондык Советтиҥ председатели; Эркемен Олчонов – иркиттердин јайзаҥыныҥ болушчызы; Байрам Сандяев – оргончы сӧӧктӱ, алтай чӱм-јаҥ јаҥдаачы, онойдо ок јаан јаштулар: Александра Байрымовна Кончубаева ла Зоя Андреевна Акчина.
Бу јуунда мындый сурактар кӧдӱрилген: кижи божозо, канчанчы кӱнде мӧҥкӱзин кӧдӱретени, столго јӱзӱн-башка салаттар, аш-курсак салбас – ол кӧрмӧстиҥ курсагы дежетен, кӧчӧ лӧ мӱн болор керек, ачу аш урбас, апарбас. Јииттер айыл-јурт тӧзӧӧргӧ бириксе, олордыҥ кудазына канча кижи барар керек, тургуза ӧйдӧ барып турган улустыҥ тоозы 50-неҥ ала 70-ге јетире, олордыҥ ончозын курчабай 7- 8 ле кирези јаан, јуук тӧрӧӧндӧрине курчаары, кудага апаратан ачу-аштыҥ тоозын астадары, байрамдарга ла той-јыргалдарга да оогош бала-барка ээрчитпези, кудаларды курчайтан кур 2,5 метр сыйса бӧс болоры.
Алтай албатыныҥ чӱм-јаҥын алганда, мында да кӧп сурактар бар, темдектезе: јаламаны канайда, кандый ӧйдӧ буулайтаны ла оноҥ до кӧп сурактар чыгат.
Степан Ивановичтыҥ айтканыла: "Редколлегия тӧзӧп, бу сурактарды бастыра јаба албаты-јон бир аай кӧрӱп, база катап јурттарла јорыктап, јуулыжып, јаан јаштулардыҥ айтканын угуп, бирлик сӧскӧ келер керек деп сананып, бу сананган кӱӱн-санааны кепке базып чыгарар деп амаду бар. Албаты-јон, келип јаткан јашӧскӱрим бойыныҥ чӱм-јаҥын кычырып, билип, оноҥ ары бала-барказына јартап таркатсын. Керек дезе балдар бойыныҥ су алтай тилин, чӱм-јаҥдарын ундып барып јат. Јайзаҥдар јуунга нениҥ учун келбеген? Јаҥыс ла "мен јайзаҥ" деп айдып турган јайзаҥдар не керек? Јуунга келгендердиҥ тоозында јӱк ле тӧӧлӧстӧр ло алматтардыҥ јайзаҥдары болгон. Газетке јар озолондыра салылган болгон, айса "бистиҥ улустар газет алдыртпай јат па" - деп сурак турат? Јаан јаштулар газет ажыра јарды кычырала келгендер".
Бойыныҥ кӱӱн-санаазын чыгара айдып, кожо јӧмӧжӧргӧ турган, ол эмезе бу сурактарла јӧп эмес, эмезе кандый бир сурак кӧрӱлбей артып калган болзо, Степан Ивановичке баштанзын деп кычырып турубыс, јартамалды бу номерге телефон согуп угыгар: 8-913-999-17-58, ол эмезе бойоордыҥ кӱн-санаагарды "Улаганныҥ солундары" газет ажыра бичип салыгар. Тел. (22-6-75)