Балыктујулдыҥ А.Н. Калкинниҥ адыла адалган балдардыҥ кеендигиниҥ сургалыныҥ бије бӧлӱгиниҥ "Таҥ Чолмон" ӧмӧлиги тулаан айдыҥ 13-15-чи кӱндеринде Маймада Ада-Тӧрӧл учун Улу Јеҥӱниҥ 75 јылдыгына учурлалган аймактар ортодо
ӧткӧн ХV-чи "Алтайдыҥ ижемјилери" ("Надежды Алтая") деп јайаандыктыҥ кӧрӱзинде турушкан. Ӧмӧликтиҥ башкараачызы - Санина Сынару Альбертовна. Олор бу конкурста ойто ло тӧрӧл аймагыныҥ адын кӧдӱргилеп, јеҥӱчилдердиҥ тоозында болдылар.
Кӧрӱ-конкурста "Таҥ-Чолмон" ӧмӧликтиҥ 5 јаштаҥ ала 7 јашка, оноҥ 9 јаштаҥ ала 11 јашка јетире эки бӧлӱк бијечилер турушкан. Маҥзаарыш, јӱрексиреш болгон ло. Ӱзеери бастыра аймактардаҥ јеҥӱ аларга келген тыҥ, јайалталу ӧмӧликтер јиит бијечилердеҥ бир де артпай, бойлорыныҥ узын кӧргӱскилеп, олордоҥ бир де артпай турдылар. Је андый да болзо, "Таҥ -Чолмон" ӧмӧлик республикабыс ичинде эҥ артык, јаркынду бијениҥ ӧмӧлиги деп катап ла кереледи.
Онойып, "балдардыҥ бијези" деп адалган кӧрӱ-ойынныҥ бӧлӱгинде 5 јаштаҥ ала 7 јашка јетире бијечи кызычактардыҥ бӧлӱги "ойно, комузым!" деген бијезиле баштапкы јерди ала соктылар. Кӱӱниҥ авторлоры Айана ла Алан Темеевтер. Сынару Альбертовна, "Таҥ-Чолмон" ӧмӧликтиҥ башкараачызы олорго кӱӱзиле ӱлешкениле јаан быйанын јетирет.
"Таҥ-Чолмонныҥ" экинчи бӧлӱги (9 јаштаҥ ала 11 јашка јетире кызычактар) "Ӧркӧниҥ бијези" бијеле экинчи јерде болдылар.
Учуралды тузаланып, ӧмӧликтиҥ башкараачызы "Таҥ-Чолмонды" јаантайын автобусла јеткилдеп турган аймактыҥ ӱредӱ бӧлӱгиниҥ јааны Ю.М. Кучалуга, Улаганныҥ культура бӧлӱгиниҥ јааны С.О. Санаага, Улагандагы балдардыҥ сургалыныҥ директоры Л.А. Натовага, Горно-Алтайск калада балдарды кӧрӱжип, башкарыжып јӱрген эне-адаларга А.В. Ультуркеевага , О.А. Кеденовага база јаан быйанын айдат.
Адакыда, аймагыстыҥ адын кӧдӱрген јиит бијечилерге эмди де бийик учуштар, јеҥӱлер кӱӱнзейдис.