кожоҥчылары, кайчыларына баштанып, проекттиҥ ӧдӧтӧн аайын ӧмӧ-јӧмӧ шӱӱжип, јол баштаган. Бу проекттиҥ тӧс амадузы – алтай калыктыҥ оос чӱмделгезиниҥ кебериниҥ бирӱзи - сӧгӱш јаҥарла јашӧскӱримди јилбиркедери, келер ӧйдӧ маргаан бӱдӱмине кӧчӱп, республкан кемине чыгары.

Јебреннеҥ бери, ӱйедеҥ ӱйеге улалып, бистиҥ ӧйгӧ јетире учурын ычкынбай једип келген сӧгӱш јаҥар эмди интернеттиҥ телекейинде. Сӧгӱш јаҥар – ол кожоҥ ажыра куучын-эрмекте (диалог) удурлажып, маргышкан оос чӱмделге. Эки кижи кожоҥ ажыра бой-бойыныҥ кылыгын кууп, чечеркеер, ол эмезе удурлажаачызын, анайда ок Тӧрӧл јерин мактап, оныла оморкоп, кӱӱн-санаазын кӧдӱрип, кӧкӱдер аргалу. Сӧгӱштиҥ турултазында эҥ чечен ле курч тилдӱ болгоны акалап јат. Бир сӧслӧ, сӧгӱш јаҥар – чечен тилдӱ, кӧкси байлу, јайалталу улустыҥ маргааны. Мыны кажы ла кижи кожоҥдоп болбос, кажы ла айалгага келижер сӧстӧр јаҥарчыныҥ кӧксинеҥ чыгып, тургуза ла кожоҥныҥ јолдыктарына салылып јат.

Бӱгӱнги тилле сӧгӱш - ол батл. Английский тилдеҥ келген сӧс "батл" калганчы ӧйлӧрдӧ биједе, кӱӱде, интернетте јар алынып, ӧйдиҥ агынынаҥ артпай турган болзо, бистиҥ албатыда, бӱгӱнги сӧстӧрлӧ айтса, сӧгӱш јаҥар - батл јебрен ӧйлӧрдӧҥ бери болгон. Оны озо-озо чактарда, каандар ӧйинде Калан ла Колонјы деп ӧткӱн, чечен ле курч тилдӱ кожоҥчылар болгоны керелейт. Онойып, бистиҥ албатыныҥ кеендигиниҥ ле јайаандыгыныҥ недеҥ де јилбилӱ оос чӱмделге байлыгы бӱгӱнги бистерге чеберлелип јеткени – ол баалу ла тереҥ учурлу энчи. Чындап та, сӧгӱш јаҥар ӧскӧ дӧ албатылардыҥ оос чӱмделге байлыгында бар деп темдектебеске болбос.

Јонјӱрӱмдикте сӧгӱш јаҥар кезек ӧйлӧрдӧ јокко бодолып, јылыйарга јастаган да болзо, албаты оос чӱмделгезиниҥ байлыгын сезип, тӱӱкиде арткан изине тайанып, јӱрӱм бергени – јакшынак ууламјы. Мынаҥ озо јылдарда орныктырылган сӧгӱш јаҥардыҥ маргааны кандый бир албатылык байрамда ӧдӱп турган болзо, бӱгӱнги кӱнде – ол интернеттиҥ телекейине чыгып, јаҥы тыныш алынып, јаҥы кӧрӱмле берилет. Ада-ӧбӧкӧӧстиҥ чӱмделге байлыгы јаанды да, јашты да јилбиркедип, эҥ ле солуны проекттиҥ учы јаба болорына ижендирет. Ол бир кӱнниҥ проектти эмес, а келер ӧйдӧ ӧзӱм алынып, культуралык јӱрӱмисте бийик кемине чыгары темдектелет.

Кӱӱк айдыҥ 25-чи кӱнинде 8 саат эҥирде интернетте: youtobe каналда, социальный сетьте @VIK.VIK_KONUSHEVA бӱкте Сергей Табулгин ле Антонина Тойдонова ортозында сӧгӱш јаҥар – батл ӧдӧр.