Ноябрь 4-те Улуг-Хем кожуунда иштики херектер албанының чанында хөй-ниити чөвүлелиниң кежигүннери "Дежурный кезээнге бир хонук" деп республика чергелиг акцияга киришкен.
Ол хүн дежурный кезээниң шагдаалары: полицияның старшиназы Мирослав Достан, полицияның биче сержантызы Доржу Салчак база патруль шагдаалары Нима Ооржак, Аяс Ооржак, Самбажык Монгуш-биле кирген дыңнадыышкыннарже оперативтиг хыналда үнүүшкүннерни чоруткан. "Ажыл-агый аайы-биле эскерип көөрге, айның 9-10 хонуктарындан эгелеп, пенсия үлеп эгелээн хүннерде арагалаашкын, корум-чурум, кем-херек үүлгедиишкиннери көскүзү-биле эгелей бээр. Чонувус эвээш-биче хөреңгизин алгаш ижип эгелээр, бо хонуктар дүшкүүрлүг болур-дур" деп шагдаа ажылдакчылары чугаалап турдулар.
Дежурный кезээнче дыңнадыышкыннар аразында, кезек болгаш-ла кудумчуда кылаштажып чоруур кижилерге ужуражып, профилактиктиг чугааны чорудуп, шииттирип чораан азы шенелдеге хосталып келген учета кижилерниң бажыңнарын кезип, хоорайның девискээриниң ол-бо черлеринге хыналдаларны чоруткан.
Байырлалдар хүннеринде арага аймаан сатпас дугайында хоойлу үрээшкини хыналда үезинде илереттинмээн. Шагаан-Арыгга бир бажыңның гаражының ишти өртени берген, бир суурга арагалаан түңнелинде бижектеткен херектерни санаваска, кожууннуң девискээринге онза аар кем-херек үүлгедиишкини болбаан, байырлал хүнү өршээлдиг эрткен.