Кирьдса кядьсон А. С. Малькинонь "Панжада седихть" стихонь сборниконц. Лувсайть тяста сонь стихонзон - мяльце кеподи, петеви седице, сайхть прязт пара мяльхть. "Морайхть атёкшне" стихотворенияса сон сёрмады:

Мон ся ломанть кельгса, кие

Содасы эсь ремесланц,

Лямбе кядьса пара тии

Кадсы лемонц модать лангс...

Лувсайть сонь стихонзон и приметасак, што синь морокс моравихть. Кепотьксонди сявсаськ стихонц "Дарюня":

Ули Кяшалса стирня

Ёфси пяшень куймоня,

Аньцек клубу сон сувай

Озай шири и нувай...

Или:

Якань-якань, ялганякай,

Пиче порав.

Тоса кельгонь, ялганякай,

Мон од цёра...

Азф стихотворениятне шарыхть народнай мороке. Сявомок тянь мяльс, "Дарюня" стихонц коряс мокшень композиторсь Г. Сураев-Королев ладясь мора и путозе музыкас "Ули велеса стирня" лемса.

А. С. Малькинонь лирическяй произведениянзон шири шарфнесть оцю мяль композиторхне. Сембода лама тисть тянь ширде Мордовиянь композиторхне Г. Павлов, Г. Сураев-Королёв. Ламоц стихонза путфт музыкас и синь кода-бди шачсь омбоце эряфсна. Синь тянемс морсевихть сценатнень лангса. А, вов морось "Косат, косат акша сёрал" ульсь пяк популярнай М. Антоновать репертуарса.

Тя страницаса печатласаськ А. Малькинонь стихонзон лангс ладяф кой кона моротнень.

~~~~~~~~~~~~~~~~

Ёмла музыкантт

Валхне А. Малькинонь, музыкась Г. Павловонь

Тон, столица, мазы морса

Тяни гайняк сяда лац, -

Од ульцяват виде стройса

Сембе мольхтяма парадс.

Аськоляк, аськоляк,

Ёмла музыкант, -

Велева, паксява

Мора сай киганк.

Од таланттне салда шиса

Касыхть, кода садса макт,

Алянь масторонь столица,

Кайги мароньконь примак.

Мазы крайняй, алянь мастор,

Тондейть астама привет,

Мес аф машты лихтибрястот

Маконь валомс ару ведсь.

Тяса мокша, эрзя велень

Морай церанят, стирнят.

Кайги алянь масторть келес

Музыкальнай интернатсь.

~~~~~~~~~~~~~~~~

Мес тон, цёра, ётнят вакска?

Валхне А. Малькинонь, музыкась Г. Сураев-Королёвонь

Мес тон, цёра, ётнять вакска,

Лангозон аф ванондат?

Мес тон ськамот куду яксят,

Малазон аф лядондат?

Малазон аф лядондат-

Сединязень лазондат.

Али зарякс мон аф палан,

Стирень кядне кельмонят?

Али седицень исть сала

Ару менель сельмоне?

Ару менель сельмоне,

Виде ронга пильгоне.

Али коське поюкс касонь,

Вармать эзда тарондан?

Али, цёра, вень ульцяса

Мельгат мон аф шарондан?

Мельгат, цёра, шарондан,

Аньцек лангозт ванондан.

Али славазе монь цёлак, -

Велеть келес срадонды?

Али шиса-тевса нолан,

Ялгада мон лядондан?

Ялгада аф лядондан,

Пара слава кадондан.

~~~~~~~~~~~~~~~~

Од кизонь мороня

Валхне А. Малькинонь, музыкась Г. Сураев-Королёвонь

Касы паргана кузня

Маласа вирняса,

Кода весяла стирня

Сянгяря руцяса.

Ой, кузня, кузня, -

Весяла стирня.

Сай Од кизось и кузнясь

Наряжай сияса,

Ули пара инжиня

Классозень кучкаса.

Ой, кузня, кузня,-

Весяла стирня.

Кода весяла стирня

Вандолды руцяса,

Морай школаса кузнясь

Шабань кругоняса.

Ой, кузня, кузня, -

Весяла стирня.