Вармазейка велесэ улить кедьчелькев ават, конат весе юткошкаст алтыть викшнемантень. Сынст ютксо Анна Максимовна Чучадеева ды Надежда Федоровна Семенова.

Те тевентень Анна Максимовна тонадсь эйкакш пингестэ.

-Те тевесь аволь стака, улезэ ансяк мель ды бажамо, - ёвтни авась.

Велесэ тевтне певтеметь, арасть пест а тунда, а кизна, а тельня. Весе тевтнень лангс апак вано, Анна Максимовнань саты шказо викшнемскак. Те шкане сонзэ седеезэ кенярды ды потмоёжозо витеви. Телевизоргак а ванны тевтеме. Кедьсэнзэ свал салмукс.

- Вишнемкантень покш мель яван. Те тевесь тень пек мельс тукшны. Те шкасто, стувтовить весе сизематне, апаротне, ойметь шождалгады! – видькстась авась.

Сон рамси викшнемань анок схемат, эрьва важодевксэнть лангс ютыть кавто-колмо ковт. Мейле кочки мазый рамка.

Бути Анна Максимовнань викшнезь весе картинанзо понгавтомс кудонь стенатнева – карми теке музей. Ёроков авась викшнесь локсейть, конат укшныть сэнь эрькеванть, мазый цецяпусмот ды ламо лия мезе.

Викшнемантень велесэнть яви мель ещё Надежда Федоровна Семенова. Сон эрьва кодамо тюсонь суринетнень вельде вечки викшнеме церьковат. Весе важодевкстнэ валдот ды казить лембе.