2023 иесь Владимир Владимирович Путинэнь Россиянь Президентэнть мереманзо коряс яволявтозь Педагогонь ды наставникень иекс. Те эрявикс ды покш тевенть марто сюлмавозь ламо ломанть, ламо профессият. Прявтось эйстэст – тонавтыцятне. Куш кодамо велесэ, ошсо школасо тонавтыцятне, педагогической трудонь ветерантнэ, конат весе эрямост алтызь а шожда, пек эрявикс тевентень – эйкакштнень кастомантень ды тонавтомантень – те покштояк покш сюпавчи.

Елена Николаевна Дорофеева Ташто Чамзань основной школасо эрзянь келенть тонавтсь колоньгеменде ламо иень перть. Те велесэнть сон чачсь, якась школань васенце классос. Школанть прядомадо мейле тонавтнесь МГУ-со. Тонавтыцякс важодема кизэяк ушодовсь тиринь велесэ.

Важодемань васенце читнестэ саезь Елена Николаевна саизе превс ды кемекстызе эсензэ туртов истямо обуцянть – мизолксось кежтнень ды ацирьгалеманть коряс ламоксть седе виев. Секскак, эйкакштнень марто свал муиль кель-вал, эрьванть чарькодилизе, эрьвантень лездыль.

- Видьстэ ёвтаса, эрзянь келенть мон пек вечкса, ды эйкакштненьгак тонавтынь эсь раськень келенть, культуранть ды койтнень-кирдатнень вечкеме. Кеман: бути ванстсынек эсь тиринь келенек ды культуранок, минь ванстсынек эсь раськентькак, - толкови Елена Николаевна.

- Елена Николаевна чарькодилизе эрьва тонавтницянть, редилизе эрьва эйкакшонть содамочинзэ, ёрокчинзэ ды мелензэ-бажамонзо. Уроктнень ветиль истя: покш мельсэ кунсоловоль ды важодевель эрьвась, - ёвтнить икелень тонавтницянзо Екатерина Пьянзина ды Татьяна Астафеева. – Уроктнень снартнесь теемс седе мельстуицякс.

Сон парсте соды: тонавтыцянть васень тевезэ - эрьва эйкакшонть эйстэ кастамс алкуксонь ломань.

- Важодемазо максыль а берянь невтевкст. Сонзэ тонавтницятне свал парсте невтнесть эсь содамочитнень тиринь келень ды литературань коряс пелькстамотнесэ ды олимпиадатнесэ. Ламоксть лиснинек изницякс ды призёрокс райононь олимпиадатнесэ. Ульнинек изницякс республикань олимпиадатнесэяк, - ледстни Алёна Дорофеева.

Эрзянь келень тонавтыцясь тонавтсь эйкакштнень эсь раськенть, сонзэ ине подвигтнень кисэ покш каштанчисэ аштемантень, тиринь эрзянь келень ды чачома масторонь вечкемантень.