Тонавтыця ялгам Н.А.Чучадеева, тердекшнимизь школасо 3-це класснэсэ ютавтомс "Монь кудораськем" панжадо урок-налксема. Пелькстасть кавто командат: "Лопине" ды "Пейделька". Панжинек уроконть "Эрзянь кель" моронть морамосо. Аламнешка ёвтнинь тонавтницятненень А.П.Рябовдо. Доминосо налксемасо ледстинек, кода эрзякс мерить кудораськесэ эриця ломантненень. Ёвтнинь эйкакштнэнень, мезе те раськесь, невтинь эсень теевть авань ды тетянь ёндо минек буень чувтотнень. Тешкстынь, кода паро содамс эсь раськень ломантнень лемест ды тевест. Зярс ули кинь кевкстнемс эсь роднядонть, эряви те эрявикс тевенть теемс. Эйкакштне невтнесть эсест кудораськень фотот, ёвтнесть эсь семиядост. Вадрясто те тевесь лиссь Пьянзина Ульянань ды Горбунова Софьянь. Ульнесь тень пек мельспаро, зярдо эрьва командась морызе "Авай – это мама" морынем. Морынек эрзянь раськень мороткак. Ютавтынек "Прякинеть" физкультминутанть. Эрьва тевенть кис командатненень путневсть баллт. Настя Пьянзина ды Надя Краснощёкова мик 10 баллс ловность эрзякс стихотвореният. Ловинек пурназь баллтнэнь, ды эрьва командантень максозель "Шнамонь конёв". Меельцекс весе вейсэ морынек "Тиринь ёнксом" моронть. Ёвтан сюкпря Г.Н.Пашкова тонавтыця ялган туртовгак. Кода тень вечкевсь неемс сонзэ монь уроксонть!

Путодо мель тиринь эрзянь келентень! Тонавтнеде сонзэ! Кортадо сонзэ эйсэ! Седе ламо содадо эсенк раськеденк!