Тевтне тесэ ушодовсть мартсто. 1975 иестэ стявтозь кудось вешсь педе-пев витнема. Неень шкантень тесэ анокт вальматне, валозь кияксось ды курок прядови латонть вельтямозо. Зярс тосо моли музеенть туртов од таркань анокстамось, минь саинек мель ёвтнемс тесэнь экспонаттнэде.
Ванстомс, нама, ули мезе. Тесэ 30 иень перть таштазь зняро сюпавчи, конадонть саты пештямс покш музеень лавсят. Райононь историянть ванстомо ды пурнамо 1994 иестэ кармась Николай Иванович Макаров, кона ушодызе те тевенть, меремс, васенце эскестэ. 1995 иестэ саезь 2023 иес важодсь музеенть прявтокс. Цёрась весе пингензэ ды оймензэ путызе те эрявикс тевентень. Николай Иванович экспонаттнэнь кармась пурнамо 1994 иень сёксестэ. Васняяк мольсь военкоматов, тосто вешсь Ине Отечественной войнасо, Афганистансо ды тюремань лия таркатнесэ чавовозь солдаттнэнь анкетаст. Мартост кармась яксеме неть солдаттнэнь малавиксэст кудова, пурнамо материал – казнеть, военной формат, документт, сёрмат… Низэ муезь-максозь нулатнень кудосо муськиль-гладиль, бути эрявиль, пандтнилинзеяк. Васень музеесь ульнесь вельсоветсэ. Ней те кудосонть райононь прокуратурась. Витринатненьгак музеенть панжомадо икеле теинзе сонсь мейстэ понгсь: ташто партат, а эрявикс лазпеть, натой потолоконь плиткат – весе тусь тевс. Ярмакт кияк эзь явокшно. Кительтнень ды мундиртнэнь туртов васенце манекентнэньгак теинзе сонсь папье-машестэ. Стеклорезсэ керсесь суликанть, стенатнева эрявикс таркава понгавтнесь экспонаттнэнь. Сырнень кедтне ды вечкевикс тевсэ палыця седеесь теизь эсь тевест, ды 1995 иень майстэ Покш Игнатовасо панжозель Боевой славань музеесь.
Теде мейле сон кундась краеведениянь отделэнь тееме. Велеванть ушодсь пурнамо ташто курмот-кармот, чувтонь кедьёнкст ды ламо лият мезть. Лиясто ветькак савкшнось ташто нулатнень пурнамс, конатнень ёртылизь ломантне, эрьва муевксэнтень теке вишка эйкакш кецнесь. Васняяк, таркань аразде, весементь кандтнесь эсензэ гаражс, истя кекшсь эйсэст пиземетнеде-ловтнеде.
Шкась мольсь… Николай Ивановичень аравтызь Творчествань кудонь прявтокс. Боевой славань музееськак вельсоветстэ мартонзо ютась тов. Ды аламо шкань ютазь, Боевой славань нупаленть вакссо панжовсть краеведениянь ды выставкань залонь нупальтне. Неень шкантень тесэ пурназь 1000 ламо экземплярт. Ней музеенть прявтокс ды тесэнь историянть ванстыцякс важоди Ольга Владимировна Сунина. "Минек музейсэ ней молить витнемань-петнемань тевть, секс бути ансяк экспонаттнэнь ванносынк, конат мейле ютыть витнезь нупальтнес", – мерсь Ольга Владимировна, ды минь мельспаросо чопавтинек райононь историянтень.
Тесэнь шкинемань ломантнень тевест
Выставкань залсонть аштить чувтосто керсицянть Александр Наумовонь 63 скульптуранзо, ютксост – эсензэ ды аванзо автопортреттнэ. Резчикенть куломадо мейле Николай Филатов скульпторось теизе Наумовонь бюстонзо ды казизе Покш Игнатовань музеентень. Стенатнень кувалт аштить художникенть-самоучканть М.В. Левщановонь содавикс картинасто копиянзо. Сонензэ, келя, юбилейс казекшнесть артомапельть ды сыре ломанесь пенсиясо кармась тееме клеткань коряс репродукциясто картинань копият, конат ней мазылгавтыть музеенть. Тесэ истя жо ашти Анатолий Барговонь мольбертэзэ, конань максызе зярыя картинанзо марто. Улить содавикс писателенть Александр Доронинэнь нинзэ, Полина Михайловнань, картинанзояк. Истя жо лався лангсо путнезь мастерэнть А.И. Смирновонь чувтонь пенчензэ. Залонть куншкасо эйкакштне ней анокстыть СВО-в алтымат.
Ванстыть "мундирэнь честенть"
Боевой славань а покшке нупалесь ёвтни райононь геройтнень подвигест ланга. Тесэ невтевить казнест, военной оршамост, фотографияст, сёрмадозь подвигень историяст. Музеенть покш каштанчикс ашти 1903 иень покш фотографиясь, косо снимазь Кексгольмской полконь Лейб-гвардиянь солдаттнэ ды офицертнэ. Метрань келесэ ды пельметрань сэрьсэ фотосонть – 1216 ломанть, конатнень чамаст пек парсте неявить нейгак. Сядодо ламо иетнень перть фотоконёвось эзь ола ды эзь паморе.
Кезэрень ды советской шкатне
Краеведениянь нупалесь сехте сюпав. Тесэ кода умонь шкань, истя жо советской шкань экспонатт – комодт, васень телевизорт, коляскат, провод марто телефон, трельяж, пробкань счётчик, пионерской атрибутика ды ламо лия мезе. Кезэренсетнеде тесэ – човарт, балакирть, лампат, коцтонь кодамо стан, пряха, токарной стан, кудонь-кардазонь чапоманть ды паксясо важодеманть туртов чувтонь кедьёнкст, сока ды алашань туртов лия эрявикс пелькстнэ: панст, ашко, камбраз (седло), каршавт (сбруя), сярдонь кедень шлея, ождят... Оршамотнестэ ванстовсь Новокачаева велень авань панго марто палясь. Седе одтнэстэ – фуфайкат ды плюшовкат, конатнесэ сестэнь тейтерь-аватне наряжильть покш читнес. Свадьбав яла истят оршильть мазый платия ланга.
"Нарьгамонь" тевть
Тесэнь эрицятне бувалань кудонь чапицятнеде содыльть зярыя тамашань историят. Икеле шкатнестэ веледе велес яксесть плотникть, кудонь чапицят, налешникень теицят, каштомонь вачкицят. Велетнесэ эрясть кемень кевердицятне, кодамонь станоконь, пряхань ды лия чувтонь кедьёнксонь теицятне. Бути омбо велестэ сазь плотниктненень кудазортнэ максыльть аламо ярмакт, сынь тенст эсест ладсо пандыльть кеж. Чочконтень теильть апокшке варине, тозонь путыльть верек ал. Верев путыльть лия чочко, истя варясь пекставиль ды а неявиль. Зярс алось свежа, мезеяк, зярдо сон кушты, кудосонть карми молеме апаро чине. Апак сода алось а муеви, бути ансяк весе кудонть одс калавтсак… Эли кадыльть козоньгак апокш лазкске, конась чувтонть коськеманзо марто карми вешкеме, тосто карми пувамо кельме кошт… Вана истя "тонавтсть" скупой ломантнень.
Эрьва предметэнть эсензэ историязо, конань сёрмадомс лисить зярыя книгат. Нама, тевензэяк музеенть пек ламо: эрьва экспонатонть эряви сёрмадомс, максомс тензэ номер. Велень музейтнень эсест сюпавчист, конат а молить лиятнень ёнов. Ансяк тесэ кадовсь ине историясь, покш тевтне, конань тейнесть минек покштятне-сэрдятне. Нама, ней эрямонок пек шождалгадсь икеленсенть коряс. Паксянь тевтнень теи техника ды ламова кудонь тевтненьгак – сон. Киньгак кутьмерезэ а чулгсети алаша мельга сокань тулкадезь. Ды те пек паро. Икелень шкадонть жо эйкакшонок кармить содамо ансяк музеень нупальтнестэ, конань пурнызь тевсэ палыця ды тиринь ёнксонь вечкиця истят ломантне.