Петранень мерильть Рогов. Покштянень мерильть Биля. А содан, кодамоль Рила, а вана Роговонь фотографиянть монень невтизь – пек мазыель ломанесь. Кулось одсто. Ага нинзэ лангс кадынзе ниле тейтерензэ: Машконь, Дашонь, Просонь ды Танянь. Неть монь сыре патян. Колмотне уш арасть, Дашо патянень 97 иеть.
Инжекс патянень
Игнадвелесэ улемстэ вастневинь Дашо патянь марто. Иетнень лангс апак вано, превензэ валдот, мезеяк а стувтни, эсь прянзо мельга сонсь ваны, кудонь тевтненьгак тейни – ози пиресэ, саразт анды. Банясояк прянзо-рунгонзо те шкас сонсь шли-нарды, ансяк карязонзо човсевти. Аволь васоло эйстэнзэ эри Лида тейтерезэ Сергей мирдензэ марто – чизэнзэ зярыяксть токить тензэ. Ванан Дашо патян лангс ды паро мельсэ арсян: "Вана весенень бу истямо сыречи!". Куш пингесь тензэ сатотсь пек а шожда.
Зярс ульнинь кедьсэнзэ, кунсолынь икеле шкадо, эрямодонзо ёвтнеманзо, мезе-мезе тешкстнинь эстень конёв лангс. Монь истя токимизь ледстнеманзо – бажан весенень сынст пачтямс.
Икелень шкадо ёвтнема
...Роговонь кудораськесэ ульнесть кавто цёрат: кудазорось ды Гришо цёразо. Тейтерьаватнеде кудопотмо: Ага низэ ды, кода уш меринь, ниле тейтерть: Машко, Дашо, Просо ды Татю.
Монь покштям - Биля колхозонь теицятнень ютксоль, а вана Петра лелязо – Рогов колоньгеменце иетнестэ "гербовазель" - кудораськенек тусь Челябинск ёнов –заводонь стявтомо. Тусть васоло ёнксов се иестэнть, зярдо Андрейвелесэ церькованть калавтнизь.
Од таркасояк нужачись сатотсь тенст велькска. Эрясть бараксо. Баракось покш, кувака. 1939-це иестэ пансть ваксозост полякт.
Акувать ульнесь Рогов веёно. Цёразо превеель, редизе: заводсо седе беряньстэ кармасть андомост, кши сатышкасто столь лангс а путыльть. Чарькодсь: тевесь моли войнантень. Мелензэ-арсеманзо явинзе тетянзо марто. Решизь: сыргама кудо ёнов. Ансяк кенерсть велявтомс пизэнек Андрейвелев, ковонь ютазь войнась ушодовсь. Майсематне эзть кадно кудораськенть. Пирест кенерсть уш путомс лия ломанть, кудососткак эрясь лия ломань - колхозонь прявтось Гробов.
Гришонь саизь сельпос бухгалтеркс – превеель од ломанесь. Весть кучизь Гришонь пакет марто Вармазейкав ды Од Кшуманцяв. Ласте ардсь. Шкась ульнесь сёксень. Киланга косо псилгады, косо кельми. Ормалгадсь. Ага авазо куярт кандсь бахчасто – Гришо секе тев пшкади Дашонень: "Совавт куяр!" Куяртнэ кудыкеле – кельметь. Дашо вишка эйкакшонь превсэнзэ эзь чарькоде кельме куяронь апаронть, яла жалиль лелянзо – совавтыль тензэ куяр. Гришонь потмозо толкс палы – тесэ кельме куяр. Истя пингезэ сезевсь. Ковонь перть майсесь Моревкань больницясо, ноябрянь ветеце чистэ кулось.
Ормалгадсь сонсь кудазороськак, Пётр Павлович. Кулось 1945-це иестэ, кадынзе урозокс тейтерензэ.
Колхозсо важодема
Дашо кемнилее иесэ мольсь колхозов важодеме, ульнесь вазонь андыцякс – мельгаст ваныцякс. Ёвтни: "Самай саизь Елошкинэнь войнав – мон молинь фермав важодеме…" - Пингензэ перть мейле ульнесь дояркакс.
Сестэ вана, войнань ушодома иестэнть, Коротянь Мария марто примасть вазт. Се сёксестэнть ютасть виев пиземеть. Омёттнэ пачк кельместь – савкшнось сынст керсемс узересэ. Ускить кавонест кардс кельмезь олго – вазтнэ теке кошкседе порить эйстэнзэ. Ды эрьва чи кулыть. "Ускик калмазырев кулозь вазонть! – мери тензэ фермань прявтось. Дашо аволь калмазырев – кудов усксазо, авазо зярыя чить пиди тенст сывель марто ям. Истя вачо пекеде ванстовсть, эзть кулсе. Шабраст яла пшкадиль аваст туртов: "Ага патяй, моненьгак куш цютьке сывель максст!". – Кода а максат? – Свал шабравгак максыль сывель.
Ульнесь Дашо ёроков, эрьва ков кенериль. Вечкилинзе ракшатнень. Лоткавтылизе стедиця лишменть, конадонть пельсть цёратнеяк. Кунсолось эйсэнзэ 800 килограммань сталмосо бука. Те букадонть пельсть весе – сон кечкерицяль. Зярдо аватне ушодыльть скалонь потявтомо, Дашо панилизе буканть кардсто – киньгак илязо кечкере. Ды вана весть те букась оргодсь – киненьгак а паневи. Зярс кундсесть эйсэнзэ, пильгензэяк керизь. Панизь кардс – тосто букась а ливтеви. Пильгенть вана эряви лецямс. Ды сестэ Фенька атя ракшань лецицясь макссь Дашонень пикс: "Тонть сон кунсолотанзат, ливтик кардсто!". Тейтерькась совась кардс, сюлмизе пиксэнть буканть пряс ды ливтизе ракшанть. Цёратне вейкень пес кекшнесть кудопотс, вальмава вансть, кода толгань сталмосо тейтерькинесь вети буканть.
Кудораськест туртов эрямось свал стакаль, войнань шкане - седеяк стакалгадсь. Тунда ловось ансяк озы, вейкень пес капшильть вирев пекше лопань пурнамо. Тельня веть салазкесэ молильть вирев пенгс. Весть сявордызь аванзо марто чувтонть, кувалмозо кавтошка метрат. Керсизь гавдатнень-тарадтнэнь, пильсизь чувтонть. Пурнасть кудов. Киланга лоткавтызь, саизь салазкест, тандавтызь штрафсо.
Мирденень Тарзаннэнь
Голё бабань ульнесь скалозо ды вазозо. Зярдо кудотне-кардазтнэ палсть – ракшанзо савсь панемс колхозонь кардс, вейсэнь стадас. Вазонть максызь андомс Дашонень. Голё бабань Люба тейтерезэ мазыель, морсицяль! Сась весть Люба скалонь потявтомо – неизе Дашонь. Ды сеск шнызе лелянзо туртов одирьвакс. Чокшне састь лелят-сазорт Роговнень - вальмас стукить. Дашо вальмас – тосо палманьшка цёра. Те ульнесь сы шкань мирдезэ, Митрей. Велесэ ды районнэк мерсть тензэ Тарзан. Куроксто Дашо лиссь мирденень. Ульнесь те 1958-це иестэ, январьстэ. Ды кармась сон се шкастонть саезь аволь Куманева - Горбунова.
Д.Ф. Горбунов - апелиця ломань
Дмитрий Фролович Горбунов чачсь 1923-це иестэ. Тонавтнесь военной училищасо. Ютызе весе войнанть. Ве частьсэ ульнесь вейке земляконзо марто. Бойсэ ялгазо ранязель, Дмитрий Фролович ливтизе сонзэ ды зярыя вайгельбень тарка кандсь эсензэ лангсо. - Идизе куломадо. Войнадо мейле пшкадсь весть те ломанесте лездамс, - сон ульнесь начальникекс, - эрявсь кудолангонь вельтямка. Ялгазо сась: "Ну и что! Крыша у вас хорошая..." - Эзь лезда. Апаро ютась потмованзо, мерезевсь: "Мезень кис ансяк кандынь эйсэть сестэ бойстэ?.."
Смел ломань сон ульнесь, чарькодьксчизэ икелензэ мольсь. Ульнесь фронтсо истямо тев: сайсь пленс 20 немецть, ютксост чин марто немецкак. Те немецесь снартась оргодеме - саицяст туртов а мезель теемс - ледизе сонзэ. Нать, покшоль те немеценть чинэзэ - сонзэ кис Митреень кедьстэ саизь казнензэяк, погононзояк. Воёвась сон Новороссийскойсэ, Таманьсэ ранязель пряс - Северной Кавказонь ды Кубанень ламо госпитальга лецясть эйсэнзэ. Меельцепелев лецясть уш Кисловодскойсэ, МВД-нь санаториясо.
Войнадо мейле велявтсь кудов ды тагояк лиссь мартонзо апаро тев. Ялгазо салава макссь тензэ кавто кескавт товсюро - а мездель ярсамс, весе эрявсть саламонть вийсэ. Неицяст пачтясь теде вельсоветэв. Муизь салазь сюронть кудыкельде. Неть кавто кескавтнень кис кемень иес ильтизь Митреень Норильскоев. Сонсь соды, мезень пачк ютась. Мезе-мезе якшамо таркатнесэ эрямодонть ёвтниль шабрава-роднява, од ломантненень - сетне свал перь канзо пурнавильть. Нать, неть ёвтнематнень кис лемдизьгак сонзэ Тарзанокс - се шкава истямо лем марто кино невтсть велетнева.
Одирьва
Дашо ульнесь Митреень омбоце низэ, васенцесь кулось седей ормадо, эйкакшост арасельть. Ага - Дашонь авазо ды Митреень авась ялгательть, ававтось ульнесь Кутурункань родонь. Дашонь ускизь мирденть кудос лишмесэ - се шкава машинат пек арасельть. Ды кудоськак ульнесь аволь эсест - квартирас састь.
"Совинь те квартирантень - тосо мезеяк арась, васень нинть роднянзо мезест ульнесь - весе саизь. А модарька ярсамс, а оршамка кодамояк. Патям максы почт, шабрась максы оргат - истя вана кшить-мезть панилинь,- ёвтни Дашо патям се шкань эрямодонть. - Пенгть арасть, мезе усктано - пильсесынек-керсесынек - истя пидинь-панинь, лембе кирдинь кудосо. Ульнесь скалонок ды тёлкамок. Скалось пароль, покш кастрюля таштынь скалой. Машко патянь нилеце эйкакшозо, Люба, чачсь - ярсамс а мезде. Мон анокстынь тензэ кучомс скалой, те шкане совась тенек Митреень патязо - Анка (мон сонензэяк мерилинь патей). Неимим: максынь ой Андрейвелев, ёвтнесь теде Митрейнень. Сон чокшне монень превть путсь: "Рана командуешь!" - Шум кепедсь.
Тунда скалонть стадас панинек - пильгензэ синдизе, савсь сонзэ печкемс. Истя вана кадовинек ловсовтомо, ойтеме. Модарькат, эмежть путынек - сёксентень уш ульнесь мезе ярсамс. Аламонь-аламонь карминек виень пурнамо. Печкезь скалонть ды кавто тувот миинек - ушодынек кудонь строямо. Чапицятне берянельть, амаштыцят. Паро, сёксня сась Кемеровасто дядямок - Фрол атявтонь лелязо. Пек мелявтсь кисэнек ды сень кис, кода беряньстэ кепедизь кудонок. Кевкстни: "Мекс истя капшиде чапомо? Монсь тыненк кудонть стявтовлия..." - Алкукс, сон пек лездась - вальматнень теинзе, ламо лия тевть тейсь кудонть перька. 1959-це иень сёксня совинек уш эрямо. Октябрянь васенце чистэ топодсь иезэ васень эйкакшонок - Любань, ды теке чистэнть кулось каштом лангс дядямокак. А куловольгак - ламо мезе теевель минек кудосонть. Истякак пек лездась миненек. Лездаволь седе товгак - ансяк вана седейормась правтызе.
Ледстневи, строямо шкастонть сынек эрямо ававтнэнь - тосояк удомс тенек а косоль. Ливтсть пирес тенек тарка - кизэнь перть уцинек ушосо".
...Ламо мезе ёвтнесь тень Дашо патям, весе ве таркас а кельгстяви. Кизна, июньстэ, тензэ топодсь 97 иеть. Кувака паро пинге, стакачитнень лангс апак вано! - Паряк, кодаяк вана вастовтано - тагояк тень ёвтни кувака пингедензэ. Весе превсэнзэ кирди, мезеяк а стувты.
Шумбрачи теть, Дарья Петровна!