Вирь Тавласо Йовлань Олонь лемсэ "Этно-кудо" музеесь содави аволь ансяк республиканок келес. Ланганзо содыть весе Россиясо ды мик омбо масторсояк. Музеесь панжозь 2006-це иень таштамковонь 6-це чистэ. 2021-це иестэ "Этно-кудонтень" топодить 15 иеть. Секскак ютавтовиця важодемадо ды икелев молиця тевтнеде кортынек Пётр Рябов (Калаганонь Керяз) – Йовлань Олонь лемсэ "Этно-кудо" музеень прявтонть, "Эрьмезь" Вирь Тавлань чувтосто керсицянь вейсэндявксонь прявтонть марто.

- Пётр Владимирович, кода ютась те иесь музеенть туртов?

- Пек стакасто. Экскурсиятнеде ульнесть аламо, секс мекс покш полавтомат музеень важодемас кандсь коронавирусонь ормась, конань кияк зярдояк эзь учо. Теде икеле, якшамковсто саезь эйзюрковс миненек сакшность ламо инжеть Россиянь эрьва кодат оштнестэ. Весень туртов Раиса Водясова музеень важодицясь кода свал ютавтнесь мельстуиця кортамот Йовлань Оло (Владимир Ромашкин) содавикс морыцянть ды "Торама" фольклоронь морокуронть шкинеманзо коряс. Теде башка невтезель Вирь Тавлань чувтосто налкшкень теемань коряс тонавтома ды лия мезе. Ансяк стака орманть самонзо марто тундосто саезь кизэс важодемась лоткавтозель. Одов весемесь ушодовсь ансяк кизэнь куншкасто – медьковсто.

- Музейсэ топавтовсть шумбрачинь ванстомань вешематне?

- А кода эно? Минь свал топавттано весе вешематнень. Музеесь парсте шлявсь-урядавсь. Сон эрьва чи кирдеви ваньксстэ. Тесэ улить чамакст, перчаткат, кедень шлямкат ды эрьва мезе лия. Секскак пек кенярдынек, зярдо "Этно-кудос" одс ушодовсть инжень сакшноматне. Миненек мельспаро вастомс сыцят кода республикастонок, истя Россиянь эрьва кодат оштнестэяк.

- Кодат тевть теезельть кизэстэ саезь неень шкас?

- Истят тевтнеде ламо! Васняяк видеос сёрмадозель покш кортамо Александр Шаронов профессоронть марто. Мон ды Александр Маркович ёвтынек меленек-арсеманок "Исень саевть одирьвась" моронть коряс, конань моры Йовлань Олонь лемсэ "Торама" фольклоронь морокурось. Кортамонть ветясь Александр Учеваткин эрзянь цёрась. Весемесь путозь интернетс. Кинь ули мелезэ, кадык мусы, варштасы ды ёвтасы эсь арсеманзо. Теде башка, кизна "Вай кодамо" моронть коряс эсь васенце клипень снимамо ялганзо марто сакшнось Андрей Бочканов эрзянь од морыцясь, конань тиринь велезэ – Кацялай. Чинь-чоп полавтнезельть зярыя таркат, оршамопельть, киштемат. Ды пертьпельксэськак ульнесь вадря. Ней паро мельсэ учотано клипенть лисеманзо. Теке марто тесэ видеоклип снимась "Мерема" фольклоронь морокуроськак. А сёксня "Ламзурь" ды "Толава" фольклоронь морокуротне ютавтсть "Норовавань чи". Теде мейле музеенть снимамо сакшность Московсто, раськень тевтнень коряс Федеральной агентствасто. Инжетненень весемесь пек вечкевсь! Ве валсо, ламо паро тевть кенеринек теемс зярыя ковтнень перть. Ды истямо важодемась поладови седе товгак. Секскак музеесь свал панжозь весень туртов!

- А кодамо важодема арсеви ютавтомс тесэ седе тов?

- Эряви меремс, сы иестэ Йовлань Олонь чачома чистэнзэ топодевельть 70 иеть. Ды секскак 2021-це иесь алтави Йовлань Олонень! Ды теке марто "Этно-кудо" музеесь карми тешкстамо 15 иеть! Учовить покш тевть!

- Те пек паро! Пётр Владимирович, зяро инжеть сакшность музеев 15 иетнень перть?

- Весе шканть перть музеенть марто содавтовсть 95000 ламо сыцят. Минь ловтано эрьванть. Сы иестэ арсетяно вастомс 100000 инженть! Анокстатано ламо мезе. Эряви ёвтамс, кизна Вирь Тавлась пелькстась "Финнэнь-угрань масторонь культурань прявтош" пелькстамосо. Эйсэнзэ эсь пряст невтить финнэнь-угрань апокш велетне ды оштне, конат иень перть кармить лововомо финнэнь-угрань культурань невтемань прявт таркакс. Вана тедеде изнясь Абья-Палуоя эстононь ошось. Ансяк ялатеке мезеяк лангс апак вано сы иестэ минь арсетяно топавтомс икеленек аштиця весе тевтнень: ютавтомс "Вейсэнь ундокст" чувтосто керсицянь 3-це фестиваль, кортнемс Йовлань Олонь эрзянь ды мокшонь культурас покш путовксонзо ланга, нолдамс од ловномапель мазый фото марто, кона теде икеле косояк арасель, невтемс фильма ды лия мезе. Паряк, Саран ошсо карми панжозь Йовлань Олонь лемсэ куро. Тень коряс умок мольсть покш кортамот. Арсян, те улевель паро казнекс Йовлань Олонь валдо лемензэ ды тевензэ ледстнемга. Нама, таштамковсто Вирь Тавласо арсеви ютавтомс "Торамась терди" кезэрень эрзянь моронь 7-це фестиваль. Секскак сы иень сёксня весень тердтяно миненек инжекс!

- Кодамо лезкс эряви музеентень ней?

- Минь кенярдтано эрьва кодамо лезксэнтень. Секскак бути кармить ламо сакшныцят, сестэ ламот кармить содамо "Этно-кудонть" ланга, карми эрямо эрзянь келесь, культурась, койтне-кирдатне, Вирь Тавлась.

- Кочкурбуень культурань курось арси лездамс?

- Арси. Тей сакшнось Юрий Ваньков – Кочкурбуень раськень культурань ды тевветямонь Куншкакуронь прявтось. Кортынек витематнень тееманть ланга. Сы иентень эряви кенеремс теемс ламо важодема: музейсэ полавтомс киякстнэнь, кувалгавтомс кудыкельксэнть, мазылгавтомс весементь ушосто, одкстомтомс ортатнень ды лия мезе. Важодемась учови пек покш. Культурань куронть пельде лездамось карми эрявикс тевекс. Нама, свал лездыть "Эрьмезь" Вирь Тавлань чувтосто керсицянь вейсэндявкссо аштиця цёратнеяк. Ёвтан сыненст покш сюкпря!

- Зяро ней весемезэ ломанть совить "Эрьмезь" вейсэндявксонтень?

- Ней минек вейсэндявкссо аштить малав 30 цёрат. Чарькодеви, малав весе сынь Вирь Тавласто. Ансяк минек ютксо – чувтосто керсицят республиканок лия буетнестэяк. Эряви меремс, "Эрьмезентень" совакшнось Александр Наумов Покш Игнадбуестэ цёрась, ансяк зярыя иеде икеле сон кулось ды те, видьстэ меремс, покш ёмавтома минек культурантень. Теде башка, ютксонок ашти Александр Туркичёв (Туркичень Сантур) Пенза ёнксонь Шемышейка велень эрзянь цёрась. Сон ламоксть сакшны Вирь Тавлав ды свал ардтни чувтосто керсемань эрьва кодат пелькстамотнес. Сантуронь важодеманзо улить "Этно-кудонть" вакссояк. Вейкесь эйстэст – "Тетяка левкс", кона теезель зярыя иеде икеле.

- Пётр Владимирович, а "Этно-кудонть" ули эсензэ сайтэзэ, конань вельде музеенть ланга содавтовить седеяк ламо сыцят?

- Сайт – те пек паро тев. Ансяк минек сайтонок арась. Сонзэ ветямсто эряви аравтомс башка ломань, чарькодиця од цёра эли тейтерь, кона путневель эрьва чинь кулят, фотот, видеот, морот. Зярс истямо ломань арась. Кеман, паряк зярдояк сайтонок карми. Ды ёвтама, интернетсэ улить ламо кулят ды фотот "Этно-кудодо". Миненек тень коряс лезды Мордовия Республикань туризмань ды кулянь куншкакурось.

- Йовлань Олонь лемсэ "Этно-кудось" – республикасонок те, ловт, вейкине музей, косо кортамось ды содавтомась ветяви эрзякс. Косояк лия истямо арась. Те паро эли берянь?

- Видьстэ меремс, истямо кевкстема монень макснесть аволь весть. Монь койсэ, мезеяк парось тесэ арась. Вадряль, бути истят музейть улевельть Мордовия Республикань эрьва буесэ. Саемга, эрзянь буетнесэ содавтоманть ветявольть эрзякс, мокшонь буетнесэ – мокшокс. Ды, нама, Россиянь эрьва кодат оштнэстэ сыцятнень туртов весемесь ветяволь рузонь кельсэяк. Сестэ минек келенек, культуранок седеяк сюпалгадовольть ды эрьва музеесь явоволь лиянть эйстэ мазычисэ, эсь эрямосо, ютавтовиця койтнесэ. Содазь, республиканок ламо велетнестэ лиссть содавикс морыцят, сёрмадыцят, тонавтыцят. Секскак, бути ютавтомс покш важодема, сестэ Мордовиясо истят "Этно-кудотнеде" улевельть седеяк ламо. Зярдо-бути Йовлань Оло рамась кудыне Вирь Тавласо, сакшнось тезэнь оймсема шкань ютавтомо, важодеме, моронь пурнамо. Кудосонть свал ульнесть инжеть. Кортасть, седясть, морасть. Азоронть прясо секе тев ульнесть эрьва кодат мельть-арсемат эрзянь келенть, культуранть, койтнень-кирдатнень вельмевтеманть коряс… Ансяк аволь весементь лиссь топавтомс. Йовлань Олонь 51 иесэ эрямосто туемадо мейле кадовсть ламо валдо ды паро тевть. Секскак Кочкурбуенть туртов покш кеняркс поладомс весе арсематнень, конат сюлмазь содавикс морыцянть ды седицянть марто. Саемга, "Торамась терди" кавто иес весть ютавтневиця кезэрень эрзянь моронь фестивальс свал сакшныть ламо инжеть Россиянь эрьва кодат ёнкстнэстэ. Ды арсян, сисемеце фестивалесь тагояк пурны фольклоронь ламо морокурот. А "Этно-кудось" пешкеди валдо оймеде, кенярксов ёжодо ды эрзянь кельсэ гайгемадо. Кеман, "Заря" Кочкурбуень кулялопась карми лездамо кулянь ёвтнемасо ды сравтнемасо эрзянь кельсэ.

- Пётр Владимирович, покш сюкпря кортамонть кис. Арсетяно Йовлань Олонь лемсэ "Этно-кудо" музеентеень топавтомс весе арсематнень. Валдо мельть, паро тевть, икелев молема ды кувака эрямо!

- Сюкпря!