Сонсь Саня моли ветеце классос. Стамбарнэ, кува-кува налкставозь-сёвнозь, ялаксозо ульнесь андозь ды оршневтезь. Паро мельсэ братиники лиссть ушов. Ушоськак мерят анокстась те чинтень: маней, лембе, менельганть уить галань кувака толгань кондят пельнеть. Лесничествастонть, косо эрясть тетяст-аваст марто Санят-Минят, тусто вирьганть менчевемадо мейле яннэсь лиссь паксяв ды сеске келейгадсь, теке кувакасто таргизе оймензэ. Паксясонть модась ванькс сёвонь, чувар ды кев, паро ладсо лангсонзо мезеяк а касы, секс сонзэ умок эзизь видне-соксе, тикшеськак лангсонзо чуро ды алкине. А стяко мерильтькак тензэ Кадозь пакся.

Троксканзо ды кувалманзо вастневить апокш латкинеть. Сынст тейнизь чудикерькскетне, конат ловонь соламо шкасто ды пиземене чудить виренть ёндо аловпандт. Тия-тува касыть вишка пичинеть, килейнеть, пойнеть. Зяроце ие уш Саня некшни неть чувтынетнень, сынь жо яла секеть, вишкинеть. "Паряк, модась сынест берянь, секс а касыть", – эсь пачканзо арси цёрынесь.

– Минька, содат, кие озавтни неть чувтынетнень? – кевкстизе ялаксонзо Саня.

Арась, Миня эзь сода, ды, видьстэ меремс, те шкас сон теде эзь арсеяк. Касыть ды касыть.

– Вармась! – поладынзе валонзо Саня. – Тень минь нилеце классо природоведениянь уроксо ютынек.

Саня ёвтнизе, кода вармась сезни чувтонь кенерезь видьметнень ды кандтни эйсэст эрьва кува, косо эйстэст туить касомо од чувтынеть.

Минянь мельс пек тусь лелянзо ёвтнемась, секс сон седеяк капшазевсь школав, косо карми содамо эрьва мезде.

Апак учне Миня лотказевсь.

– Саня, а се пешксэнть тезэнь кие озавтызе? Эдь вармантень тей пештесь а кандови, – аволдась сон янонть чиресэ вишка куракшонть ёнов.

Саня сеск эзь муе, мезть меремс ялаксонзо кевкстеманть каршо. Мейле кармась ёвтнеме варманть вийдензэ, даволдонть, конась, келя, истямо виев – натой кудопрят лутни ды кепси менелентень. Те шкане велькссэст марязевсь мень-бути шалт, нармунень пижнема. Цёрынетне варштасть верев ды неизь – тюрьгадсть кавто сезьгант. Вейкенть кургсо мень-бути покольне, омбоцесь яла терявтни сонзэ нельгеме, сонсь пиже-ожо вайгельсэ пижни, паряк, истя тандавтни ялганзо. Кодамо-бути шкастонть сускомо марто сезьганось эзь цидярдо, пижакадсь, ды кургстонзо поколесь прась цёрынетнень пильгест малас. Ваныть, те... пеште! Чопода-тюжа пеште.

Саня кепедизе.

– Неик?! Минек пешкстнэнь аволь ансяк вармась озавтни...

Мейле школань вальмало ульнесь линейка, косо сехте покш мель явозель Минянь кондят школав васенцеде сыцятненень. Минянь мельс пек тусь Валентина Порфирьевна тонавтыцяст, кона теке нарвицька аштесь ципаканзо велькссэ. Мейле уш, классо тонавтницятнень лемест-фамилияст кевкстнемстэ, Валентина Порфирьевна энялдсь тенст ёвтнеме мезеяк ютазь кизэденть. Миня сеске кепедизе кедензэ. Сон ёвтнесь аволь кизэденть, седе, мезде кармась содамо течи, школав молемстэ, лелянзо кортнеманть эйстэ.

Ёвтнемазо пек тусь весень мельс. Валентина Порфирьевна шнызе:

– Тон, Цибизов, васень урокот течи кенерить ютамо уш школав молемстэ.

– Валентина Порфирьевна, нать, ушосояк урокт эрсить? – дивазевсь Миня.

– Весе эрямось – кувака урок. – Тонавтыцясь ютавтызе чевте вановтонзо весень ланга. – Васняяк тетянк-аванк ды школась лездыть тенк сонзэ чарькодемс, мейле тынсь, зярдо кастадо, вастовтадо эрьва кодамо китнень марто. Ней тынь ансяк-ансяк чалгиде тонавтнемань те кинть лангс.