Течи минь печататам ёвтнема, конань аволь умок редакцияв кандызе Кочкурвелень эриця. Паро мельсэ ды седейс токиця валсо сон ёвтни малавикс ломаньде – эсензэ сырькайде.

Умок арсян ёвтнемс монсень васолбабань эйстэ. Сон чачозь Вирьало Тавла велесэ. Лемезэ ульнесь Фёкла Никифоровна (Сёка баба), ансяк весе мерильть тензэ Талвинка или Талвин баба. Бабань тень лангс кежензэ эзть сакшно.

Кочкур велев бабам понгсь истя: васолдедам рана кадовсть ававтомо, урозокс кадовкшность монь содамга ветенест патят-ялакст. Эрямонь перть нужа содасть. Кода сась дедань урьвакстома шказо, тейтертне эсь велестэ никс кияк эзь моле. Сестэ деданень шнасть тейтерь Вирьало Талвасто. Тейтересь ульнесь сюпав семиянь, те самай ульнесь монь васолбабам.

Бабам ёвтнесь: кезэрень шкатнестэ одирьватне мирденень туемезэст эзть сода женихенть. Истя ульнесь бабань мартояк, ансяк бабам эзизе отказа дедань.

Урьвакстомадо мейле кармасть эрямо Кочкур велесэ, кирдеме ламо кудоютконь ракшат: ульнесь скалост, ревест, тувост. Бабам кортыль: кинь кардазсо сеть шкатнестэ ульнесь скалост, сете вачо пеке эзть сода.

Монь мельс кадовсть дедань куломадо мейле шкатне, зярдо весе арсемам ульнесть бабань ланга – пек вечкелия вакссонзо аштеманть. Тельня сон свал штердиль понань суре, конань мон тапарилинь кирес. Эрьва валске марто бабам уштыль каштом, пенгтне цятордозь палыльть ды псисэст эждильть каштом лангонть. Ям ды каша марто чугунтнэнь сон тулкадилинзе крюкасо каштомонть куншкав. Мон те шкасто аштилинь пецькалангсо. Лембе-е! Цирькунось моры. Паро-о!

Зярдо бабань тевензе маштыльть, сонгак кузиль ваксозом оймсеме: мадиль чирес, мон – удалонзо. Пилезэм морыль кеээрень калядамонь морот, ёвтниль икелень эрямодонть.

Дедань куломадо мейле бабам кувать – сыредемезэнзэ кирдсь скал, реветь ды туво. Мельсэм, шабрань Нюра баба марто сыргильть покш чеев тикшень ледеме. Саилизь ниле чаросо тачканть, конась ульнесь прок алашань крандаз, кавто пельде кундамо марто. Сонзэ лангс вачкильть цела покш улав коське тикше ды ускильть. А минь, все куронь эйкакштне, чиилинек каршост тулкадеме такчанть. Кудо боксо, бабам ды Нюра баба, ускозь улавонть явилизь кавтов.

Кадовсь мелезэм сеяк, кода бабань кудо боксо кавто цюрка лангсо путозель келей лаз, кона ацазель тулупсо. Кизэнь перть бабам уциль ушосо (кизэнь ветне лембельть). Чить, кода мон путылия прям те тулупонть лангс, сеске, прок пряс вачкодилимизь, тентейстэ матедевилинь.

Вана ней ютась пек покш шка ды кода бу вадря одов мадемс бабань каштомонть ды келей лазонть лангс, одов марямс бабань седейлембенть.