Сыӵеос радысь - Ертемысь Светлана Сысоева но. Солэн мылкыдызлы ми паймыса быримы. Корказязы пырыса ик адӟиське ни, кузё кышнолэн зарни киосыз шуыса. Отын но татын чебер но валаса тыремын-люкамын пӧртэм-пӧртэм киужъёсыз. Керттэмез-чильпамез, пужыятэмез сяна, мукет амалъёсын быдэстэмез но вань. Озьы ик корказ но: кытчы но син уг усьы, котькытын Светлана Александровналэн кибервылыз.
Керттӥськон веньёс со нырысьсэ кутэм, анаезлэсь адӟем карыса.
- Мамае улытозяз живот бордын ужаз. Скал кыскисьёс ведь асьсэос ик пудоез сюдылӥзы но, пастуханы но ветлӥзы. Мон пинал дыръям ялан бордаз улӥ, солы юрттӥськи. Пудоез возьманы бӧрсяз котьку керттӥськон кутылӥз, соку ик мон но бордаз кутски.
Тӥни со дырысен керттӥсь- кон мылкыдыз нылашлэн пумен-пумен пуромем, та ужен ӧз люкиськы ни бызем бераз но, гид тыр пудо-живот вордон вакытазы но.
- Дышетскемея мон бухгалтер, но ӝӧк сьӧрын пукон мон понна вылымтэ. Ӧй чида, кошки фермае – скал кыски, собере завфермое пуктӥзы. Колхозмы быриз но, "самозанятосте" потӥ. Кӧня живот соку вордӥмы: скал, парсь, ошпи!
- Валдэ вунэтӥд вераны, - ватса, вӧзамы чус пукись картэз.
Туннэ но пудозы ӧжыт ӧвӧл Сысоевъёслэн. Юн животэн турскыны яратӥсько, шуэ Светлана Александровна. Нош соос бордысь огдырлы ваньме гинэ, киуж борды басьтӥське. Кӧня шальёс, кругъёс, кофтаос, носки-пӧзь керттэмын – ачиз но вераны уг быгаты. Тросэз соос кузьымен луизы, кудзэ вузаз но.
- Та ужлы мон бешеная вал. Кутскисько но котьмае юн ӝог керттӥсько, - валэктэ со.
- Куинь-ньыль часэ султыса, со киуженыз пуке ни, - нош итӥське картэз Геннадий Константинович.
Ачиз но кузё кибашлы адями. Пуэн но ужаны вала, гурзэ но ачиз выльдэм. Мастерскояз котькыӵе но кулэ инструментъёсыз вань. Бордаз пиез но дышемын, котьмалы, пе, киыз мынэ. Нош Юкаменскын улӥсь выныз Алексей Сысоев кибашлыеныз быдэс ёросын тодмо.
- Милям папмы вал мастёр. Со бордын ми но выныным дышимы. Пулэсь чильпам наличникъёсмы но, палисадникмы но – солэн лэсьтэмез, - данъяськыса вера Геннадий Константинович.
Со ик луэ кышноезлэн ужъёсызлы нырысетӥез дунъясь но.
- Ужысь бертыкум, ӧсэтӥ пырыса гинэ вуисько, юа ни: "Геня, учкы, чебер-а?". "Чебер", - шуисько, - веранзэ азьланьтэ кузё.
Тӥни озьы, ог-огзэс валаса, ог-огзэс лӧпкытыса уло-выло Сысоев кузпалъёс. Одӥгез быдэстэм ужзы мылкыд сётэ ни вуоноосызлы. Толалтэ Светлана Александровна киужен турске ке, гужем бакча котыразгес берга ни. Улоназы чеберлык пыртыны дышем адями, бакчаяз но, азбараз но, палисадникын но турлы сяськаос будэтэ. Кӧня пӧртэм гладиолусъёс, георгинъёс, пионъёс но трос мукетыз шумпотто асьсэды но, доразы пырисьёсты но! Кудъёссэ, пе, ачим шедьтӥсько-басьтӥсько, нош кудъёссэ Ижын улӥсь нылыз вае. Солы но мумизлэн быгатонлыкъёсыз, бадӟым мылкыдыз пыӵамын. Нылызлэн киужъёсыз озьы ик чебермало корка пушсэс.
Тани Светлана Александровна тумба вылысь бадӟым розалы пӧрмем светильникез ӝуатэ. Артысь сыло кык сыӵе розаос: льӧль но тӧдьы. Одӥгез, пе, – нылызлэн кузьымез, мукетыз – кенэзлэн.
- Соос мынэсьтым но зол быгато, - шуэ выль тодмомы.
Нош мар бордын ачиз чакла таяз толэ ужаны юаммылы вераз:
- Али книга лыдӟонэн "висисько". Сэре нош мар ке но малпалом.