Надежда но Валерий Ковалёвъёсты нырысьсэ адӟыны мыным кылдӥз ӵапак сцена вылысь. Со вал кӧня ке аръёс талэсь азьло: семьялэн кузёез вожвылъяськиз ёрос конкурсын, творческой номерзэ кузпалыныз но пиеныз возьматыны потӥз. Бубиз но пиез гитараен шудӥзы, ваньзы ӵош кырӟазы. Кинлэн сюлэмыз уз вырӟы таӵе дыръя!
Кыкетӥзэ Надежда Юрьевнаен пумиськимы Удмурт Ключиысь почтаын: со ар пала ини гуртысь почта ёзэсэн кивалтэ. Шуныт пумитаз, капчиен вазиз, озьы вераськонмы но ӧръяськиз.
Нырысьсэ учкемысь яратон
Надя будэм огшоры семьяын: бубиз выжыезъя бесерман, Юкаменск палъёсысь, мумиз – удмурт, Глазов ёросысь Коротаево гуртысь. Нош аслыз солы семья кылдытыны кылдэм украин пиен. Тодматскемзылэн – аслаз историез.
Ӟеч сямъя 1-тӥ май праздник нуналэ егитъёс, пӧлазы Надя но, мынӥллям ошмес дуре – тылскем дурын картошка пыжиллям. Гуртысьтызы пиос пӧлын вылӥллям карысь воинской частьысь солдатъёс но, со вакыт соос сюрес лэсьтонын ужаллям. Ваньмон дыръязы Ключи клубе ветлыны кутскиллям.
- Валера ваньмыныз капчи вераськиз, анекдотъёс мачкиз, гитараен шудӥз, кырӟаз – кызьы адӟи мон сое, соку ик синмаськыса быри. Отысен ик тодматскимы, нош бертыкумы, монэ дорам келяса мынӥз, - тодаз вае Надежда Юрьевна.
Нош куке Валера Ковалёвлэн службаез быриз, удмурт нылэз со сьӧраз нуиз – кыдёкысь Путивль городэ, Украинае.
Пальпотыса пумита
Ог вить ар улыса, соку семьяязы кык пиоссы будо ини вал, Ковалёвъёс удмурт шаере бертыны карисько. Надялы куазь тупамтэ, собере ужен но шуг-секытъёс кылдӥзы, шуэ, уга 90-тӥ аръёс кутскизы – улон чутрак воштӥськиз. Нош вордскем палъёсаз ас музъемзы луоз – со сюдоз-утёз. Сое картэз но валалляз. Колхозын уж шедиз: Надяез скал кыскисе, картсэ сварщике кутӥзы. Семьялэн кузёез али ке но "Коммунарын" водитель-сварщик луыса тырше, Надежда но кема аръёс одӥг лёгем сюрестӥ ветлӥз.
- Фермаысь кошконо луиз тазалыке сэрен. Почтаын мыным кельше: калык пӧлын. Почта гуртын – туж кулэ, - шуэ.
Котькудзэ пырисез со шуныт пумита, кулэ юрттэт сётэ, куронъёссэс одно ик быдэстыны сюлмаське. Со сяна – уг вунэты пальпотыны. Яратоно кырӟасезлэн Сергей Трофимовлэн одӥгаз кырӟаназ таӵе чуръёс, пе, вань – "Я привык улыбаться людям", Надежда Юрьевна но сюлэмаз сыӵе мылкыдын улэ.
Адями мед луозы
Надежда но Валера понна бадӟым инты басьтӥз художественной самодеятельность. Куке но Ключиысь хор гуртлэн данъяськонэз вал, Ковалёвъёс отчы ӝутскем мылкыдын ветлӥзы. Нош гитараеныз семьялэн кузёез люкиськонтэм луиз. Нош но нош со сцена вылэ потэ, пӧртэм конкурсъёсын кырӟа. Учкись котьку ӟырдыт кичабонъёс кузьма.
Кырӟаны яратон, гитараен тунсыкъяськон нылпиоссылэн но виразы пыӵамын.
- Семьяямы милям ваньмыз кырӟало. Пиосмы огзы бере огзы - ньыльназы гитара борды кутскизы. Пичиез Виталямы но тренькать каре ини, бордамы кырӟа, - вера Надежда Юрьевна.
Кырӟам-шудэм сяна, ярато Ковалёв пиос лыдӟиськыны но, таиз сям мумызылэсь пыӵам.
Котьма ке но, ньыль пиосты будэтыку сюлмаськонъёс тырмыт, дыр. Но таин соглаш ӧз кариськы кышномурт.
- Кӧто дыръёсы но, вордскемзы но покчи дырзы, собере быдэ вуэмзы – ваньмыз каньылля ортчиз. Инмарлы тау, номырин ик сокем-сокем ӧз шугъяськытэ на пиосмы. Мылкыдоесь, ужасесь, огназы но кылёно мар ке, кӧтсы сюмаса уз улэ – сиён дасяны быгато.
Куинез пиоссы ас сюрессэс бырйизы ни. Бадӟымез военной луиз, али Ростов улосын спецназын службазэ нуэ. Семья кылдытӥз, мумызэ-бубызэ нунокъёсын шумпоттӥзы ни.
- Николай Ковалёв кадь офицеръёс милям гуртысь ӵем уг пото. Вань будӥсь пиосмы понна со адӟем карымон адями, - данъясько гуртоос.
Кыкетӥез, Сергейзы, Глазовысь аграрной колледжын дышетскиз, ассэ пӧртэм ужын эскериз ини. Бадӟым выныз доры мыныны дасяське, отын ужаны. Никитазы технической колледжын дышетске, теплотехник луоз. Нош покчиез - садике ветлӥсь ай.
- Азьпал улонзы пумысен, профессия бырйыкузы – ас ӵектонъёсынымы ум ик пыриськиське. Мылкыдзы луиз ке татын улыны - мед улозы, номыр ум вералэ. Главное, адями мед луозы, - лыдъяло кузпалъёс.
Улытозям та малпанэн улӥ
Надежда Юрьевна будэмын Тугбулатовоын, ас семьяеныз но татчы ик интыяськизы. Но вань улонэ кадь мынам Ключиын ортчиз, шуэ, соин, лэся, сюлэмызлы та гурт тужгес матын но дуно потэ. Льӧль малпанэз туэ быдэсмиз: Удмурт Ключие корка басьтӥзы. Выль ар азьын сое тыро-пыдо выльдыны-чеберъяны турскизы ни быдэс семьяен.
Сюлмысьтымы ӟечкыласькомы та усто семьяез корка пыронэн, вуись Выль арен! Шуд но бур, тазалык но яратон сӥзиськом!