Кӧня, кӧня городъёс!
Кызьы вера ачиз нылаш, дышетскон со понна котьку вал нырысетӥ интыын. Школаын тужгес но яратэм англи кылэз но географиез, мыло-кыдо пыриськем та предметъёсъя олимпиадаосы. Школаен но географиен яке кылъёсын герӟаны малпаз азьпал улонзэ но.
Экзаменъёссэ умой сётыса, дышетсконзэ азьланьтон вылысь Юля быръем куинь каръёсты: Глазов, Нижний Новгород но Москва.
- Аслым сюлэмыягес луэ география, нош бабуше ӵектэ вал англи кылэз. Сое тодэмед уно луонлыкъёс усьтоз шуылӥз. Котьма ке но, бырйимы Москваез, июле мамаеным ӵош потӥмы сюрес вылэ – документъёсме нуыны, - тодаз вае Юля.
Шедьтэ Юлямес!
Толэзь ортчыса, Юля нош мынэ Москвае, табере ини огназ дӥсьтэ. Отчы ветлытэк но тодыны луысал, пыриз-а, ӧз-а шуыса, но кин та выллем югдуре вуылэмын, тодэ, макем чырмыт луоно таӵе дыръя.
Юлялы удалтӥз! Макем шумпотӥз, бюджет чотын дышетскоз шуыса. Капчи мылкыдын гуртаз берты вылэм ни, нош билетъёс поездэ ӧвӧл.
- Нокин ӵыжы-выжыосмы Москваын ӧвӧл, Юлямы вокзалын пуке. Мар кароно? Мон кышкамын ни вал. Татысь ик, гуртысьтымы, азьвыл бускельмы али Москваын улэ, шедьтӥ солэсь телефон номерзэ, жингыртӥ. Кызьы-мар верай, валэктӥ, сюлворыса ни шуисько: "Шедьты милесьтым Юлямес", - тодаз вае нылашлэн бабушез.
Тӥни озьы, бадӟым городын Юля огназ вылымтэ. Ярам, телефонъёс туж юртто. Уйез со вокзалын уг ни ортчыты, тодмо адямиос дорын кӧлэ. Нош ӵуказеяз нош вокзалэ дыртэ. Поезд ӝог вуттэ вордскем Глазов палъёсаз.
География но китай кыл
Россилэн шоркараз куинетӥзэ мынӥз ни дышетскон ар кутскон азьын. Табере Юлия Казанцева – Москваысь педагогикая кун университетысь студентка. Общежитиын кык интыем комната сёто, отын одӥг группаысь нылын уло.
- Дышетскыны пӧртэм улосъёсысь лыктэмын: Киров, Екатеринбург, Саратов но мукет. Удмуртиысь мон огнам. Москва туж кельшиз. Но юн секыт йӧтӥз дышетскон пумысен: туж трос уж сёто, унозэ ас кожын дышетоно луэ. Нырысь-валысь мӧзмон но мылкыдэз пачкатылӥз. Но Выль арлы гуртэ бертылӥ, сюлэмы кӧня ке каньыл луыса кошки ини, - азьланьтэ веранзэ Юля.
Дышетсконлы котьку но трос дырзэ висъялляз бере, таяз учыре но ӧраз пыриз. Географиез дышетон валчеямын кунсьӧр кылъёсты дышетонэн, куинь пӧлысь: англи, француз но китай - Юля китай кылэз быръем. 4-тӥ курсын практика Китайын ортчоз, шуэ. Нош 1-тӥ курсысен со вуэм ни школаын дышетонэз но вылаз шӧдыны, Москва котырысь интыосын но тодматскыны, ассэ репетитор чотын но эскерыны.
Нош куке шутэтскемез, дыртытэк, чус гинэ юмшамез потылэ, сыӵе дыръёслы нылаш шедьтэм ни кельшымон интыос. Царицыное, Вормон парке, пе, мынӥсько.
Дистанционка
Коронавирусэн кылдэм югдур котькуд адямилэсь улонзэ воштӥз. Кыкетӥ курсэз Юля но эшъёсыныз пумозяз ӧз вуттэ, март толэзе ини соосты доразы лэзизы. Палэнысен дышетсконэз (удаленка) Куреггуртын капчи ӧй вал радъяны.
- Интернет ӧвӧлэн юн курадӟоно луиз. Тетраде гожъям ужъёсме телефонэн фотографировать карылӥ, телефонме ӝужыт шкаф вылэ тырылӥ. Wi-Fi люкылэм бере ужъёсме ноутбукам ыстылӥ. Отын кулэезъя тупатъям-дасям берам гинэ дышетӥсьёсмылы келялляй, - валэктэ Юля.
Озьы йылпумъяз кыкетӥ курсэз. Выль дышетскон арез университетын ик кутскизы ке, ноябре студентъёсты нош палэнысен дышетсконэ выжтӥзы. Ӵапак соку ми Юляез Куреггуртысь шедьтӥмы вал.
- Али капчигес луиз - интернетмы вань ни. Но озьы ик туж трос дышетоно, ужано. Маке быдӟа рефератъёс дасяно луэ. Дас часэ ӵукнаысен ӝыт сизьым часозь пукисько. Ӝыны толэзь куспын мон азбаре ньыль пол сяна ӧй пота на, - вераз вал соку.
Зэмзэ вераса, тазьы дышетскемысьтыз жаль но потӥз нылаш, соин валче ик паймоно чиданэзлы, мылкыдызлы но кужымезлы. Ойдо мед быгатозы! Шуг-секытъёслы медаз сётске!
- Очно амалэн дышетскыны трослы тунсыкогес. Эшъёсын вераськыны луэ, валантэмзэ – юаны, ӵошен сэрттыны-пертчыны. Кулэ дыръяз, ог-огедлы юрттыны, дышетӥсьлы вазиськыны. Ваньмыз со туж кулэ, - мылкыдъёссэ усьтэ со.
Выль ар праздникъёсы но Юлялы дыр ӧй вал тэк улыны. Сессия эшшо но трос дырез но тыршемез кулэ каре. Но Юля уг ӝожтӥськы, ужзэ тодэ-быдэстэ. Оскиськомы, школаын, пиналъёсын ужан мылкыдзэ шуг-секытъёс уз ворме шуыса.
Нош берытскоз-а егит дышетӥсь вордскем палъёсаз?
- Вань улонэ мынам отын ини, отчы ик кылё. Университетэз йылпумъяй ке, ужаны мыно, магистратураез заочно амалэн быдто, - шуэ Юля.
Та кылъёсыз кӧня ке ӝоже но уськыто: визьмо, сэзь, быгатӥсь егитъёсмы вордскем палъёсазы уг берытско шуыса. Нош мукет ласянь ке учконо, шумпотымон но данъяськымон со - асьме егитъёсмы мылкыдоесь, дӥсьтӥсесь, дуннеын ас интызэс утчаны дасесь.